މުހައްމަދު ޝިހާބް ފުވައްމުލަކު ސިޓީ ކައުންސިލުން ފުވައްމުލަކުގެ ރައްޔިތުންގެ އާއްމު ބައްދަލުވުމަކަށް ހުޅުވާލައިފިއެވެ. މިބައްދަލުވުން ބެއްވުމަށް ހަމަޖެހިފައި ވަނީ މިރޭ، 5 ޖެނުއަރީ 2020 ވާ އާދީއްތަ ދުވަހުގެ ރޭ، 8:30ގައި ފުވައްމުލަކު ސިޓީ ކައުންސިލުގެ ކުރުދުމާ މާލަމުގައިއެވެ.
މިބައްދަލުވުމުގެ ބޭނުމަކީ ފުވައްމުލަކު ސިޓީ ކައުންސިލުގެ، މިއަހަރުގެ (2020 ވަނަ އަހަރުގެ) މަސައްކަތު ތާވަލާއި ބަޖެޓު އެކުލަވާލުމުގެ ގޮތުން ރައްޔިތުންނާއެކު ބާއްވާ މަޝްވަރާ ބައްދަލުވުމެއް ކަމަށް ސިޓީ ކައުންސިލުން ހާމަކުރެއެވެ.
ލާމަރުކަޒީ ގާނޫނުގެ 110 ވަނަ މާއްދާގައި ބުނާގޮތުން ސިޓީ ކައުންސިލުން ރައްޔިތުންނާއެކު ބާއްވަން ޖެހޭ އާއްމު ބައްދަލުވުން (އަހަރަކު ދެފަހަރު ފެބްރުއަރީ އަދި ޖުލައި) ބާއްވަން ޖެހެއެވެ. އަދި އެބައްދަލުވުންތައް ބޭއްވުމުގެ 7 ދުވަސް ކުރިން ނޯޓިސް ނެރެން ޖެހެއެވެ. މިފަހަރުގެ ނޯޓިސް އާއްމު ކުރެވިފައި ވަނީ 6 ދުވަސް ކުރިން (30 ޑިސެމްބަރު 2019ގައި) ނެވެ. ސިޓީ ކައުންސިލުން ނެރޭ ނޯޓިސްތަކުގައި ބައެއްފަހަރު ނޯޓިސް ނެރޭ ތާރީޚު ލިޔެފައި ނުހުންނަކަން ފާހަގަ ކުރެވެއެވެ.
ކޮންމެ އަހަރަކު ދެ ފަހަރު ބޭއްވުމަށް ގާނޫނުން ލާޒިމުކުރާ ފެބުރުއަރީ އަދި ޖުލައި މަހުގެ ބައްދަލުވުމުގެ ނޯޓިސް އާއި އެ ބައްދަލުވުމުގައި ރައްޔިތުންނާއި މަޝްވަރާ ކުރުމަށް ކަނޑައަޅާފައިވާ ފާއިތުވި އަހަރު ސިޓީ ކައުންސިލް ހިންގި ގޮތުގެ އަހަރީ ރިޕޯރޓާއި މާލީ ރިޕޯރޓް އަދި އޯޑިޓް ރިޕޯރޓް ވެސް ބައްދަލުވުމުގެ 7 ދުވަސް ކުރިން އާއްމު ކުރަން ޖެހެއެވެ.
ޖުލައި މަހުގެ ބައްދަލުވުމުގައި ކުރަން ޖެހޭކަމަށް ލާމަރުކަޒީ ގާނޫނުގެ 110 ވަނަ މާއްދާގައި ބުނަނީ:
“އަދި ޖުލައި މަހުގެ ބައްދަލުވުމުގައި ބާއްވާ އާއްމު ބައްދަލުވުމުގައި ކައުންސިލްގެ ކުރިޔަށް އޮތް އަހަރުގެ މަސައްކަތު ތާވަލާއި ބަޖެޓް ރައްޔިތުންނަށް ހުށަހަޅައި ޚިޔާލު ހޯދަން ވާނެއެވެ.”
ލާމަރުކަޒީ ގާނޫނުގެ 110 ވަނަ މާއްދާ
މިމާއްދާގައި އިތުރަށް ބުނެފައި ވަނީ “މީގެ އިތުރުން ތަރައްގީގެ ޕްލޭނަށް އަމަލީ ސިފަ އަންނަމުންދާ ގޮތުގެ މައުލޫމާތު މަދުވެގެން ދެ މަހުން އެއްމަހު ކައުންސިލުން އާއްމުކޮށް ހާމަކުރަން ވާނެއެވެ”.
މިރޭ ބައްވާ ބައްދަލުވުމަކީ ގާނޫނުގައި ކަނޑައަޅާ ބައްދަލުވުމެއް ނޫންކަމަށް ބެލެވެނީ ފާއިތުވި ޖުލައި މަހުގައި ސިޓީ ކައުންސިލްގެ އަހަރީ 2 ވަނަ އާއްމު ބައްދަލުވުން ބާއްވާފައި ވާތީއެވެ.
ނަމަވެސް މިރޭގެ ބައްދަލުވުމުގައި ކުރުމަށް ކަނޑައަޅާ އިއުލާން ކުރެވިފައި ވަނީ ގާނޫނުގައި ބުނާ ޖުލައި މަހުގެ ބައްދަލުވުމުގައި ކުރަން ޖެހޭ ކަންކަމެވެ. ބެލެވޭ ގޮތުން މިއީ ކުރީގެ ބައްދަލުވުމުގެ މަޝްވަރާގެ އަށްފަހު ގެނެވުނުނު އިސްލާހުތަކާއެކު 2 ވަނަ ފަހަރަށްް ރައްޔިތުންގެ މަޝްވަރާއަށް ހުށަހަޅާނީ ކަމަށެވެ.
ފުވައްމުލައް ސިޓީ ކައުންސިލްގެ ފާއިތުވި އަހަރު ތަރައްގީގެ ޕްލޭނަށް އަމަލީ ސިފަ އަންނަމުންދާ ގޮތުގެ މައުލޫމާތު ހިއްސާކުރަމުން އައިސްފައި ވެއެވެ. އެގޮތުން ހިއްސާ ކުރި މައުލޫމާތުތަކުން އާއްމުން އެކަން ބަލައިގަތްކަން ސޯޝަލް މީޑިއާ ކޮމެންޓްތަކުން ހާމަވެއެވެ.
ފާއިތުވި 2019 ވަނަ އަހަރު ޖެނުއަރީ މަހު ލޯކަލް ގަވަރމެންޓް އޮތޯރިޓީން ކަނޑައެޅި ‘ޓައުންހޯލް ބައްދަލުވުން’ އުސޫލުގައިވާ ގޮތުން ކައުންސިލްތަކުގެ އިޚްތިސާސްގައި ހިމެނޭ ކަންކަމާ ގުޅޭގޮތުން އެކައުންސިލެއް ހިމެނޭ ދާއިރައެއްގައި ދިރިއުޅޭ މީހުންގެ 100 މީހުން ނުވަތަ %20 މީހުން އަށްވުރެ ގިނަ މީހުން އެދިއްޖެ ހާލަތެއްގައި ގިނަވެގެން 30 ދުވަހުގެ ތެރޭގައި އާއްމުކޮށް ހުޅުވާލައިގެން މަޝްވަރާގެ ބައްދަލުވުމެއް ބާއްވަން ޖެހޭއެވެ. މިއީ ސިޓީ ކައުންސިލްގެ މިއުސޫލުގެ ދަށުން ރައްޔިތުންނަށް ދާއިރާއިރާގެ ކަންކަމާއި ގުޅޭގޮތުން ކައުންސިލްތަކާ މަޝްވަރާކުރެވޭނެ މަގު ވަނީ ފަހިވެފައެވެ. ނަމަވެސް މިހާތަނަށް ފުވައްމުލައް ސިޓީގައި މިފަދަ ގޮތަކަށް ބައްދަލުުވުމެއް ބޭއްވިކަން އެނގޭކަށް ނެތެވެ.
ޓައުން ހޯލު ބައްދަލުވުމުގެ އުސޫލު ފާސްކުރުމުގެ ކުރިން ވެސް ފުވައްމުލައް ސިޓީ ކައުންސިލުން އެސިޓީގެ އެކިފަރާތްތަކާއެކު ތަފާތު ބައްދަލުވުންތައް ބާއްވަމުން ގޮސްފައިވެއެވެ. އެގޮތުން ފުވައްމުލަކު ގެ މަސްވެރިންނާއި ބައްދަލުކުރުމާއި، ފުވައްމުލަކުގައި ޓްވަރިޒަމްގެ ދާއިރާގައި ހަރަކާތްތެރިވާ ފަރާތްތަކާއި، ސްކޫލްތަކުގެ ބެލެނިވެރިންނާއި ސްކޫލްތަކުގެ އިސްފަރާތްތަކާއި އަދި މިނޫންވެސް ތަފާތު ފަރާތްތަކެގެ މަޝްވަރާ ބައްދަލުވުންތައް ބާއްވަމުން އައިސްފައި ވެއެވެ.
ސިޓީ ކައުންސިލުން ރައްޔިތުންނާއި ބައްދަލުވުން ބާއްވާއިރު ކުރިއަށް އޮތް ދުވަސްތައް ވެގެންދާނީ ސިޓީ ކައުންސިލަށް އަލަށް އިންތިޚާބުކުރާ ކައުންސިލް މެންބަރުންގެ ކެމްޕޭނެ އެންމެ ފޯރިއާއިއެކު ކުރިއަށްދާ ދުވަސްތަކަކަށެވެ. އެޕްރީލް މަހު 4 ގައި ބޭއްވޭ ކައުންސިލް އިންތިޚާބަށް ގިނަ ބަޔަކު ދަނީ ޝައުގުވެރިކަން ފާޅުކުރަމުންނެވެ. އެގޮތުންމިހާރު ކައުންސިލް މެންބަރުންގެ ގޮތުގައި ތިއްބެވި ފަރާތްތައްވެސް ކުރިޔަށް އޮތް ކައުންސިލް އިންތިޚާބުގަިއ ވާދަކުރައްވާނެކަން ވަނީ އިއުލާން ކުރައްވާފައެވެ.
ނަމަވެސް ފުވައްމުލައް ސިޓީ އުތުރު ދާއިރާގެ މިހާރުގެ ސިޓީ ކައުންސިލް މެމްބަރު އަދި ރަސްމީކޮށް އިންތިޚާބުގައި ވާދަކުރައްވާ ކަން ހާމަކުރައްވާފައެއް ނުވެއެވެ.
2019 ވަނަ އަހަރުގެ 2 ވަނަ އާއްމު ބައްދަލުވުމުގެ ނޯޓިސް
ޚިޔާލުތައް
އިންތިޚާބެއް ކައިރިވީމާ އިބިލީހު ހާދަ ހީވާގި ވެއްޖެހެން ހީވެއޭ. މިފަހަރު ތިޔަ ކައުންސިލްރުން ބަދަލު ނުކުރެވިއްޖެނަމަ މުޅި މިފުވައްމުލައް ތާއަބަދަށް ރޯންޖެހޭވަރު ކުރާނެ.