މުހައްމަދު ޝިހާބް ޓެކްނޮލޮޖީގެ ބޮޑުބާރެއް ކަމަށްވާ ގޫގުލްގެ ވީޑީއޯ ކޮންފަރެންސިން ޕްލެޓްފޯމް “ގޫގުލް މީޓް” އެންމެނަށް ލިބޭގޮތަށް ހަދައިފިއެވެ. ފާއިތުވި ބުދަދުވަހު ގޫގުލް އިން ހާމަކުރިގޮތުގައި، ކުރިން ތައުލީމީ ދާއިރާއަށާއި ވިޔަފާރިއަށް އެކަނި ހުޅުވާލާފައިވާ ގޫގުލް މީޓް މިހާރު، އީމެއިލެއް އޮތް ކޮންމެ މީހަކަށް ވެސް ހިލޭ ބޭނުންކުރެވޭނެ ގޮތަށް ވަނީ ހަމަޖައްސާފައެވެ.
ގޫގުލް މީޓް އިން މެދުކެނޑުމެއްނެތި ކިތަންމެ ގިނައިރަކުވެސް އެއްފަހަރާ 100 މީހުނަށް ވީޑިއޯ ކޮންފަރެންސިން ހެދެއެވެ. މިއީ ދާދިފަހުން މަޝްހޫރުވި ޒޫމް ވީޑިއޯ ކޮންފަރެންސިން ޓޫލްގައި އާއްމު އެކައުންޓަކުން (ބޭސިކް) ލިބޭ ވަގުތައ ވުރެ މާގިނަ ވަގުތެވެ. ޒޫމް އާއްމު އެކައުންޓަކުން މެދުނުކެނޑި ވީޑިއޯ ކޮންފަރެންސިން ހެދެނީ 1 ގަޑިއިރަށެވެ. ކޮވިޑް-19ގެ ހާލަތާއި ގުޅިގެން ގޫގުލް އިން ވަނީ ވީޑިއޯ ކޮންފަރެންސިން މިހާރު އެއްކޮށް ހިލޭ ދޫކޮށްލާފައެެވެ. ނަމަވެސް އަންނަ ސެޕްޓެމްބަރު މަހުން ފެށިގެން އާއްމު އެކައުންޓެއްގެ ވަގުތު 1 ގަޑިއިރަށް ކުުރުކުރާނެ ކަމަށްވެއެވެ.
ނޮވެލް ކްރޯނާވައިރަސްގެ ހާލަތާއި ގުޅިގެން ޒޫމް ވީޑިއޯ ކޮންފަރެންސިން ޓޫލްގެ މަގުބޫލުކަން ފާއިތުވި ޑިސެމްބަރުން ފެށިގެން ނިމުމު އޭޕްރީލް މަހަށް 30 ގުނަ އިތުރުވެފައި ވެއެވެ. އަދި އެންމެ ގިނަ މީހުން ވީޑިއޯ ކޮންފަރެންސިން އަށް ބޭނުންކުރާ ޕްލެޓްފޯމަކަށް ޒޫމް ވެގެން ދިޔަތާ މާގިނަ ދުވަހެއް ނުވެ، އެޕްލެޓްފޯމްގެ ސަލާމަތީ ފިޔަވަޅުތައް ފޫދުއްވާލާފައިވާކަން ވަނީ ހާމަވެފައެވެ. “ޒޫމްބޮމިން” ގެ ގޮތުގައި އާއްމުގެ ކަންބޮޑުުވުން އިތުރުވެގެން ދިޔަ އެއްކަމަކީ ނުދަންނަ މީހުން ވީޑިއޯ ކޮންފަރެންސް ސެޝަން ތެރެއަށްވަދެ ނޭދެވޭ އަމަލުތައް ހިންގުމާއި ބަރަހަނާ މަންޒަރުތައް ފަދަ ކަންކަން ކުދިން ކިޔަވަމުންދިޔަ އޮންލައިން ކްލާސްތަކުގެ ސްކްރީނުތަކަށް ފޮނުވަން ފެށުމުންނެވެ.
ޒޫމްއަށް ލިބުނު މަގުބޫލުކަން ފަނޑުވާން ފެށިވަގުތު ބަލާފައި ގޫގުލްއިން މިވަނީ ކުރީގައި “ގޫގްލް ހޭންގްއައުޓް”ގެ ނަމުގައި ކުރިޔަށް ގެންދިޔަ ވީޑިއޯ ކޮންފަރެންސިން އެޕްލިޝޭޝަން ގޫގުލް މީޓް އަށް ބަދަލުކޮށްފައެވެ. އަދި ގޫގުލް މީީޓްގެ ސަލާމަތާއި ރައްކާތެރިކަމުގެ ފިޔަވަޅުތައް ދެވަނައެއް ނުވާހާ ވަރުގަދަކޮށް އާއްމުންގެ އިތުބާރު ހޯދަން މިވަނީ ފަށާފައެވެ. އެއާއެކު ވީޑިއޯ ކޮންފަރެންސިންގައި މިހާރު އެންމެވާދަވެރި ދެ އެޕްލިކޭޝަނަނކީ ގޫގްލް މީޓް އާއި ޒޫމް އެވެ.
ގޫގުލް މީޓް އުފެއްދުމުގެ ވާހަކަ ހާމަކުރަމުން ގޫގުލް އިން ބުނެފައި ވަނީ ‘ގޫގުލް މީޓް ކުރިޔަށްގެންދެވެނީ ސަލާމަތީ ފައުންޑޭޝަނެއްގެ މަތީގައި ކަމާއި، ބޭނުންކުރާ މީހުންނާއި، ޑޭޓާ އަދި އަމިއްލަ މައުލޫމާތު ރަކާތެރިކަމާއެކު ބެލެހެޓިގެން ދާނެކަމަށެވެ.
ކުރިޔަށްގެންދެވޭ ވީޑިއޯ ކޮންފަރެންސަކަށް އެހެން މީހަކަށް ވަދެވޭނީ އެކޮންފަރެންސް ހުޅުވާލި މީހާ ހުއްދަދީގެން އެކަނި ކަމަށް ގޫގުލް އިން ހާމަކުރެއެވެ.
މިހާރު ޖީމެއިލް އާއި ވަކިން ހުރިކަމުގައި ވިޔަސް ގޫގުލްއިން މަސައްކަތް ކުރަމުން ދަނީ ގޫގުލް މީޓް ޖީމެއިލް އާއި އިންޓަގްރޭޓް ކުރުމަށެވެ. އެއިރުން ބޭނުންކުރުމަށާއި ގޫގުލްގެ އެކި އެޕްލިކޭޝަންތައް މީޓްގެ ތެރެއިން ބޭނުންކުރަން ފަސޭހަވެގެން ދާނެއެވެ.
ޚިޔާލުތައް