އޮއިވާލި ކަނދުފަތި އެޅުމުގެ މަސައްކަތް ލަސްވެ ރަށަށް މަސްލިބުން ދަތިވެއްޖެ – ފުވައްމުލަކު މަސްވެރިން

ފުވައްމުލަކު ބޭރުގައި މަސްވެރިކަމަށް ޚާއްސަކޮށްގެން އަޅާފައިވާ ދެ އޮއެވާލި ކަނދުފަތި (ދެކުނެ ބޮއި، އިރިމައްތެ ބޮއި) ކަނޑައިގެން ދިޔުމުގެ ސަބަބުން އަލުން ކަނދުފަތި އެޅުމުގެ މަސައްކަތް ލަސްވާތީވެ ފުވައްމުލަކަށް މަސްލިބުން ދަތިވެއްޖެކަމަށް ފުވައްމުލަކު މަސްވެރިން ބުނެފިއެވެ. އޮއިވާލި ކަނދުފަތި އެޅުން ލަސްވުމުގެ ސަބަބުން ފުވައްމުލަކަށް މަސްލިބުން ދަތިވެ މަހުގެ އަގު އުފުލިއްޖެކަމުގެ ކަންބޮޑުވުން ވެސް ފުވައްމުލަކު މަސްވެރިން ކޮށްފިއެވެ.

ފުވައްމުލަކު ބޭރުގައި މަސްވެރިކަމަށް ޚާއްސަކޮށްގެން އަޅާފައިވާ ދެ އޮއެވާލި ކަނދުފަތި (ދެކުނެ ބޮއި، އިރިމައްތެ ބޮއި) ކަނޑައިގެން ދިޔުމުގެ ސަބަބުން އަަލުން އެ ދެ ކަނދުފަތި އެޅުމުގެ މަސައްކަތް ކަމާއިގުޅޭ އިދާރާތަކާއި ގުޅިގެން ކުރިއަށް ގެންދާކަމަށް ފުވައްމުލަކު ސިޓީ ކައުންސިލުން މިދިޔަ މެއި މަހު 28 ވަނަ ދުވަހު ބުނެފައި ވެއެވެ.

ފުވައްމުލަކު މަސްވެރިން އިތުރަށް ބުނެފައިވަނީ، ބޮއި (ކަނދުފަތި) އެޅުމަށް 4-5 މަސްދުވަސް ނެގުމަކީ އާމްދަނީ ހޯދުމަށް މަސައްކަތްކުރާ މަސްވެރިންނަށް ދިގު މުއްދަތެއް ކަމަށާއި، ބޮއި އެޅުމުގެ މަސައްކަތް އަވަސްކޮށްދެއްވުމަށެވެ.

މީގެ 3 އަހަރު ކުރިން، 2017 ގައި ވެސް ފުވައްމުލައްކު އިރުމަތީ ކަނދުފަތި ކަނޑައިގެން ދިއުމުގެ ސަބަބުން އަލުން އަޅާފައި ވެއެވެ. ފުވައްމުލަކުގެ އިރުމަތީ ކަނދުފަތި އަޅާފައި މިވަނީ ފުވައްމުލަކުގެ “އިރު-ދެކުނުން” 11.5 މޭލު ބޭރުގައެވެ. އެ ކަނދުފަތީގެ ޖިއޮގްރަފިކަލް ޕޮޒިޝަނަކީ ދެކުނު، 048 “30 ’00 އިރުން، 840 27 073 އެވެ.

އޮއިވާލި ކަނދުުފައްޗަކީ ރާއްޖޭގެ އަމިއްލަ ކާމިޔާބު އުފެއްދުމެކެވެ. ފުރަތަމަ ކޮޅުގެ އޮއިވާލި ކަނދުފަތީގައި ދާގަނޑެއް ހަރުހަކުރެވިފައި ވިޔަސް މިހާރުގެ ކަނދުފަތިތަކުގައި އޭގެ ބަދަލުގައި ހުންނަނީ ކުދި ބޮއެތަކެއް ހަރުކޮށްފައެވެ. އޮއިވާލި ކަނދުފަތިތައް އާއްމުކޮށް ހަރުކުރަނީ ރަށާއި 12 މޭލު ހިސާބުގައިއެވެ. އެއީ ކަނދުފައްޗާއި ހަމަޔަށް ފަސޭހައިން މަސްވެރިންނަށް ދެވޭގޮތަށް ބަލާފައެވެ.

މިއީ މަސް ތިލަވެ ތިބޭ ހިސާބު ފާހަގަކޮށް ފަަަސޭހައިން މަސްވެރިންނަށް އެހިސާބަށް ދިއުމުގެ މަގު ފަހިކުުރުމުގެ ގޮތުން 1981 ގައި އީޖާދުކުރި އާލާތެކެވެ. އޮއިވާލިކަނދުފަތީގެ މަގުބޫލުކަން މިހާރު ވަނީ މަސްވެރިންގެ މެދުގައި އިތުރުވެފައެވެ. މުޅި ރާއްޖޭގައި މިހާރު 56 އޮއިވާލި ކަނދުފަތި އެބައޮތެވެ. ކަނދުފަތީގައި ހުންނަނީ  ދުރަށް ފެންނަގޮތަށް އަލި އޮރެންޖު ކުލައެކެވެ. ކުރީގެ ކަނދުފަތިތަކުގައި ދިދަ އަކާއެކު ރޭގަނޑަށް ދިއްލޭ ބޮއްކެއް ހުއްޓަސް މިހާރުގެ ކަނދުފަތި ތަކުގައި އެބައެއް ނުހުރެއެވެ.