އިބްރާހިމް ލަތީފް އަންނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބު އަންނަ އަހަރުގެ އޭޕްރިލް 6 ގައި ބާއްވަން ނިންމައި އެކަން އިއުލާންކޮށްފިއެވެ. އިލެކްޝަންސް ކޮމިޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި އެކަން އިއުލާންކޮށްފައިވަނީ އެކޮމިޝަނުގެ ރައީސް އަހުމަދު ޝަރީފެވެ. ޝަރީފު މިއަދު ވިދާޅުވީ ރައްޔިތުންގެ މަޖިލީހަށް ކުރިމަތިލުމުގެ ފުރުސަތު ހުޅުވާލާނީ އަންނަ ޖެނުއަރީ މަހު ފަހުކޮޅުގައެވެ. އަދި އިންތިހާބަށް ހުޅުވާލާނެ ވަގުތީ ދުވަހެއްގެ ގޮތުގައި ކަނޑައަޅާފައި ވަނީ ޖެނުއަރީ 28 އެވެ.
ޝަރީފް ވިދާޅުވީ މި ފަހަރު ރަޖިސްޓްރީ ކުރަން ހުޅުވާލާނީ ނިމިގެން ދިޔަ ރިޔާސީ އިންތިހާބުގައި ވޯޓު ލީ ތަން ނޫން އެހެން ތަނެއްގައި ވޯޓު ލާން އެކަނި ކަމަށެވެ. އަދި ރިޔާސީ އިންތިހާބުގައި ވޯޓާސް ލިސްޓުން ދިމާވި މައްސަލަތަކަށް ބަލާފައި މި ފަހަރުގެ ރީ-ރަޖިސްޓްރޭޝަން ފޯމްގައި މުހިންމު ބައިތަކެއް ހިމަނާފައިވާނެ ކަމަށް ވެސް ޝަރީފް ވިދާޅުވި އެވެ. އެގޮތުން، ރީ-ރަޖިސްޓްރީ ވާން ބޭނުންވާ މީހެއްގެ ފޯމް އެހެން މީހަކު ހުށަހަޅާ ނަމަ، ރީ-ރަޖިސްޓްރީ ވާން ބޭނުންވާ މީހާގެ އިގްރާރެއް ބޭނުންވާނެ ކަމަށް ޝަރީފް ވިދާޅުވި އެވެ.
ޝަރީފް އިތުރަށް ވިދާޅުވީ، އިންތިހާބީ ދާއިރާތައް ފައިނަލް ކުރުމުގެ މަސައްކަތާއި ވޯޓާސް ލިސްޓް ތައްޔާރު ކުރުމުގެ މަސައްކަތްތައް މިހާރުވެސް ކުރިއަށްދާ ކަމަށެެވެ. އަދި އިންތިހާބީ ދާއިރާތައް ކަނޑައެޅުމުގެ ދުސްތޫރީ މައްސަލައެއް އަމިއްލަ ފަރާތަކުން ހައި ކޯޓަށް ހުށަހަޅާފައި އޮތްކަން ޝަރީފް ވަނީ ފާހަގަ ކުރައްވާފައެވެ.
ޝަރީފު އިޝާރާތްކުރެއްވި މައްސަލައަކީ އައްޑޫ މަރަދޫ، ފޭދޫ ދާއިރާ ވަކި ދާއިރާއެއްގެ ގޮތުގައި ކަނޑައެޅުމާއި އައްޑޫ މީދޫ ވަކި ދާއިރާއެއްގެ ގޮތުގައި ކަނޑައެޅުމަށް ހުށަހެޅި ދުސްތޫރީ މައްސަލައެކެވެ. އެ މައްސަލައަށް ހައި ކޯޓުން އަދި ވަކި ގޮތެއް ނުނިންމަ އެވެ.
މީގެއިތުރުން، ވޯޓުލާން ކިއު ހަދާ ސަރަހައްދުގެ ތެރޭގައި ބައެއް ކަންކަން އިންތިޒާމު ކުރުމަށް ސްކައުޓް އެސޯސިއޭޝަނާއި ކެޑޭޓް ކޯއާ މަޝްވަރާ ކުރަމުންދާ ކަމަށް ވެސް އިލެކްޝަންސް ކޮމިޝަނުން ބުންޏެވެ.
ޚިޔާލުތައް