އަހުމަދު ނިޖާހް އިންސްޓިއުޓް ފޯރ ގުރުއާން އެންޑް ސުންނަތް ގެ ފުވައްމުލަކު ކެމްޕަހުގައި މިމަހު ކޯސްތަކެއް ފެއްޓޭންކަމަށް އެކެމްޕަހުން ވިދާޅުވެއްޖެއެވެ.
އިންސްޓިއުޓް ފޯރ ގުރުއާން އެންޑް ސުންނަތް (އައި ކިއު އެސް) ގެ ފުވައްމުލަކު ކެމްޕަސް ހިންގުމުގައި އިސްކޮށް ހަރަކާތްތެރިވާ މުހައްމަދު އަރީފް ވިދާޅުވީ މިމަހު 10 ގައި އެކެމްޕަހުން ކޯސްތަކެއް ފެއްޓުމަށް ހަމަޖެހިފައިވާ ކަމަށާއި މިހާރުވެސް ބައިވެރިވުމަށް އެދޭ ފޯމް ދޫކުރަމުންދާކަމަށެވެ.
އައި ކިއު އެސް އިން ނެރެފައިވާ އިޝްތިހާރެއްގައި ބުނެފައިވަނީ 1 އަހަރު ދުވަހުގެ ގުރުއާން މުދައްރިސްކަމުގެ އެޑްވާންސް ކޯހާއި، ޑިޕްލޮމާ ކޯސް އަދި 2 އަހަރު ދުވަހުގެ ގުރުއާން މުދައްރިސް ކަމުގެ ޑިޕްލޮމާ ކޯސްވެސް އެ ކޮލެޖްއިން ހިންގާކަމަށެވެ. މީގެ އިތުރުން އިމާމް ކަމުގެ ސެޓްފިކެޓް ލެލެވެލް 3 ގެ ކޯސްވެސް ކުރިއަށް ގެންދާނެ ކަމަށެވެ.
އަރީފް އިތުރަށް ވިދާޅުވީ ތުއްތު ކުދިންނަށް ގުރުއާން ކިޔަވައި ދިނުމުގެ ހާއްސަ ކުލާސްތަކެއް ހިންގާނެ ކަމަށާއި އެގޮތުން 3 އަހަރުން މަތީގެ ކުދިންނަށް މަހަކު 200 ރުފިޔާއަށް ގުރުއާން ކިޔަވައި ދިނުމުގެ ކުލާސްތަކެއްވެސް ކުރިއަށް ގެންދާ ކަމަށެވެ. އަދި ބޮޑެތި މީހުނަށް މަހަކު 500 ރުފިޔާ އަށް ގުރުއާން ކިޔަވައި ދިނުމުގެ ކުލާސްތައް ކުރިއަށް ގެންދާނެ ކަމަށެވެ.
“ފުރަތަމަ މަރުހަލާގެ ތަޖުވީދުގެ މަގުން ކިޔަވަން ދަސްކޮށްދިނުމާއި، ދެވަނަ މަރުހަލާގައި ހާފިޒުންގެ އެހީގައި ގުރުއާން ހިތުދަސްކޮށްދިނުން ހިމެނޭ، އަދި ހިތުދަސްކޮށްދޭ ކުލާސްތަކުގައި އޯޑިއޯ ވީޑިއޯ އަދި އެންމެ ޒަމާނީ އާލާތްތައް ބޭނުން ކުރާނެ” އަރީފް ވިދާޅުވިއެވެ.
މިކެމްޕަހުން ހިންގާ ކޯސްތަކުގައި ކިޔަވައިދޭނީ ގުރުއާން ކިޔަވައި ދިނުމުގެ ތަޖުރިބާ އާއި އިލްމު ލިބިފައިވާ ފަރާތްތަކުން ކަމަށްވެސް އައި ކިއު އެސް އިން ވިދާޅުވިއެވެ. ކޯސްތަކާއި ބެހޭ އިތުރު މައުލޫމާތު 7773894 އިން ލިބޭނެއެވެ. އަދި މިކެމްޕަސް ހުންނަނީ މާދަޑު ދޫނޑޭރެ ގައެވެ.
ޚިޔާލުތައް