އިބްރާހިމް ލަތީފް ދުނިޔޭގެ އެންމެ މުއްސަދި ފުޓުބޯޅަ ކުޅުންތެރިއޭ ބުނުމުން ފުރަތަމަވެސް އަންނާނީ މެސީ ނޫނީ ރޮނާލްޑޯފަދަ ނަން މަޝްހޫރު ކުޅުންތެރިއެއްގެ ނަމެވެ. ނަމަވެސް، ދުނިޔޭގެ އެންމެ މުއްސަދި ފުޓުބޯޅަ ކުޅުންތެރިއެއްގެ ގޮތުގައި، ކުޅިވަރު ޚަބަރު ގެނެސްދޭ ގޯލް.ކޮމް އިން ތައާރަފުކޮށްދީފައިވަނީ ލެސްޓާސިޓީގެ ރިޒާވު ޓީމުގައި ހިމެނޭ ފާރިގު ބުލްކިޔާއެވެ. ދުވަހަކުވެސް ޕްރޮފެޝަނަލް ފުޓްބޯޅަ މެޗެއް ޕްރޮފެޝަނަލް ޓީމަކަށް ކުޅެދީފައިނުވާ ފާރިގު ދުނިޔޭގެ އެންމެ މުއްސަދި ކުޅުންތެރިޔާއަށްވީ ކިހިނެތްތޯއެވެ.
ތެލުގެ މުއްސަދިކަން ލިބިފައިވާ ބުރޫނާއީގެ ރަސްގެފާނު ހަސަނުލް ބުލްކިޔާއަށް ބޮޑުބޭބެ ވިދާޅުވާ ފާރިގު ބުލްކިޔާގެ މުއްސަދިކަން ވާރުތަވެފައިވަނީ އޭނާގެ ބައްޕަގެ ފަރާތުންނެވެ. މުއްސަދި ދިރިއުޅުއްވުމެއް އުޅުއްވާ ފާރިގުގެ ބައްޕައަކީ ގިނައިން ޚަރަދުކުރައްވާ ބޭފުޅެކެވެ. އެގޮތުން، އެންމެ މަހެއްގެ ތެރޭގައި 35 މިލިއަން ޕައުންޑް ކާރާއި، ގަޑިއާއި ގަލަމަށް ހޭދަކުރެއްވި ކަމަށް ޑެއިލީ މިރާގައި ރިޕޯޓުކޮށްފައިވެއެވެ. އޭގެ އިތުރުން، އޭނާގެ 50 ވަނަ އުފަންދުވަސް ފާހަގަކުރުމަށް 12.5 ބިލިއަން ޕައުންޑް ޚަރަދު ކުރައްވައިގެން ކުރީގެ ޕޮޕް ރަސްގެފާނު މައިކަލް ޖެކްސަންގެ ޝޯއެއް ބޭއްވިއެވެ. މީގެ އިތުރުން، ފާރިގު ބައްޕަ ޖެފުރީގެ މިލްކިއްޔާތުގައި އަގުބޮޑެތި 2،300 ކާރުވާކަމަށްވެސް މީޑިއާ ރިޕޯޓްތައް ބުނެއެވެ.
ލެސްޓާސިޓީގެ ރިޒާވު ޓީމުގައި ހިމެނުނު ނަމަވެސް އެއްވެސް ޕްރޮފެޝަނަލް މެޗެއް އެޓީމަށް ކުޅެދީފައިނުވާ 20 އަހަރުގެ ފާރިގުގެ މިލްކިއްޔާތުގައި 20 ބިލިއަން އެމެރިކާ ޑޮލަރު ހިމެނޭކަމަށް ޑެއިލީ މިރާއިން ރިޕޯޓުކުރެއެވެ.
ފުޓުބޯޅައަށް ހުރި ޝައުގުވެރިކަމެއްގެ ބޮޑުކަމުން ފުޓުބޯޅަ ކުޅެން ފެށި ފާރިގު ފުޓުބޯޅަ ޓްރެއިނިން ހަދަމުންދަނީ ފޮކްސް އެކަޑަމީއިންނެވެ. ލޮސްއެންގަލިސް އަށް އުފަން ބުރޫނާއީގެ ޝާހީ ޚާންދާނުގެ ފާރިގަށް އެމެރިކާގެ ޒުވާން ޓީމަށް ފުރުސަތު ލިބެން އޮތްނަމަވެސް، ފާރިގު ޚިޔާރުކުރީ ބުރޫނާއީގެ ގައުމީ ޓީމަށް ކުޅުމަށެވެ. ބުރޫނާއީގެ ގައުމީ ޓީމުގައި ހިމެނޭ ފާރިގު 2013 ވަނަ އަހަރު އިގިރޭސި އާސެނަލް ޔޫތު ޓީމުގެ ޓްރަޔަލް ފުރިހަމަ ކޮށް އާސެނަލްގެ އެކަޑަމީއިން ޓްރެއިނިންވަމުން ދިޔަ ދުވަސްވަރު ޗެލްސީގެ ޒުވާންޓީމަށް ބަދަލުވާން ފުރުސަތު ލިބުނެވެ. އެފުރުސަތާއިއެކު ޗެލްސީގައި އެއްއަހަރު ދުވަހު މަޑުކުރުމަށްފަހު ލެސްޓާ ސިޓީއާއި 2016 ވަނަ އަހަރު ފާރިގު ގުޅިފައިވަނީ ޗެލްސީއިން ޓީމަށް ކުޅެން އެކަށީގެންވާ ފުރުސަތުތަކެއް ނުލިބޭތީއެވެ. މިޑްފީލްޑަރެއްގެ ގޮތުގައި ދަޑުމަތީގައި ހަރަކާތްތެރިވާ ފާރިގު މިހާރުވެސް މަސައްކަތް ކުރަމުންދަނީ ލެސްޓާ ކުޅުންތެރިއެއްގެ ގޮތުގައެވެ.
ޚިޔާލުތައް