ވެރިރަށް މާލެ ފިޔަވައި ރާއްޖޭގެ އަތޮޅުތަކުގައި ހަރަކާތްތެރިވާ ކުދި އަދި މެދު ފަންތީގެ ވިޔަފާރިތަކުން ބޭނުންކުރާ ކަރަންޓާއި ފެނުގެ ހިދުމަތަށް ނަގާ އަގު، މާލެއަށްވުރެ ބޮޑުތަނުން ބޮޑުކަމަށް ބުނެ، ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.
މި މައްސަލައިގައި ރައްޔިތުން މަޖިލީހުގެ މެންބަރުންގެ ހިޔާލު ހޯދުމަށް މި ގަރާރު ހުށަހެޅުއްވީ ހުޅުމާލޭ ދެކުނު ދާއިރާގެ މަޖިލިސް މެންބަރު ޑރ. އަހްމަދު ޝަމްހީދެވެ.
ޑރ. ޝަމްހީދު ހުށަހެޅުއްވި ގަރާރުގައި ފާހަގަކުރައްވާފައިވާ ގޮތުގައި، ސަރުކާރުގެ ޔުޓީލިޓީ ކުންފުނިތަކުން ކަރަންޓާއި ފެނުގެ ހިދުމަތްތަކަށް ކަނޑައަޅާފައިވާ ކޮމާޝަލް ރޭޓުތަކުގެ ސަބަބުން ކުދި އަދި މެދު ފަންތީގެ ވިޔަފާރިތަކުން މި އަސާސީ ހިދުމަތްތަކަށް ކުރަންޖެހޭ ހޭދަ އިންތިހާއަށް ބޮޑެވެ. މިކަމުގެ ސަބަބުން އަތޮޅުތަކުގައި ވިޔަފާރިކުރުމަށް ދަތިތަކެއް ކުރިމަތިވެފައިވާ ކަމަށް ގަރާރުގައިވެއެވެ.
ސްޓެލްކޯއާއި ފެނަކައިން ކަރަންޓުގެ ހިދުމަތަށް ކަނޑައަޅާފައިވާ އަގުތަކާއި، އެމްޑަބްލިއުއެސްސީން ފޯރުކޮށްދޭ ފެނުގެ ހިދުމަތްތަކަށް ކަނޑައަޅާފައިވާ އަގުތަކަށް ބަލާއިރު، މާލެއަށް ކަނޑައަޅާފައިވާ އަގުތަކާއި މާލެ ފިޔަވައި ރަށްރަށަށް ކަނޑައަޅާފައިވާ އަގުތަކުގައި ބޮޑެތި ފަރަގުތަކެއް ހުރިކަން ޑރ. ޝަމްހީދު ވަނީ ފާހަގަކުރައްވާފައެވެ.
އެގޮތުން ފެން މީޓަރެއް ރީލޮކޭޓު ކުރުމަށް މާލޭގައި 850ރ. ނަގާއިރު، މި ކަން އަތޮޅުތެރޭގައި ކުރުމަށް 2،200ރ.ނަގައެވެ. މިއީ މާލެއަށްވުރެ 159 ޕަސެންޓު ބޮޑު އަދަދެކެވެ. އަދި ކަރަންޓު ބިލުން 301-500 ޔުނިޓަށް، މާލޭގައި ޔުނިޓަކަށް 3.65ރ. ނަގާއިރު، އަތޮޅުތެރޭގައި 6ރ. ނަގައެވެ. މިއީ 64 ޕަސެންޓު ބޮޑު އަދަދެކެވެ.
ފެނުގެ ޚިދުމަތް ގުޅައިދިނުމަށް މާލޭގައި 3187.84 ރުފިޔާ، އަތޮޅުތެރޭގައި 5،000 ރުފިޔާ ނަގައެވެ. މިއީ 57 ޕަސެންޓުގެ އިތުރުވުމެކެވެ. ދުވާލަކު 201 ލީޓަރަށްވުރެން މަތިން ފެން ބޭނުންކުރާނަމަ، މާލޭގައި 101.26ރ. ނަގާއިރު، އަތޮޅުތެރޭގައި 135ރ. ނަގައެވެ. މިއީ 34 ޕަސެންޓު ބޮޑު އަދަދެކެވެ.
މި ގަރާރު ހުށަހަޅުއްވަމުން ޑރ. ޝަމްހީދު ވިދާޅުވި ގޮތުގައި، ކަން މިހެން ހުރުމުން ރަށްރަށުގައި ހަރަކާތްތެރިވާ ކުދި ފަންތީގެ ވިޔަފާރިތަކާއި މެދު ފަންތީގެ ވިޔަފާރިތަކުން ފެނާއި ކަރަންޓު ފަދަ އަސާސީ ހިދުމަތްތައް ހޯދުމަށް ކުރާ ހޭދަ އިންތިހާއަށް ބޮޑުވެފައިވެއެވެ. ހާއްސަކޮށް، ގެސްޓްހައުސް ފަދަ ވިޔަފާރިތަކަށް ކަރަންޓަށް ކުރަންޖެހޭ ހޭދަ 40 ޕަސެންޓާއި 70 ޕަސެންޓާ ދެމެދުގެ އަދަދަކުން އިތުރުވުމާއި، ފެނުގެ ހިދުމަތަށް މާލެއާ ބަލާއިރު އަތޮޅުތަކުގައި 35 ޕަސެންޓު އިތުރުވެފައިވާކަން ގަރާރުގައި ބަޔާންކޮށްފައިވެއެވެ.
މި ތަފާތުކުރުމުގެ ސަބަބުން ރަށްރަށުގައި ހިންގަމުންދާ ވިޔަފާރިތަކަށް އެކަށީގެންނުވާ މާލީ ބުރައެއް އުފުލަން ޖެހިފައިވާ ކަމަށާއި، މިކަން މިގޮތަށް ކުރިއަށްދާނަމަ ކުދި އަދި މެދު ފަންތީގެ ވިޔަފާރިތައް ދެމެހެއްޓުމަށް ގިނަ ދަތިތަކެއް ކުރިމަތިވެ، އެތައް ވިޔަފާރިއެއް ބަނގުރޫޓުވުމުގެ ނުރައްކާ އޮތްކަމަށް ޑރ. ޝަމްހީދު ވަނީ އަންގަވާފައެވެ.
ޚިޔާލުތައް