ކުރިއަށް އޮތް ދެ ދުވަހު ރާއްޖޭގެ ހުރިހާ ސަރަހައްދަކަށް ވިއްސާރަކުރާނެ ކަމަށް މޫސުމާ ބެހޭ ޤައުމީ އިދާރާ، މޯލްޑިވްސް މީޓިއޮރޮލޮޖިކަލް ސެންޓަރ. މެޓް އޮފީހުން ބުނެފިއެވެ.
މެޓުން ބުނީ ފަސް ދުވަސް ވަންދެން ދެކުނަށް ވައި ގަދަވެ ވިއްސާރަ ކުރާނެ ކަމަށާއި މެދުރާއްޖެތެރޭގެ އަތޮޅުތަކަށް ކެރީގެ އަސަރު ބުރާސްފަތި ދުވަހުން ފެށިގެން ކުޑަވާނެ ކަމަށެވެ.
އަންގާރަ ދުވަހާއި ބުދަ ދުވަހުގެ ފަހުން އުތުރުގެ އަތޮޅުތަކަށް ވައި މަޑުވާނެކަމަށް މެޓުން ބުނެއެވެ. ނަމަވެސް މެދުރާއްޖެތެރޭގެ އަތޮޅުތަކަށް ވައި މަޑުވާނީ ހުކުރު ދުވަހުން ފެށިގެންނެވެ.
މެޓުން ލަފާކުރާގޮތުގައި، ރާއްޖޭގެ އެކި ހިސާބުތަކަށް ގުގުރުމާ އެކު ވިއްސާރަކޮށް، ދެކުނުގެ ބައެއް ރަށްރަށަށް ބޯކޮށް ވާރޭ ވެހުން އެކަށީގެންވެއެވެ. އުތުރުގެ ރަށްތަކަށް ހުޅަނގާއި ހުޅަނގު އުތުރުން، އަދި އެހެން ހިސާބުތަކަށް އިރާއި އިރުދެކުނުން، ގަޑިއަކު ހަތް މޭލާއި 17 މޭލުގެ ބާރުމިނުގައި ވައި ޖެހޭނެ ކަމަށާއި، ވިލާގަނޑުގައި ގާތްގަނޑަކަށް 40 މޭލަށް ވައިގަދަވާނެ ކަމަށް ލަފާކޮށްފައިވެއެވެ.
މެޓުން ނެރެފައިވާ މައުލޫމާތުތަކަށް ބަލާއިރު، އިއްޔެ ހެނދުނު 8 އިން ފެށިގެން މިއަދު ހެނދުނު 8 އަށް އެންމެ ގިނައިން ވާރޭ ވެހިފައިވަނީ ގދ. ކާޑެއްދުއަށެވެ. އެގޮތުން ކާޑެއްދުއަށް 33.7 މިލިމީޓަރުގެ ވާރޭ ވެހުނުއިރު، ފުވައްމުލަކަށް 22.5 މިލިމީޓަރުގެ ވާރޭ ވެހިފައިވާ ކަމަށް، އެ މައުލޫމާތުގައި ވެއެވެ.
ފުސް ނަކަތް ނިމި، އަހުލިހަ ނަކަތް މާދަމާ ފަށާނެއެވެ. ފުސް ނަކަތަށް ވުރެ އަހުލިހަ ނަކަތުގެ ދުވަސްތަކުގައި ވިއްސާރަ މަޑުވެ، މޫސުން އާންމުގޮތެއްގައި ރަނގަޅުވެއެވެ.
ޚިޔާލުތައް