އިބްރާހިމް ލަތީފް ކުރިއަށް އޮތް ލޯކަލް ކައުންސިލް އިންތިޚާބުގައި އަންހެނުންނަށް ވަކި ދާއިރާތަކެއްގެ ގޮޑިތައް ޚާއްސަކުރި މައްސަލަ ސުޕްރީމް ކޯޓަށް ހުށަހެޅުމަށް، ޖުމްހޫރީ ޕާޓީގެ ޒުވާނުންގެ ގޮފީގެ ކުރީގެ ރައީސް މޫސާ އަންވަރު ނިންމައިފިއެވެ. އައްޑޫގައި މޫސަ ނިސްބަތްވާ ދާއިރާ އަށް ފިރިހެނަކަށް ވާދަ ނުކުރެވޭނެ ކަމަށް އިލެކްޝަންސް ކޮމިޝަނުން ނިންމީ ބާތިލް ގާނޫނެއްގެ މައްޗަށް ބިނާކޮށް ކަމަށާއި އެ ގާނޫނާއި ކޮމިޝަންގެ ނިންމުން ބާތިލްކުރަން ސުޕްރީމް ކޯޓަށް ހުށަހަޅަން ނިންމާފައިވާ ކަމަށް ކުރިންވެސް ސިޔާސީ މައްސަލަތައް ކޯޓަށް ހުށަހަޅާފައިވާ މޫސަ ޓްވީޓުކޮށްފައިވެއެވެ.
މޫސަގެ މިނިންމެވުމަށް ތާއީދުކޮށް ލޯޔަރު އާސިފު ވިދާޅުވެފައިވަނީ ގާނޫނު އަސާސީގެ 20 ވަނަ މާއްދާއާއި 17 ވަނަ މާއްދާގައި އޮތީ އަންހެނުންނާއި ފިރިހެނުން ހަމަހަކަން ކަމަށެވެ.
ގާނޫނު އަސާސީގެ 17 ވަނަ މާއްދާގައި ބަޔާންކޮށްފައިވަނީ އެބާބުގައި ބަޔާންކޮށްފައިވާ ހައްގުތަކާއި މިނިވަންކަން ތަފާތު ކުރުމެއްނެތި ކޮންމެ މީހަކަށް ލިބިގެންވާކަމަށެވެ. އެ ހައްގުތަކާއި މިނިވަންކަން ލިބިގަތުމުގައި ޖިންސަށް ބަލައި ތަފާތު ކުރެވިގެން ނުވާނެކަމަށްވެސް އެމާއްދާގައި ބަޔާންކޮށްފައިވެއެވެ. އަދި އެބާބުގެ ހައްގުތަކުގެ ތެރޭގައި ވޯޓު ދިނުމުގެ ހައްގާއި އިންތިޚާބުތަކަށް ކުރިމަތިލުމުގެ ހައްގު ބަޔާންކޮށްފައިވެއެވެ. އެބާބުގެ 26 ވަނަ މާއްދާގައި ބަޔާންކޮށްފައިވާ ގޮތުން 18 އަހަރުންމަތީގެ ކޮންމެ މީހަކަށް އިންތިޚާބީ މަގާމުތަކަށް ކުރިމަތިލުމުގެ ހައްގު ލިބިގެންވެއެވެ.
ގާނޫނު އަސާސީއާއި ޚިލާފު ނުވާނޭހެން އަންހެނުންނަށް 33 އިންސައްތަ ޚާއްސަ ކުރެވިދާނެއެވެ. އެގޮތުން، އަންހެނުންނަށް ޚާއްސަވެފައިވާ ގޮޑިތައް ނުހިމަނާ ދާއިރާތައް ބަހާލާނީއެވެ. އެއަށްފަހު ކޮންމެ ދެދާއިރާއެއް އެއްކުރުމަށްފަހު އަންހެނުންނަށް ޚާއްސަ ދާއިރާއެއްކަމުގައި ބަލާނީ އެވެ. އެގޮތަށް އަމަލުކޮށްފިނަމަ އެއީ 33 އިންސައްތައެވެ. ގޮޑި ހަމަކުރުމުގައި ރާއްޖޭގެ ހުރިހާ ސިޓީތަކެއްގައި ވެސް ކާލި ހަމަވެއެވެ.
ޚިޔާލުތައް