މުހައްމަދު ޝިހާބް ދިވެހި ރެޑް ކްރެސެންޓުގެ ގަވަރނިން ބޯޑުގެ ފުރަތަމަ ނައިބު ރައީސްގެ މަޤާމަށް މިކަލް ނޫހުގެ އެޑިޓަރ އަދި ފުވައްމުލަކުގެ ދަރުމަވެރިއެއް ކަމަށްވާ އަޙްމަދު ނިޖާހް ހޮވިއްޖެއެވެ. ނިޖާހު މިމަގާމަށް ހޮވިފައިވަނީ އިއްޔެ މާލޭގައި ބޭއްވުނު ދިވެހި ރެޑް ކްރެސެންޓުގެ 8 ވަނަ އާންމު ޖަލްސާގައި ނެގި ވޯޓުންނެވެ. ގަވަނިންގ ބޯޑްގެ މަގާމްތަކަށް ވޯޓްލެވެނީ ރާއްޖޭގެ އެކި ސަރަހައްދުތަކެއްގައި ގާއިމްކޮށްފައިވާ އެޖަމާއަތުގެ ގޮފިތައް ތަމްސީލްކުރުމަށް އަހަރީ އާންމު ޖަލްސާގައި ބައިވެރިވާ މެމްބަރުންނެވެ. އެގޮތުން މިއަހަރު 68 މެމްބަރުން ބައިވެރިވެފައިވެއެވެ. މިޖަލްސާގައި ދިވެހި ރެޑް ކްރެސެންޓް ގަވަނިންގ ބޯޑްގެ ފަސް މެމްބަރަކު އިންތިހާބުކޮށްފައިވެއެވެ. އެއީ ފުރަތަމަ ނައިބް ރައީސްގެ އިތުރުން ދެވަނަ ނައިބް ރައިސް އާއި ޓްރޝަރަރ، ޔޫތު މެމްބަރު އަދި ދެކުނު ސަރަހައްދު ތަމްސީލްކުރުމަށް ދެ މެމްބަރުންނެވެ.
ދިވެހި ރެޑްކްރެސެންޓްގައި ނިޖާހު ވަނީ މީގެ ކުރިން 2 ވަނަ ނާއިބު ރައީސްގެ މަގާމު ވެސް ފުރުއްވާފައެވެ. މީގެ އިތުރުން ނިޖާހު ވަނީ ދިވެހި ރެޑް ކްރެސެންޓުގެ ފުވައްމުލަކު ގޮފީގެ ޗެއަރޕާސަންގެ މަގާމް ހަތަރު އަހަރު އަދާކޮށްފައެވެ.
ދިވެހި ރެޑްކްރެސެންޓްގެ ރައީސަކީ އަލީ ނާޝީދު އެވެ. އެ ޖަމާއަތުގެ ރާއްޖޭގެ އެކި ކަންކޮޅުގައި 10 ބުރާންޗާއި 20 ގޮފި އުފެދިފައިވެއެވެ. އަދި ގަވާނިންގ ބޯޑްގައި 11 މެމްބަރުން ތިއްބަވައެވެ. 4000 އަށް ވުރެ ގިނަ ދަރުމަވެރިން މިހާތަނަށް އެޖަމާއަތުގައި ރަޖިސްޓްރީކުރެވިގެން ދަރުމަވެރިންގެ ގޮތުގައި ހަރަކާތްތެރިވަމުން ދެއެވެ.
ޚިޔާލުތައް