މުހައްމަދު ޝިހާބް އަންނަ ބުރާސްފަތި ދުވަހުގެ (21 ފެބްރުއަރީ) ރޭ ފުވައްމުލައް ސިޓީ ކައުންސިލްގެ އާއްމު ބައްދަލުވުން ބޭއްވުމަށް ނޯޓިސް ނެރެފިއެވެ. ފުވައްމުލައް ސިޓީ ކައުންސިލްގެ ފޭސްބުކު ޕޭޖުގައި ފާއިތުވި އާދީއްތަ (17 ފެބްރުއަރީ) ދުވަހު އަޕްލޯޑްކޮށްފައިވާ ނޯޓިސް ގައި ވާގޮތުން އަންނަ ބުރާސްފަތި ދުވަހުގެ ރޭ 8:30 ގައި މިބައްދަލުވުން ފުވައްމުލައް ސިޓީ ކައުންސިލްގެ ކުރުނދުމާ މާލަމުގައި ބޭއްވުމަށް ވަނީ ތާވަލް ކުރެވިފައެވެ.
މިބައްދަލުވުމުގައި ބައިވެރިވުމަށް ފުވައްމުލައް ސިޓީގެ ރައްޔިތުންނަށް ހުޅުވާލައި ދައުވަތު ދީފައިވެއެވެ.
ލާމަރުކަޒީ ގާނޫނުގެ 110 ވަނަ މާއްދާގައި ބުނާ މިބައްދަލުވުން ބޭއްވުމުގެ 7 ދުވަސް ކުރިން ނޯޓިސް ނެރެން ޖެހޭ އިރު ސިޓީ ކައުންސިލުން މިފަހަރު ނެރުނު ނޯޓިސް ގައި ނެރުނު ތާރީޚެއް ލިޔެފައި ނުވެއެވެ.
ކޮންމެ އަހަރަކު ދެ ފަހަރު ބޭއްވުމަށް ގާނޫނުން ލާޒިމުކުރާ ފެބުރުއަރީ އަދި ޖުލައި ބައްދަލުވުމުގެ ނޯޓިސް އާއި އެ ބައްދަލުވުމުގައި ރައްޔިތުންނާއި މަޝްވަރާ ކުރުމަށް ކަނޑައަޅާފައިވާ ފާއިތުވި އަހަރު ސިޓީ ކައުންސިލް ހިންގި ގޮތުގެ އަހަރީ ރިޕޯރޓާއި މާލީ ރިޕޯރޓް އަދި އޯޑިޓް ރިޕޯރޓް ބައްދަލުވުމުގެ 7 ދުވަސް ކުރިން އާއްމު ކުރަން ޖެހެއެވެ.
ލާމަރުކަޒީ ގާނޫނުގެ 110 ވަނަ މާއްދާ
ނަމަވެސް ފުވައްމުލައް ސިޓީ ކައުންސިލުގެ މިއިން ރިޕޯރޓެއް އާއްމުކުރިކަން އެނގޭކަށް ނެތެވެ. އެސިޓީ ކައުންސިލްގެ މައުލޫމާތުތައް އެންމެ ގިނައިން އާންމުކުރާ ފޭސްބުކް ޕޭޖުގައި އާއްމުކޮށްފައެއް ނުވެއެވެ.
މިކަމާއި ގުޅިގެން މައުލޫމާތު ހޯދުމަށް ސިޓީ ކައުންސިލްގެ އިސް ފަރާތްތަކަށް ގުޅުމުން ފޯނަށް ޖަވާބު ނުދެއްވާތީ މެސެޖް ކޮށްގެން ވެސް އެކަން ޔަގީން ކުރެވޭ ގޮތެއް ވަނީ ނުވެފައެވެ.
ސިޓީ ކައުންސިލުން ނެރެފައިވާ ބައްދަލުވުމުގެ ނޯޓިސް އާއިއެކު އެބައްދަލުވުމުގެ އެޖެންޑާއެއް ވެސް އާއްމު ކޮށްފައެއް ނުވެއެވެ. ނަމަވެސް ފޭސްބުކް ޕޯސްޓުގައި ހަސަން މުހައްމަދު ކިޔާ މީހަކު އެޖެންޑާ ލިބިދާނެތޯ ސުވާލުކުރުމުން އެކޮމެންޓަށް ޖަވާބުދިން ސިޓީ ކައުންސިލްގެ މުވައްޒިފެއް ކަމަށް ބެލެވޭ އާމިނަތު ޝެހެނާޒު ލިބިދާނެ ކަމަށް ބުނެފައި ވެއެވެ.
ނަމަވެސް މާދަމާ ނޫން އަނެއް ދުވަހުގެ ރޭ ބާއްވޭ ބައްދަލުވުމުގެ އެޖެންޑާ އަދި އެ ކައުންސިލުން އާއްމުކޮށްފައެއް ނުވެއެވެ.
މިކަމާއި ގުޅިގެން މިކަލް ނޫހާއި ވާހަކަ ދެއްކި މީހަކު ބުނި ގޮތުގައި ރައްޔިތުންނާއި މައުލޫމާތު ހިއްސާކުރުމުގައި ފުވައްމުލައް ސިޓީ ކައުންސިލުން ވަނީ ފަހަތު ފަޔަށް ބުރަވެފައެވެ. މިކަލް ނޫހަށް ވެސް ފާހަގަ ކުރެވުނު ގޮތުގައި ފުވައްމުލަކު ސިޓީ ކައުންސިލްގެ މަދު މައުލޫމާތެއް ވެސް ލިބެނީ ފޭސްބުކު ޕޭޖުން ނެވެ.
ރައްޔިތުންނަށް ޚިދުމަތް ކުރުމަށް އޮތް ކައުންސިލުގެ އެތެރެއާއި ބޭރުގެ ހަރަކާތްތައް މިހާރަށް ވުރެ ފުޅާ ދާއިރާގައި ހާމަކުރެވިގެން ނޫނީ ކައުންސިލްތައް ރައްޔިތުންނަށް ޒިންމާދާރުވާތަން ނުފެންނާނެ ކަމަށް ގަބޫލުކުރެވެއެވެ.
ޚިޔާލުތައް