ރާއްޖޭގެ ހުރިހާ ސްކޫލެއްގައި ދިރާސީ އާ އަހަރުގެ ފުރަތަމަ ޓާމް ކިޔެވުން ނިމި ރިޕޯޓްފޮތް ދިނުމާއެކު ދަރިވަރުންނަށް މިއަދު ޗުއްޓީ ފެށިއްޖެއެވެ.
ކުދިންނަށް ރިޕޯޓް ފޮތް ދިނުމަށްފަހު، އަހަރީ ޗުއްޓީ ފަށާފައިވާއިރު، އަލުން ކިޔެވުން ފެށޭނީ އޮގަސްޓު 10 ވަނަ ދުވަހުއެވެ. މިގޮތުން، ކުރިއަށް އޮތް މިނިވަން ދުވަހާއި ގުޅިގެން އަންނަ ބަންދާއެކު ޖުމްލަ 16 ދުވަސް ސްކޫލް ކުދިންނަށް ބަންދުވާނެއެވެ. އަންނަ ސެޕްޓެމްބަރު މަހުގައި ދަރިވަރުންނަށް މިޑްޓާމް ބްރޭކެއްގެ ގޮތުގައި 9 ދުވަސް ލިބިގެންދާނެއެވެ.
މިދިޔަ މެއި މަހު ދިރާސީ އަހަރުގެ ފުރަތަމަ ޓާމް ފެށިގެން ދިޔައިރު، ރާއްޖޭގައި ޕްރީސްކޫލުން ފެށިގެން ގްރޭޑް 12 އާ ހަމައަށް 96,000 ކުދިން ތައުލީމު ހާސިލުކޮށްފައިވެއެވެ. މީގެ ތެރޭގައި ސަރުކާރު ސްކޫލްތަކުން 83،000އެއްހާ ދަރިވަރުންނާއި، އަމިއްލަ ސްކޫލުތަކުގައި ކިޔަވާ 13،000 އެއްހާ ދަރިވަރުން ހިމެނެއެވެ.
2026 ވަނަ އަހަރު ދިރާސީ އާ އަހަރު ޖެނުއަރީގައި ފަށަން ސަރުކާރުން ނިންމާފައިވާއިރު އަންނަ ޑިސެމްބަރު މަހުގައި ދަރިވަރުންގެ ބޮޑު ޗެއްޓީގެ ގޮތުގައި ގާތްގަނޑަކަށް ދޮޅުމަސްދުވަސް ލިބިގެންދާނެއެވެ.
އެޑިއުކޭޝަން މިނިސްޓްރީގެ ކަލަންޑަރުގައިވާ ގޮތުން، އަންނަ އަހަރުގެ ފުރަތަމަ ޓާމުގެ ޗުއްޓީ ފަށާނީ ޖުލައި 24 ގައެވެ. ދެވަނަ ޓާމު ފަށާނީ އޮގަސްޓު 10 ގައެވެ. އަދި ދިރާސީ އަހަރު ނިމޭނީ ޑިސެންބަރު 28 ގައެވެ. މިއަހަރުގެ ބޮޑު ޗުއްޓީ ލިބޭނީ ޑިސެންބަރު 28 އިން ޖެނުއަރީ 27، 2026 އާ ހަމައަށެވެ.
ސްކޫލްތަކުގެ ބޮޑު ޗުއްޓީއަކީ ދަރިވަރުންނާއި މުދައްރިސުންނަށް މުހިންމު ވަގުތެކެވެ. މި މުއްދަތުގައި ދަރިވަރުންނަށް އަރާމުކޮށް، އާއިލާއާއެކު ވަގުތު ހޭދަކުރުމުގެ ފުރުސަތު ލިބެއެވެ. އަދި ކިޔެވުމުގެ ބުރަ މަސައްކަތުން ވަގުތީ ހުސްވަގުތުކޮޅެއް ލިބި، އަމިއްލަ ޝައުޤުވެރިކަން ހުރި ކަންކަމުގައި ބައިވެރިވުމުގެ ފުރުސަތު ލިބެއެވެ.
މުދައްރިސުންނަށް މި ޗުއްޓީގައި އަންނަ އަހަރަށް ތައްޔާރުވުމާއި، އަމިއްލަ ތަރައްޤީއަށް މަސައްކަތްކުރުމުގެ ވަގުތު ލިބެއެވެ. ސްކޫލްތަކަށް މި ވަގުތަކީ އިމާރާތްތަކާއި ވަސީލަތްތައް މަރާމާތުކޮށް، އަންނަ އަހަރަށް ތައްޔާރުވުމުގެ ފުރުސަތެކެވެ.
ޚިޔާލުތައް