މުހައްމަދު ޝިހާބް މިހާރު ފުވައްމުލަކުގައި ކުރިޔަށްދާ މިއަހަރުގެ ޤައުމީ އެންޓި-ކޮރަޕްޝަން ދުވަސް ފާހަގަކުރުމުގެ ހަރަކާތްތަކުގެ ތެރެއިން ސަރުކާރު ހިއްސާވާ ކުންފުނިތަކާއި އަމިއްލަ ޖަމްއިއްޔާތަކުގެ މުވައްޒަފުންނަށާއި މެމްބަރުން ހޭލުންތެރިކުރުވުމުގެ ތަފާތު ދެ ޕްރޮގްރާމެއް އިއްޔެ ކުރިޔަށް ގެންގޮސްފިއެވެ. ކޮރަޕްޝަން ހުއްޓުވުމާއި ގުޅޭގޮތުން ކުރެވޭ އަދި ކުރެވެން ހުރި ކަންތައްތަކާއި ބެހޭގޮތުން މިދެ ޕްރޮގްރާމުގައި ވެސް ބައިވެރިންނަށް އޭސީސީން މަޢުލޫމާތު ދީފައި ވެއެވެ.
މީގެ އިތުރުން ދައުލަތު ޕްރޮކިޔުމެންޓްގެ މަސައްކަތް ރަގަޅުގޮތުގައި ކުރަން ދަސްކޮށްދިނުމާއި ގުޅޭ މައުލޫމާތު ސަރުކާރު ހިއްސާވާ ކުންފުނިތަކުގެ މުވައްޒަފުންނަށް ދީފައިވާކަމަށް އޭސީސިން ހާމަކުރެއެވެ.
އިއްޔެގެ މިހަރަކާތުގައި ބައިވެރިވެފައިވާ ސަރުކާރު ހިއްސާވާ ކުންފުނިތަކާއި އޮފީސް ތަކުގެ ތެރޭގައި ފުވައްމުލަކުގައި ޤާއިމްވެފައިވާ މޯލްޑިވްސް ރޯޑް ޑިވެލޮޕްމެންޓް ކޯޕަރޭޝަން (އެމް.އާރު.ޑީ.ސީ) އާއި، އެސް.ޓީ.އޯ އާއި، ދިރާގާއި، ބޭންކް އޮފް މޯލްޑިވްސް އާއި، ފެނަކަ ކޯޕަރޭޝަނުގެ މުވައްޒަފުން ހިމެނެއެވެ.
އަމިއްލަ ޖަމްއިއްޔާ ތަކުގެ މެމްބަރުންނާއި ރަށުގެ ޒުވާނުންނަށް އަމާޒުކޮށްގެން ރޭ ކުރުނދުމާ މާލަމުގައި ކުރިޔަށް ގެންދިޔަ މިޕްރޮގްރާމުގައި މައުލޫމާތު ދެއްވީ އެންޓި-ކޮރަޕްޝަނުގެ ކޮމިޝަނުގެ (އޭސސީސީ ގެ) މުވައްޒަފުން ނެވެ.
މިސެޝަންތަކުގައި ނަޒާހަތްތެރިކަމުގެ މާނައާއި، މުހިންމުކަމާއި، އެންޓި-ކޮރަޕްޝަން ކޮމިޝަނުގެ ދައުރާއި، ރާއްޖޭގައި ކޮރަޕްޝަނުގެ ޙާލަތާއި، ކޮރަޕްޝަނުގެ އާންމު މާނައާއި، ކޮރަޕްޝަނުގެ ކުށްތަކާއި، ކޮރަޕްޝަނާއި ދެކޮޅަށް މަސައްކަތް ކުރުމަށް ރޭވިފައިވާ ނިޒާމާއި، ކޮރަޕްޝަން ހުއްޓުވުމާއި ގުޅޭގޮތުން މަޢުލޫމާތު ފޯރުކޮށްދީފައި ވެއެވެ.
މީގެ އިތުރުން ކޮރަޕްޝަން ހުއްޓުވުމާއި ކޮރަޕްޓްވިޔަ ނުދިނުމަށް ފަރުދީ ގޮތުންނާއި އިޖްތިމާޢީ ގޮތުން ކުރެވޭނެ ކަންތައްތަކާ ގުޅޭގޮތުން މަޢުލޫމާތު ފޯރުކޮށްދީފައިވާ ކަމަށް އޭސީސީން ހާމަކުރެއެވެ.
އެއްހަފުތާގެ މުއްދަތަށް ފުވައްމުލަކުގައި ފާހަނގަކުރާ ގައުމީ އެންޓިކަރަޕްޝަން ދުވަސް ފާހަނގަ ކުރުމުގެ ގޮތުން ވަރަށް ގިނަ ހަރަކާތްތަކެއް ވަނީ ރޭވިފައެވެ. ގައުމީ އެންޓި ކަރަޕްޝަން ދުވަހުގެ ގޮތުގައި ފާހަނގަ ކުރަނީ 21 އޭޕްރީލް އެވެ. އެދުވަހުގެ ޚާއްސަ ޖަލްސާ ބޭއްވުމަށް ހަމަޖެހިފައި ވަނީ ޏ. އަތޮޅު ތައުލީމީ މަރުކަޒުގެ ހޯލުގައެވެ.
ޚިޔާލުތައް