ފުވައްމުލަކަށް ކަނޑައެޅުނު އެންމެ ބޮޑު ބަޖެޓާއިއެކު ފުވައްމުލަކަށް ގިނަ ކުރިއެރުން ތަކެއް ލިބިގެންދާނެ – އެމްޕީ ހުސޭން

ކުރިޔަށް އޮތް 2020 ވަނަ އަހަރަށް ދައުލަތުން ކަނޑައެލި ބަޖެޓަކީ ފުވައްމުލަކުގެ ތާރީޚުގައި މިހާތަނަށް ފުވައްމުލަކަށް ކަނޑައެޅުނު އެންމެ ބޮޑު ބަޖެޓު ކަމަށް ފުވައްމުލަކު މެދު ދާއިރާގެ ރައްޔިތުންގެ މަޖުލިސް މެމްބަރު ހުސޭން މުޙައްމަދު ދީދީ ވިދާޅުވެއްޖެއެވެ.

ފުވައްމުލައް ސިޓީއަށް ކަނޑައެޅުނު ބަޖެޓާއެކު 2020 ވަނަ އަހަރު ވެގެންދާނީ ފުވައްމުލަކަށް ގިނަ ކުރިއެރުން ތަކެއް ލިބިގެންދާނެ އަހަރަކަށް ކަމަށް ވެސް އެމްޕީ ހުސޭން އޭނާގެ ފޭސްބުކް ޕޭޖްގައި ހާމަކުރައްވާފައި ވެއެވެ.

ހުސޭން ހާމަކުރައްވާފައިވާ މައުލޫމާތުތަކުން އެގޭ ގޮތުގައި ކުރިޔަށް އޮތް 2020 ވަނަ އަހަރަށް ފުވައްމުލައް ސިޓީ އަށް ޕީއެސްއައިޕީގެ ދަށުން ޖުމްލަ 246111515 (ދުއިސައްތަ ސާޅީސް ހައެއް މިލިޔަން ރުފިޔާ) ގެ ބަޖެޓެއް ކަނޑައަޅާފައި ވެއެވެ.

އެމްޮީ ހުސޭން މަޖުލީހުގައި ކުރައްވާ މަސައްކަތުގެ މައުލޫމާތު ރައްޔިތުންނަށް ހާމަކުރައްވަމުން ގެންދަވާ!

އެގޮތުން ފުވައްމުލައް ސިޓީގެ ބަޖެޓަށް ކަނޑައަޅާފައިވާ ފައިސާ ލިބޭނެކަމަށް ބަލާފައިވާ ގޮތްތަކަކީ:

ޑޮމެސްޓިކް ބަޖެޓްގެ ގޮތުގައި 163724710 ރުފިޔާ (ސަތޭކަ ފަސްދޮޅޮސް ތިން މިލިޔަން ހަތްސަތޭކަ ސައުވީސް ހާސް ހަތްސަތޭކަ ދިހައެއް)

ލޯންގެ ގޮތުގައި 60896918 ރުފިޔާ (ފަސްދޮޅޮސް މިލިޔަން އަށްސަތޭކަ ނުވަދިހަ ހަ ހާސް ނުވަސަތޭކަ އަށާރަ)

ހިލޭ އެހީގެ ގޮތުގައި 11531889 ރުފިޔާ (އެގާރަ މިލިޔަން ފަސްސަތޭކަ އެއްތިރީސް ހާސް އަށްސަތޭކަ އަށްޑިހަ ނުވައެއް)

ޓްރަސްޓް ފަންޑްގެ ގޮތުގައި 9957988 ރުފިޔާ (ނުވަ މިލިޔަން ނުވަސަތޭކަ ފަންސާސް ހަތް ހާސް ނުވަސަތޭކަ އަސްޑިހަ އަށެއް)

މިފައިސާތައް ޚަރަދު ކުރުމަށް ކަނޑައަޅާފައިވާ ދާއިރާތަކަކީ:

ތައުލީމީ ދާއިރާއަށް 30.6 މިލިޔަން

ކުޅިވަރުގެ ކަންކަމަށް 19.1 މިލިޔަން

ހައުސިން 13.1 މިލިޔަން

ހެލްތު (ސިއްހީކަންކަމަށް) 8.2 މިލިޔަން

ޕްލޭނިން އަށް 167.2 މިލިޔަން

ޖުމްލަ 246.1 މިލޔަން ރުފިޔާއެވެ.

އެކި ދާއިރާތަކުން މި ބަޖެޓް ތަންފީޒު ކުރުވުމަށް ސަރުކާރަށް ދޭންޖެހޭ އެންމެހާ އެއްބާރުލުމެއް ދެއްވާނެ ކަމަށާއި އަދި މިބަޖެޓް ތަންފީޒު ކުރެވޭތޯ ފާރަވެރިވުމުގައި ދެމި ހުންނަވާނެ ކަމުގެ ޔަގީންކަން އެމްޕީ ހުސޭން ރައްޔިތުންނަށް ދެއްވާފައި ވެއެވެ. އެއާއެކު މި ސަރުކާރުން ފުވައްމުލަކުގެ ތަރައްޤީ އަށް ދެއްވާ އަހަންމިއްޔަތަށް ޝުކުރު ދަންނަވާފައި ވެއެވެ.

ދައުލަތުގެ ބަޖެޓް 2020

ބަޖެޓުގައި އަދަދުތަކެއް ހުއްޓަސް އެއީ އަދި މުޅިން ޔަގީން ކަމާއެކު ތަންފީޒު ނުވެ ހިގައިދާނެ ބަޖެޓެކެވެ. އެއީ ބަޖެޓުގައި އާމްދަނީ ލިބޭނެ ކަމަށް ކަނޑައަޅާފައިވާ މިންވަރަށް ނުލިބުމަކީ ވެސް އެކަށީގެންވާ ކަމެކެވެ. ނަމަވެސް ބަޖެޓްގައި ހިމަނާ ކަންތައްތަކަކީ އެކިގޮތްގޮތުން ހިސާބު ޖަހައި ކުރެވޭނެކަމަށް ބެލެވިގެން ޖަހާފައިވާ ކަންކަމެވެ.

ދެން އޮތީ އެމްޕީންނާއި ސިޓީ އޮފިޝަލުން އެކަމަށް މަސައްކަތް ކުރުމާއި ފާރަވެރިވުމެވެ. އެކަން ތަންފީޒުކުރުމަށް މަގުފަހިކޮށް ދިނުމެވެ.