އިންޑިއާގެ ބޮޑުވަޒީރު ނަރެންދުރަ މޯދީ މާދަމާ ރާއްޖެއަށް ކުރައްވާ ދަތުރުފުޅަކީ، އިންޑިއާއިން ރާއްޖެއަށް އަންނަ ފަތުރުވެރިންގެ އަދަދު އިތުރުކޮށް، ދެގައުމުގެ ދެމެދުގައި އޮތް ގުޅުން އިތުރަށް ބަދަހިކޮށްދޭނެ ކަމެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ އިއްޔެ އިންޑިއާގެ މަޝްހޫރު މީޑިއާއެއް ކަމަށްވާ އޭ.އެން.އައިއަށް ދެއްވި ހާއްސަ އިންޓަވިއުއެއްގައެވެ.
ބޮޑުވަޒީރު މޯދީ، ރާއްޖޭގެ 60 ވަނަ މިނިވަން ދުވަހުގެ ޖަލްސާގައި ބައިވެރިވެވަޑައިގަތުމަށްޓަކައި މި މަހުގެ 25 އިން 26 އަށް ރާއްޖެއަށް ކުރައްވާ ދެދުވަހުގެ ދަތުރުފުޅާ ގުޅިގެން ނަޝީދު ވިދާޅުވީ، ދެގައުމުގެ ގުޅުން ވަރުގަދަވުމަކީ އެންމެންނަށް ވެސް ފައިދާވާނެ ކަމެއް ކަމަށާއި އެމަނިކުފާނަށް ގަބޫލުކުރެވޭ ގޮތުގައި ބޮޑުވަޒީރުގެ މި ދަތުރުފުޅުން އިންޑިއާގެ ފަތުރުވެރިން ރާއްޖެއަށް އަންނަ މިންވަރުވެސް އިތުރުވާނެ ކަމަށެވެ.
ނަޝީދު ވަނީ އިންޑިއާގެ މާލީ އެހީތެރިކަމާއެކު ތަރައްގީ ކުރަމުންދާ ހަނިމާދޫ އެއާޕޯޓް މަޝްރޫއުގެ މުހިންމުކަން ފާހަގަ ކުރައްވައިފައެވެ. ނަޝީދު ވިދާޅުވީ، މި މަޝްރޫއު ނިމުމަކާ ގާތްވެފައިވާ ކަމަށާއި، މިއާއެކު ދެކުނު އިންޑިއާގެ ސިޓީތަކާ ރާއްޖޭގެ އުތުރުގެ ރަށްރަށާ ދެމެދު ވައިގެ ގުޅުވުން ފަސޭހަވެ، ރަނގަޅުވާނެ ކަމަށެވެ.
“ހަނިމާދޫ އެއާޕޯޓަކީ ދެކުނު އިންޑިއާގެ ގިނަ ސިޓީތަކުން ގަޑިއެއްހާއިރުގެ ދަތުރެއްގައި އާދެވޭނެ ތަނެއް. މިކަމަކީ ދެގައުމަށް ވެސް ފައިދާހުރި ވަރަށް ބޮޑު ފުރުސަތެއް،” ނަޝީދު ވިދާޅުވިއެވެ.
ދެގައުމުގެ އިގްތިސާދީ ގުޅުމަށް އަލިއަޅުވާލައްވަމުން، ނަޝީދު ވިދާޅުވީ، ދިވެހިރާއްޖެ އިގްތިސާދީ ދަތިކަމެއްގައި އޮތް ދަނޑިވަޅެއްގައި، މާލީ ކާރިސާއަކުން ސަލާމަތްވުމަށް އިންޑިއާގެ އެހީތެރިކަން ވަރަށް ބޮޑަށް ބޭނުންވި ކަމަށެވެ. އަދި ރާއްޖޭގެ އިގްތިސާދީ ހަމަޖެހުން ކަށަވަރުކުރުމުގައި އިންޑިއާގެ އެހީތެރިކަމުން މުހިންމު ދައުރެއް އަދާކޮށްފައިވާކަން ފާހަގަކުރެއްވިއެވެ.
“އިންޑިއާގެ އެހީތެރިކަމާއި ރާއްޖެއާ ދެމެދު އޮތް ގުޅުން ވަރަށް ބޮޑަށް އަގުވަޒަންކުރަން. އަޅުގަނޑުމެންގެ ދަތި ދުވަސްވަރުގައި އެހީތެރިކަން ލިބިފައިވޭ. މާލީ ދަތިކަން ބޮޑުވެ، ދަރަނި އަދާކުރުމުގެ ބޮޑެތި ޒިންމާތަކެއް އޮތް ދަނޑިވަޅެއްގައި، އިންޑިއާގެ ވަގުތީ އެހީތެރިކަމުން އަޅުގަނޑުމެންގެ އިގްތިސާދީ ހަމަޖެހުން ދެމެހެއްޓުމަށް އިންޑިއާއިން އެހީވެދިން،” ނަޝީދު އިތުރަށް ވިދާޅުވިއެވެ.
ނަޝީދު ވިދާޅުވީ، އިންޑިއާ-ރާއްޖެ އިގްތިސާދީ ގުޅުން ބިނާވެފައިވަނީ އިތުބާރާއި ސަރަހައްދީ އެއްބައިވަންތަކަމުގެ މައްޗަށް ކަމަށާއި، މިއީ އަވަށްޓެރި ގައުމުތަކާ ދެމެދު ހަމަޖެހުން ދެމެހެއްޓުމަށް ބާރުދޭ ކަމެއް ކަމަށެވެ.
ބޮޑުވަޒީރު މޯދީ ކުރައްވާ މި ދަތުރުފުޅަކީ، އިންޑިއާ ކަނޑުގައި ރާއްޖެ އޮތް މުހިންމު ސަރަހައްދީ ގޮތްޕެއްކަމަށް ބަލައި، ދެގައުމުގެ ދެމެދުގައި އޮތް ޒަމާންވީ ގުޅުން ވަރުގަދަކުރުމަށް އިންޑިއާއިން ދޭ އިސްކަމުގެ ހެއްކެއް ކަމަށް ނަޝީދު ވަނީ ވިދާޅުވެފައެވެ.
ބޮޑުވަޒީރު މޯދީ ރާއްޖެއަށް ވަޑައިގަންނަވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވި ދައުވަތަކަށް މި މަހުގެ 25 އިން 26 އަށެވެ. އެމަނިކުފާނު ވަޑައިގަންނަވާނީ ރާއްޖޭގެ 60 ވަނަ މިނިވަން ދުވަހުގެ ހާއްސަ މެހެމާނެއްގެ ގޮތުގައެވެ.
އެކްސްގައި ހިއްސާކުރެއްވި މެސެޖެއްގައި ބޮޑުވަޒީރު މޯދީ ވިދާޅުވީ، ރާއްޖޭގެ 60 ވަނަ މިނިވަން ދުވަހުގެ ޖަލްސާގައި ބައިވެރިވުމުގެ ޝަރަފު ލިބުމަކީ ލިބޭ އުފަލެއް ކަމަށެވެ. އަދި މުހިންމު މަޝްވަރާތަކެއް މި ދަތުރުފުޅުގައި ކުރެވިގެންދާނެކަން މޯދީ ވަނީ ފާހަގަކުރައްވާފައެވެ.
މި ދަތުރުފުޅުގައި ބޮޑުވަޒީރު މޯދީ، ރައީސް މުޢިއްޒުއާ ބައްދަލުކުރައްވައި، ކޮންޕްރިހެންސިވް އިކޮނޮމިކް އެންޑް މެރިޓައިމް ސެކިއުރިޓީ ޕާޓްނަރޝިޕް އަށް ބާރުއަޅާ އިންޑިއާ-ރާއްޖެ ގުޅިފައިވާ ވިޝަންގެ ކުރިއެރުން ވަޒަންކުރައްވާނެއެވެ.
ޚިޔާލުތައް