މުހައްމަދު ޝިހާބް ކުޅުދުއްފުށީގައި މިއަދު ހަވީރު ނިމުނު 9 ވަނަ މަކިޓާ އިންޓަރ ސްކޫލް އެތްލެޓިކްސް މުބާރާތުގައި ބައިވެރިވި އެމްޖޭއެމް ޓީމުން ރަގަޅު ކާމިޔާބީއެއް ހޯދައިފިއެވެ. އެމްޖޭއެމް ޓީމުން ވަނީ އެ ސްކޫލުން ބައިވެރިވި 13 އަހަރުން ދަށުގެ ފިރިހެން ކުދިންގެ ބައިން 1ވަނަ ހާސިކޮށްފައެވެ. އަދި އެސްކޫލުގެ ދަރިވަރު ޝިނާޒު މުޙައްމަދު ވަނީ 13 އަހަރުން ދަށުގެ އެންމެ މޮޅު ފިރިހެން އެތްލީޓްގެ މަގާމުވެސް ހާސިލުކޮށްފައެވެ.
ކުޅުދުއްފުށީގައި ހުންނަވައި މިކަލް ނޫހަށް މައުލޫމާތު ދެއްވަމުން އެމްޖޭއެމްގެ ކޯޗު އަދި ކުރީގެ ގައުމީ އެތްލެޓް އަލީ ޝަރީފު ހާމަކުރެއްވީ، އެޓީމުން ބައިވެރިވި އެތްލީޓުންނަށް ބަލާއިރު ރަނގަޅު ކާމިޔާބެއް ހާސިލުކުރެވިފައިވާ ކަމަށެވެ. އެގޮތުން އެޓީމުން ވަނީ 100 މީޓަރު ދުވުމުން ރަން މެޑެލް އަދި ރިހި މެޑެލް، 200 މީޓަރު ދުވުމުން ވެސް ރަން މެޑެލް އަދި ރިހިމެޑެލް އަދި 80 މީޓަރު ދުވުމުން 1 ރަންމެޑެލް ހޯދާފައެވެ. މީގެ އިތުރުން ފިރިހެން ކުދިންގެ 4*100 މީޓަރު ރިލޭއާއި 8*80 މީޓަރު ރިލޭއިން ފިރިހެން ކުދިންގެ ޓީމުން ރަން މެޑެލް ހޯދިއެވެ.
އަންހެން ކުދިންގެ ޓީމުން ވަނީ 4*100 މީޓަރު ރިލޭއިން 2 ވަނަ އަދި 8*80 މީޓަރު ރިލޭއިން 1 ވަނަ ހޯދާފައެވެ. މީގެ އިތުރުން 200 މީޓަރު ދުވުމުން ރިހިމެޑެލް، 80 މީޓަރު ދުވުމުން 3 ވަނަ، ހާޑްބޯލް ތްރޯއިން ރިހި މެޑެލް އަދި ލޯންގް ޖަމްޕުއިން ރިހިމެޑެލް ހޯދާފައި ވެއެވެ. މި އުމުރު ފުރާގައި 9 ޓީމުން ބައިވެރިވި އިރު އެމްޖޭއެމްގެ އަންހެން ޓީމުން ވަނީ 4 ވަނަ ހޯދާފައެވެ.
މުބާރާތުގެ 13 އަހަރުން ދަށުގެ އެންމެ މޮޅު އެތްލީޓަކަށް ހޮވުނު އެސްކޫލުގެ ޝިނާޒު އޭނާ ވާދަކުރި 80 މީޓަރު 100 މީޓަރު، އަދި 200 މީޓަރު ދުވުމުން ރަން މެޑެލް ހޯދިއެވެ.
ކޯޗް އަލީ ޝަރީފު ހާމަކުރެއްވި ގޮތުގައި މުޅި މުބާރާތުގެ އިންތިޒާމުތައް ވަރަށް ފުރިހަމައެވެ. އަދި ކުޅުދުއްފުށިން އެެޓީމަށް ވަރަށް ފުރިހަމައަށް އެހީތެރިކަމެއް ލިބުނުކަން ފާހަނގަ ކުރެއްވިއެވެ.
މިފަހަރުގެ މުބާރާތުގައި ފުވައްމުލަކުން ބައިވެރިވި ޓީމުތަކުން ވަނީ ރަނގަޅު ކާމީޔާބީއެއް ހޯދާފައި ކަމަށް މިކަލް ނޫހަށް މައުލޫތު ލިބެއެވެ. އެގޮތުން ޏ.އޭއީސީގެ ފިރިހެން އެތްލީޓް ޝަޒީމު ވަނީ ފިރިހެން ކުދިންގެ މުޅި މުބާރާތުގެ ބެސްޓް އެތްލީޓްގެ މަގާމު ހާސިލުކޮށްފައެވެ.
ޚިޔާލުތައް