މުހައްމަދު ޝިހާބް ފުވައްމުލައް ސިޓީގެ މަގުތަކާއި ގޯތިތަކުގައި ވިޔަފާރިކުރާ މޭޒުތަކާއި ގާޑިޔާތައް 7 ނޮވެމްބަރު 2020 އާއި ހަމަޔަށް ކަނޑައެޅިފައިވާ އުސޫލާއި ޚިލާފަށް ހުރިނަމަ ނަގާނެ ކަމަށް ފުވައްމުލައް ސިޓީ ކައުންސިލުން ހާމަކޮށްފިއެވެ.
ފުވައްމުލައް ސިޓީ ކައުންސިލުން އިއްޔެ ނެރުނު އިއުނެއްގައި ބުނެފައި ވަނީ ވަގުތީ ހުއްދައިގެ ދަށުން ވިޔަފާރި ކުރަން ބެހެއްޓިފައިވާ ގާޑިޔާތަކާއި މޭޒުތައް ރަޖިސްޓްރީ ކުރުމަށް 6 ފެބްރުއަރީ 2020 އަދި 30 ސެޕްޓެމްބަރު 2020 ގައި އާއްމުކޮށް އެންގިފައިވާނެ ކަމަށެވެ. އަދި އެ އިއުލާނާއެކު ގިނަ ބަޔަކު ވަނީ ރަޖިސްޓްރީވުމަށް ފޯމް ހުށަހަޅާފައިވާ ފުވައްމުލައް ސިޓީ ކައުންސިލުން ހާމަކުރެއެވެ.
އެކަމަކު އަދިވެސް ބައެއް ފަރާތްތަކުން ރަޖިސްޓްރީ ނުކޮށް މޭޒު ބަހައްޓައިގެންނާއި ގާޑިޔާތަކުގައި ވިޔަފާރި ކުރުމުން ދާކަން ސިޓީ ކައުންސިލަށް ފާހަގަކުރެވިފައިވާ ކަމަށްވެއެވެ.
1 މާރިޗް 2020 އިން ފެށިގެން ފުވައްމުލައް ސިޓީ ކައުންސިލުން އަމަލުކުރަމުން އަންނަނީ “ފުވައްމުލަކު މަގުމަތީގައި ގާޑިޔާ ބަހައްޓައިގެން ވިޔަފަރި ކުރުމުގެ އުސޫލަށް” ކަމަށް ސިޓީ ކައުންސިލުން ހާމަކޮށްފައި ވެއެވެ. އަދި، އަންނަ ހޮނިހިރު (7 ނޮވެމްބަރު 2020) ދުވަހާއި ހަމަޔަށް، މިހާރު އުސޫލާއި ޚިލާފަށް ހުރިތަންތަން އެ އުސޫލާއި އެއްގޮތަށް ތައްޔާރުކޮށް ނިންމުމަށް އަންގާކަމަށެވެ.
އަދި މި މުއްދަތުގައި އެގޮތަށް ތައްޔާރުކޮށް ނުނިންމާ ގާޑިޔާތައް މޯލްޑިވްސް ޕޮލިސް ސާވިސް މެދުވެރިކޮށް ނެގުމުގެ މަސައްކަތް ކުރިޔަށް ގެންދާނެކަމަށް އިއުލާނުގައި ވެއެވެ.
ރަޖިސްޓްރީ ވުމަށް މިހާރު ހުށަހަޅާފައިވާ ފަރާތްތަކުގެ ތެރެއިން އުސޫލާއި އެއްގޮތަށް ހުރި ގާޑިޔާ/މޭޒުތައް މި ނޮވެމްބަރު މަސް ނިމުމުގެ ކުރިން ރަޖިސްޓްރީކޮށް ވިޔަފާރި ހުއްދަ ދޫކުރާނެ ކަމަށް ސިޓީ ކައުންސިލުން ހާމަކޮށްފައި ވެއެވެ.
ފުވައްމުލަކު ސިޓީ ކައުންސިލުން ފާހަގަ ކުރާ “ފުވައްމުލަކު މަގުމަތީގައި ގާޑިޔާ ބަހައްޓައިގެން ވިޔަފަރި ކުރުމުގެ އުސޫލް” ފުވައްމުލައް ސިޓީ ކައުންސިލްގެ ވެބްސައިޓްގައި އާއްމުކޮށްފައި ވޭތޯ މިކަލް ނޫހާއި މީހަކު ސުވާލުކުރިއެވެ. “އުސޫލުގައި ބުނާގޮތަށް ކަންތައްތައް ބަދަލުކުރެވޭނީ އުސޫލު ފެނިގެން ނޫންހޭ” އޭނާ އެހި އެވެ؟ އަދި އެ އުސޫލު ފެނޭތޯ ސިޓީ ކައުންސިލްގެ ވެބްސައިޓާއި ގެޒެޓް ވެސް ބަލިފައި ކަމަށެވެ. ނަމަވެސް އަދި ވަނީ ފެންނަ ގޮތެއް ނުވެފައި ކަމަށް އޭނާ ބުނެއެވެ.
ފުވައްމުލައް ސިޓީ ކައުންސިލްގެ ވެބްސައިޓް
މިކަލް ނޫހުގެ ފަރާތުން ބެލި ބެލިބެލުމުން ވެސް ފުވައްމުލައް ސިޓީގެ އިއުލާންތަކާއި އުސޫލުތައް އާއްމުކުރާ ފޭސްބުކް ޕޭޖާއި ފުވައްމުލައް ސިޓީ ވެބްސައިޓް (fuvahmulah.gov.mv) އިން 30 ސެޕްޓެމްބަރުގެ އިއުލާނާއި “ފުވައްމުލަކު މަގުމަތީގައި ގާޑިޔާ ނުވަތަ މޭޒު ބަހައްޓައިގެން ވިޔަފާރި ކުރުމުގެ އުސޫލް” ފެންނާކަށް ނެތެވެ. ނަމަވެސް މި އުސޫލު 2019 ވަނަ އަހަރު އޮކްޓޯބަރު މަހު 7 ވަނަ ދުވަހު ގެޒެޓްގައި (/gazette.gov.mv ގައި) ޕަބްލިޝްކޮށްފައިވާ ކަން ފުވައްމުލައް ސިޓީ ޑެޕިއުޓީ މޭޔަރު މުހައްމަދު ޟިރާރު ވަނީ މިކަލް ނޫހަށް ކަށަވަރުކޮށް ދެއްވާފައެވެ.
“ފުވައްމުލަކު މަގުމަތީގައި ގާޑިޔާ ނުވަތަ މޭޒު ބަހައްޓައިގެން ވިޔަފާރި ކުރުމުގެ އުސޫލް”
ނަމަވެސް މިފަދަ އުސޫލުތައް ފުވައްމުލައް ސިޓީ ކައުންސިލުގެ ވެބްސައިޓްގައި ޕަބްލިޝްކޮށް، އެއްތަނަކުން ފަސޭހައިން ފެންނަ ގޮތަށް ހުންނަނަމަ އާއްމުންނަށް ފަސޭހަވެގެން ދާނެކަން ފާހަގަ ކުރެވުނެވެ.
ޚިޔާލުތައް