އިންޑިއާގެ ބޮޑުވަޒީރު ނަރެންދުރަ މޯދީ، ކުރީގެ ރައީސް މުހައްމަދު ނަޝީދާ ބައްދަލުކުރައްވައިފިއެވެ.
ބޮޑުވަޒީރު މޯދީ މި ބައްދަލުކުރެއްވުމަށްފަހު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް ނަޝީދުއަކީ އަބަދުވެސް އިންޑިއާ އާއި ދިވެހިރާއްޖޭގެ އެކުވެރިކަމަށް ވަރުގަދައަށް ވަކާލާތު ކުރައްވާ ބޭފުޅެއް ކަމަށެވެ. މި ބައްދަލުކުރެއްވުމުގައި، އިންޑިއާގެ “ނެއިބާހުޑް ފަސްޓް” ސިޔާސަތާއި “މަހާސާގަރުގެ ތަސައްވުރު”ގެ އަގުހުރި ތަނބެއްގެ ގޮތުގައި އަބަދުވެސް ދިވެހިރާއްޖެ އޮންނަ އޮތުމާ ބެހޭގޮތުން ވާހަކަ ދެކެވުނު ކަމަށް ބޮޑުވަޒީރު މޯދީ ހާމަކުރެއްވިއެވެ.
މީގެ އިތުރުން، އިންޑިއާއިން ދިވެހިރާއްޖެއަށް ކެޕޭސިޓީ ބިލްޑިން (ގާބިލިއްޔަތު ބިނާކުރުން) އާއި ޑިވެލޮޕްމަންޓް ކޯޕަރޭޝަން (ތަރައްގީގެ އެއްބާރުލުން) ގެ ދާއިރާ މެދުވެރިކޮށް އެއްބާރުލުން ފޯރުކޮށްދެމުން ގެންދާނެ ކަމުގެ ޔަޤީންކަންވެސް ބޮޑުވަޒީރު މޯދީ ވަނީ ދެއްވާފައެވެ.
މީގެ ދެދުވަސްކުރިން ނަޝީދު ކުރެއްވި ޓްވީޓެއްގައި ވިދާޅުވީ، ދިވެހިރާއްޖެ އިގްތިސާދީ ދަތިކަމެއްގައި އޮތް ދަނޑިވަޅެއްގައި، މާލީ ކާރިސާއަކުން ސަލާމަތްވުމަށް އިންޑިއާގެ އެހީތެރިކަން ވަރަށް ބޮޑަށް ބޭނުންވި ކަމަށެވެ. އަދި ރާއްޖޭގެ އިގްތިސާދީ ހަމަޖެހުން ކަށަވަރުކުރުމުގައި އިންޑިއާގެ އެހީތެރިކަމުން މުހިންމު ދައުރެއް އަދާކޮށްފައިވާކަން ފާހަގަކުރެއްވިއެވެ.
ރާއްޖޭގެ 60 ވަނަ މިނިވަން ދުވަހުގެ ރަސްމިއްޔާތުގައި ބައިވެރިވެވަޑައިގަތުމަށް ރާއްޖެއަށް ކުރައްވާ ރަސްމީ ޒިޔާރަތުގެ ތެރެއިން މޯދީ ވަނީ ނައިބު ރައީސް އިބްރާހީމް މުޙައްމަދު ލަތީފާއި، މަޖިލިސް ރައީސް އަބްދުއް ރަހީމްގެ އިތުރުން ރާއްޖޭގެ އެކި ސިޔާސީ ޕާޓީތަކުގެ ލީޑަރުންނަވެސް ބައްދަލުކުރައްވާފައެވެ.
ޚިޔާލުތައް