ސާއިމް މޫސާ ފުވައްމުލަކުގެ ފެނާއި ނަރުދަމާގެ މަސައްކަތް ކުރިއަށް ދާތީވެ އިދިކޮޅު ފަރާތްތަކަށް އެކަން ހަޖަމް ނުކުރެވޭ ކަމަށް ފުވައްމުލަކު އުތުރު ދާއިރާގެ އިއްޒަތެރި މެމްބަރު އަލީ ޝާހު ވިދާޅުވެއްޖެއެވެ .
މެމްބަރު ޝާހު މިހެން ވިދާޅުވީ އިއްޔެ އޮތް ރައްޔިތުންގެ މަޖްލީހުގެ ޖަލްސާގައި ސަރުކާރުގެ ފަރާތުން، ގެމަނަފުށީ ދާއިރާގެއ މެންބަރު ޖަމީލް ޢުޘްމާން ހުށަހަޅުއްވާފައިވާ ޕާޓްނަރޝިޕްގެ ގާނޫނު އަށްއިޞްލާޙު ގެނައުމުގެ ބިލުގެ ބަހުސްގެ މަރުޙަލާގައި ވާހަކަފުޅު ދައްކަވަމުންނެވެ.
“އަޅުގަނޑުމެންނަށް އެބަފެނޭ މާލެއާއި ހުޅުމާލޭގެ ބްރިޖު އެޅުމުގެ މަސައްކަތްކުރެވެމުންދާތީ މީ ކިތައް ބިލިއަން ރުފިޔާތޯ؟ އި.ޖީ.އެމް.އެޗު ގައި މި އެޅޭ 25 ބުރީގެ ހޮސްޕިޓަލަށް ބަލައިލިޔަސް ކިތައް ބިލިއަން ރުފިޔާތޯ؟ ފުވައްމުލަކުގެ ފެނާއި ނަރުދަމާ މިއީ ކިތައް ސަތޭކަ މިލިއަން ރުފިޔާތޯ؟ މި ކަންކަން ހިނގާތީ ހަޖަމުނުވެގެން މި އުޅެނީ. އެ ދަންނަވާ ކުލަ(އެމްޑީޕީ) މަޑުމަޑުން ދިވެހިރާއްޖޭގެ ޖައްވުން ފޮހެވިގެންދާތީ މައްސަލައަކީ.” ޝާހު ވިދާޅުވިއެވެ.
އިތުރަށް ވާހަކަ ދައްކަވަމުން، ރާއްޖެ ފަދަ ސައްތައިން ސައްތަ މުސްލިމު ޤައުމެއް ގައި އިސްލާމީ ޝަރީޢަތް ޤާއިމުކުރުމަށް ޓަކައި ވަކާލާތުކުރާ ސަރުކާރެއް އޮއްވައި، އެ ސަރުކާރު ވައްޓާލުމަށްޓަކައި މަސައްކަތް ކުރުމަކީ އެންމެ ޒިންމާދާރު ގޮތްތޯ؟ ބުނެ ފުވައްމުލަކު އުތުރު ދައިރާގެ އިއްޒަތެރި މެމްބަރު އަލީ ޝާހު ވަނީ ސުވާލު އުފައްދަވައިފިއެވެ .
“ރާއްޖެ ފަދަ ސައްތައިން ސައްތަ މުސްލިމު ޤައުމެއް ގައި އިސްލާމީ ޝަރީޢަތް ޤާއިމުކުރުމަށް ޓަކައި ވަކާލާތުކުރާ ސަރުކާރެއް އޮއްވައި މަގުމައްޗަށް ނުކުމެ ހަޅޭއްލަވައި، ދިވެހިރާއްޖޭގައި ހަމަނުޖެހުން އުފައްދައި، ފިތުނަ އުފައްދައި، މި މަސައްކަތް މި ކުރަނީ. އިއްޒަތްތެރި ރައީސް، އެއީތޯ ޒިންމާދާރުކަމަކީ؟ މަޝްވަރާގެ މަޖިލީހަށް ގޮވައިލީމަ އަޅުގަނޑުމެންނަކަށް ނުފެނޭ މަޝްވަރާކުރުމަށް އައުމުގެ ޤާބިލުކަމެއް. ގަޓެއް ހުރި މަންޒަރެއް އަޅުގަނޑުމެންނަކަށް ނުފެނޭ” މެމްބަރު ޝާހު ވިދާޅުވިއެވެ.
މީގެ އިތުރުން ޝާހު ވިދާޅުވި ގޮތުގައި މިއަދު މި ސަރުކާރުން އެންމެނަށް އެއް އުސޫލުން އިންސާފު ގާއިމް ކުރަމުން ދާކަމަށެވެ. މިގޮތުން ކުރީގެ ނައިބް ރައީސް އަދީބް އަށް އިޝާރާތް ކުރައްވައި ވިދާޅުވީ، ރައީސުލްޖުމްހޫރިއްޔާގެ އެންމެ އަރިހުގައި ހުންނަ މީހާ، އެންމެ ރަހުމަތްތެރި މީހާ، އެންމެ ގާތް މީހާ ކަމަށް ވިޔަސް އިންސާފު އަރައި ހަމަކުރާނެ ކަމަށެވެ. އަދި އެ މަންޒަރު މި ސަރުކާރުން ދައްކަމުން އަންނަ ކަމަށާއި،އެ ގަޓު ހުރީ މި ސަރުކާރުގައި ކަމަށްވެސް ޝާހު ވިދާޅުވިއެވެ.
ޚިޔާލުތައް