މުހައްމަދު ޝިހާބް ނުކުޅެދުންތެރިކަމެއްގެ ސަބަބުން ހިނގާބިގާވެ އުޅުމަށް ދަތިކަންހުންނަ ފުވައްމުލައް ސިޓީގެ 5 މީހަކަށް ބޭންކް އޮފް މޯލްޑިވްސް ލިމިޓެޑް (ބީއެމްއެލަ) އިން އިލެކްޓްރިކް ވީލް ޗެއާ ހަދިޔާ ކޮށްފިއެވެ.
މިޕްރޮގްރާމުގެ ދަށުން މިއަހަރު 65 މީހަކަށް އިލެކްޓްރިކް ވީލް ޗެއާ ހަދިޔާ ކުރަން ނިންމައިފައިވާ ކަމަށް މައުލޫމާތު ލިބެއެވެ. މިއީ 2017 ވަނ އަހަރުން ފެށިގެން ކޮންމެ އަހަރަކުވެސް ބީއެމްއެލް އިން ކުރިޔަށްގެންދާ ހަރަކާތެއް ކަމަށް ވެއެވެ.
ނުކުޅެދުންތެރިކަން ހުންނަ މީހުންނަށް މި ޕްރޮގްރާމުގެ ދަށުން އެހީތެރިކަން ފޯރުކޮށްދެވުމަކީ ބޭންކަށް ލިބޭ އުފަލެއް ކަމަށް ބީއެމްއެލްގެ ސީއީއޯ އަދި މެނޭޖިން ޑިރެކްޓަރު ޓިމް ސޯޔާ ވިދާޅުވެއެވެ. އަދި އެ ބޭންކުގެ އުއްމީދުކުރަނީ އެކަމަށް ބޭނުންވެފައިވާ ވީހާ ވެސް ގިނަ ބަޔަކަށް ވީލްޗެއާ ހަދިޔާކުރެވި، އާއްމު ދިރިއުޅުމުގައި އަމިއްލައަށް ކަންކަން ކުރުމުގައި އެހީތެރިކަން ފޯރުކޮށްދިނުން ކަމަށް ޓިމް ސޯޔާ ވިދާޅުވެއެވެ.
“މިފަދަ ހާއްސަ މޮޓޯރައިޒްޑް ވީލްޗެއާ ހަދިޔާކުރެވި، އެތަކެއް އާންމު ފަރުދުންގެ ދިރިއުޅުމަށް ހެޔޮ ބަދަލެއް ގެނައުމަށް އެހީތެރިވެވޭ ކަމީ އަޅުގަނޑުމެންނަށް ލިބޭ އުފަލެއް. އަަޅުގަނޑުމެންގެ އަމާޒަކީ ވީހާވެސް ގިނަ ފަރުދުންނަށް ވީލްޗެއާ ހަދިޔާކޮށް، އެ މީހުންގެ އާންމު ދިރިއުޅުމުގެ ކަންކަން ފުރިހަމަ ކުރުމަށް ފުރުސަތު ހޯދައިދިނުން،” ކަމަށް އޮންލައިން ނޫސް މިހާރުއަށް ޓިމް ސޯޔާ ވިދާޅުވި އެވެ.
އެގޮތުން ބީއެމްއެލްގެ އަމާޒަކީ މި އަހަރު ތެރޭގައި 39 ރަށެއްގެ 65 މީހަކަށް ވީލް ޗެއާ ހަދިޔާކުރުން ކަމަށެ ވެއެވެ.
ޚިޔާލުތައް