އިބްރާހިމް ލަތީފް އެމްޑީޕީގެ ގައުމީ މަޖިލީހުގެ ފުވައްމުލަކު ދެކުނު ދާއިރާގެ ރައީސް ސައުދުﷲ އަހުމަދު ހަސަންދީދީ އަށް އެމްޑީޕީގެ ފިޔަވަޅު އަޅާ ކޮމިޓީއިން ފިޔަވަޅު އަޅައިފިއެވެ. ސައުދުﷲ ގެ މައްޗަށް އެމްޑީޕީއިން ފިޔަވަޅު އަޅާފައިވަނީ އެދާއިރާގެ 112 މެންބަރަކު ހުށަހެޅުއްވި މައްސަލައެއް އެޕާޓީގެ ފިޔަވަޅު އަޅާ ކޮމިޓީއިން ބެލުމަށްފަހު މިމަހު 18 ވަނަ ދުވަހުގައެވެ.
އެމްޑީޕީގެ މެންބަރުން ހުށަހެޅުއްވި މައްސަލަތައަކީ، އެދާއިރާގެ އެމްޑީޕީގެ ކެންޑިޑޭޓު މުހައްމަދު މުމްތާޒުގެ ކެމްޕޭނަށް ހުރަސްއެޅޭގޮތަށް ބަހާއި އަމަލުން މަސައްކަތްކުރައްވާ ދާއިރާގެ އާންމު މެންބަރުންގެ މެދުގައި ފިތުނަ ފަސާދައުފައްދާ ޕާޓީގެ މަސްލަހަތު ގެއްލުވާލުމަށް މަސައްކަތްކުރާކަމުގެ ތުހުމަތުކުރެވޭ މައްސަލައެކެވެ.
މިމައްސަލަ އެމްޑީޕީގެ ފިޔަވަޅު އަޅުއްވާ ކޮމިޓީ ބެއްލެވުމަށްފަހު ނިންމެވީ ގައުމީ އިންތިޚާބުތަކުގައި ވާދަކުރުމަށް ޕާޓީގެ ފަރާތުން ޓިކެޓްލިބޭ ފަރާތްތަކަށް އެއިންތިޚާބު ކާމިޔާބުކޮށް ދިނުމަށް އެންމެ ބޮޑު މަސައްކަތެއް ކުރަންޖެހޭ، އަދި ޕާޓީގެ މަސްލަހަތު ހިފަހައްޓަން ޖެހޭ ފަރާތްތަކަކީ ޕާޓީގެ އެކިއެކި މަގާމުތަކުގައި ތިއްބަވާ ފަރާތްތަކަށްވާތީވެ، ޕާޓީގެ ޓިކެޓް ހޯއްދެވި މުހައްމަދު މުމްތާޒަށް ތާއީދު ހޯއްދެވުމަށް ދާއިރާގެ ރައީސް އަދި ގައުމީ މަޖިލީހުގެ މެމްބަރު ސައުދުﷲ އަމަލީ ގޮތުން ބައިވެރިވުމަށާއި ނިމިދިޔަ ޕްރައިމަރީގެ ތެރޭގައި ދާއިރާގެ ޕާޓީ މެންބަރުންގެ މެދުގައި އުފެދިފައިވާ އެންމެހާ ނުތަނަވަސްކަން ކަނޑުވާލުމުގެ މަސައްކަތް މަގާމުގެ ހައިސިއްޔަތުން ކޯށްދެއްވުމަށާއި އެކަމުގެ ޒިންމާ އުފެއްލެވުމަށް ދާއިރާގެ ރައީސް ސައުދުﷲ އަހުމަދު ހަސަންދީދީ އަށް ނަސޭހަތްތެރިވެ އިންޒާރު ދިނުމަށެވެ.
ޚިޔާލުތައް