ޞާލިޙް ދިވެހިރާއްޖޭގެ ފަސްދޮޅަސްވަނަ މިނިވަންދުސް ފާހަގަ ކުރުމުގެ ގޮތުން މެލޭޝިޔާގައި ހުންނަ ދިވެހިރާއްޖޭގެ ހައިކޮމިޝަންގައި ދިދަ ނެގުމުގެ ހަރަކާތެއް ކުރިއަށް ގެންދެވުނެވެ. ޖުލައި 26 ވަނަ ދުވަހު ހެނދުނު އޮތް ދިދަ ނެގުމުގެ މިރަސްމިއްޔާތުގައި ދިވެހި ދިދަ ނަންގަވައިދެއްވީ ހައިކޮމިޝަނަރ ޑރ. މަރިޔަމް ޝަބީނާ އަޚްމަދެވެ. މި ރަސްމިއްޔާތުގައި ހައިކޮމިޝަންގެ މުވަޒަފުންގެ އިތުރުން ކުރީގެ ސަފީރު އަލްފާޟިލް އަލީ ހުސެން ދީދީ ބައިވެރިވެވަޑައިންނެވިއެވެ. ދިދަ ނެންގެވުމަށްފަހު ގައުމީ ސަލާމް ކިޔުން އޮތެވެ.
ދިދަ ނެގުމުގެ ރަސްމިއްޔާތުގެ އިތުރުން މެލޭޝިޔާގައި ދިރިއުޅޭ ދިވެހިންނަށް އަމާޒުކޮށްގެން މެލޭޝިޔާގައި ހުންނަ ދިވެހިރާއްޖޭގެ ހައިކޮމިޝަންގެ ފަރާތުން ހާއްސަ ހަރަކާތްތަކެއް ވަނީ ކުރިޔަށް ގެންދެވިފައެވެ. މެލޭޝިޔާއަކީ ދިވެހިރާއްޖޭން ބޭރުގައި އެންމެ ގިނަ އަދަދެއްގެ ދިވެހިކިޔަވާ ކުދިން ތިބި ގައުމު ކަމުގައި ރައީސުލްޖުމްހޫރިޔައްޔާ ވަނީ މިއަހަރު އޭޕްރީލް މަހު މެލޭޝިޔާޔަށް ކުރެއްވި ފުރަމާނަދަތުރުފުޅުގައި ވިދާޅުވެފައެވެ.
ދިވެހިރާއްޖޭގެ 60 ވަނަ މިނިވަންދުވަހާއި ގުޅުވައިގެން ހައިކޮމިޝަންގެ ފަރާތުން ވަނީ “މިއީ ކޮން ރަށެއް” ގެ ނަމުގައި އިންސްޓަގްރާމް ކުއިޒެއް ކުރިޔަށް ގެންގޮސްފައެވެ. މިއަދުގެ ޖީލަށް ދިވެހިރާއްޖޭގެ ތާރީޚީ ބިނާތަކާއި، އާސާރުތައް ހަނދާންކޮށްދިނުމުގެ ގޮތުން ހައިކޮމިޝަންގެ މޯލްޑިވްސް ސެންޓަރ ގެ ފަރާތުން ކުރިޔަށް ގެންދިޔަ މި ކުއިޒް އަށް ވަނީވަރަށް ބޮޑު ތަރުހީބެއް ލިބިފައެވެ. މީގެ އިތުރުން “ދިވެހި ވަން އޮން ވަން” ގެ ނަމުގައި ދިވެހިންނަކީ އަމިއްލަ ބަހަކާއި އަކުރެއް ލިބިފައިވާ ފަހުރުވެރި ބައެއްކަން ދައްކުވައިދިނުމުގެ ގޮތުން ތައްޔާރު ކުރެވޭ އަށް އެޕިސޯޑުގެ ފުރަތަމަ އެޕިސޯޑްވަނީ އިންސްޓަގްރާމްގައި ލޯންޗު ކުރެވުނެވެ.
މީގެ އިތުރުން މިނިވަންދުވަހުގެ މުނާސަބަތުގައި ދިވެހިންގެ ޓީމަކާއި މެލޭޝިޔާގެ ޓީމަކާއި ދެމެދު ވަނީ ވަރަށް ހާއްސަ ފުޓުބޯޅަ މެޗެއް ކުޅެވިފައެވެ. މި ފުޓުބޯޅަމެޗް އިންތިޒާމްކޮށްދެއްވީ މެލޭޝިޔާގައި ހުންނަ ދިވެހި ބްރޭންޑެއްކަމަށްވާ “ފެމިލީ ރޫމް ކޮފީ” ސޮޕްގެ ފަރާތުންނެވެ.
ޚިޔާލުތައް