މުހައްމަދު ޝިހާބް ފުލުހުން ހޯދުމަށް އިއުލާން ކުރި ފުނާޑު އަވަށު މެރީނާ، ޙުސައިން ޢަލީ ދީދީ (ފެމިކޮމް ހުސޭން) 54އ އަކީ ފިލައިގެން އުޅޭ މީހެއް ނޫންކަމަށާއި އޭނާ ހޯދަން އެއްވެސް ފަރާތަކުން އޭނާ ދިރިއުޅެ ގެއަށް އައިސް އަދި ތިމާގެ މީހަކު ގާތުގައި އަހާފައި ވެސް ނުވާކަމަށް ފެމިކޮމް ހޫސޭނު އޭނާގެ ފޭސްބުކް ސްޓޭޓަސް ގައި އާއްމުކޮށް ފިއެވެ. ހުސޭން މިގޮތަށް އާއްމުކުރީ އޭނާ ރާއްޖެއިން ބޭރުގައި ހުރެފައި މާލެ އައިތަނުން އޮންލައިން ނޫސްތަކުގައި އޭނާގެ ފޮޓޯ އާއެކު ހޯދާ މީހެއްގެ ގޮތުންގައި އިއުލާން ކޮށްފައިވާ ތަން ފެނުމުންނެވެ.
ފުލުހުން ހާމަކުރައްވާފައި ވަނީ، ފުލުހުންގެ ޖެނެރަލް އިންވެސްޓިގޭޝަން ޑިޕާޓްމަންޓުން ތަހުގީގު ކުރަމުންދާ މައްސަލައަކާ ގުޅިގެން މިހާތަނަށް ފުލުހުން ކުރި މަސައްކަތުން އުޅޭ ވަކިތަނެއް ނޭނގުމުގެ ސަބަބުން ޙުސައިން ޢަލިދީދީ (ފެމިކޮމް ހުސޭނު) ހޯދަން ބޭނުންވެ ހޯދައި ނުފެނިފައިވާ ކަމަށެވެ.
ނަމަވެސް ހުސޭން އާއްމު ކުރައްވާފައި ވަނީ “މަ މީ ފިލައިގެން އުޅޭ މީހެއް ނޫން. މަ ހޯދަން އެއްވެސް ފަރާތަކުން މަ އުޅޭ ގެއަކަށް ނާދޭ” ކަމަށެވެ. އަދި އޭނާ ރާއްޖެއިން ބޭރުގައި 28 ދުވަހު ހުރެފައި މާލެ އައި ތަނުން ހޯދުމަށް އިއުލާން ކޮށްފައި ވުމުން ވަރަށް ހައިރާން ވިކަމަށެވެ.
މިހާރު އޭނާ ފުލުހުންނަށް ގުޅާފައި ވާކަމަށާއި މައްސަލަ ސާފުވެއްޖެ ކަމަށް ބުނެފައި ވެއެވެ. މައްސަލައަކީ މާލޭގައި އޭނާ ދިގުމުއްދަތަކަށް ކުއްޔަށް ހިފައިގެން 5 ބުރިއަށް ހެދި އިމާރާތުން އޭނާއަށް ދީފައިވާ ބައި، މުއްދަތު ހަމަނުވަނީސް އިމާރާތުގެ ވެރިފަރާތުން ނަގަން ވެގެން ހުށަހަޅާފައިވާ މައްސަލއެއް ކަމަށް ވެއެވެ.
ހުސޭން އަކީ ފުވައްމުލަކުގައި ވެސް މަޝްހޫރު އާރކިޓެކްޗަރަލް ޑިޒައިނަރެކެވެ. ފުވައްމުލަކު ބަނދަރު ހުޅުވުމުގެ ރަސްމިއްޔާތަށް (2004 ގައި) ތައްޔާރު ކުރެވުނު ފޭލިގެ އާއި ބަންޑާރަ ކިޅީގައި އެއިރު ހެދި ހަޓްގެ އާކްޓެކްޗަރަލް ޑިޒައިނަރަކީ ހުސޭން އެވެ. މިދެތަނަކީ ވެސް އެއިރުގެ ގިނަބައެއްގެ މެދުގައި މަގުބޫލުވެގެން ދިޔަ ވަރަށް ތަފާތު ދެތަނެވެ.
ހުސައިން ހޯދަން އިއުލާން ކުރީ އޭނާގެ އާއިލީ ތިމާގެ މީހުން ގާތުން ޚަބަރެއް ދަބަރެއް ވެސް އަހާނުލައި ނިކަމެތިންނަށް ދެރަގޮތް، ބޮޑެތި މީހުންނަށް މޮޅު ގޮތް ހެދުމަށް، ގެންގުޅޭ ނާއިންސާފުން ކަމަށް ބައެއް ފަރާތްތަކުން ހާމަކުރެއެވެ. އަދި އެގޮތަށް ކަންތައް ނުކުރުމަށް އެދިފައިވެއެވެ.
ޚިޔާލުތައް