އިބްރާހިމް ލަތީފް ބާރު ސްޕީޑުގައި މިހާރު ކުރިއަށްދާ ފުވައްމުލަކުގެ އެތެރޭގެ މަގުތައް ރަގަޅު ފެންވަރަކަށް ހެދުމުގެ މަޝްރޫއުގެ ތެރެއިން 4 ކިލޯ މީޓަރުގެ މަގުގައި އެކި މަސައްކަތްތައް ކުރެވިފައިވާ ކަމަށް ފުވައްމުލަކު ސިޓީ ކައުންސިލުން ބުނެފިއެވެ.
މިހާތަނަށް ކުރެވިފައިވާ މަސައްކަތާއި ގުޅޭގޮތުން މައުލޫމާތު ހާމަކުރަމުން ފުވައްމުލަކު ސިޓީ ކައުންސިލުން ބުނެފައިވަނީ މިހާތަނަށް ފިނިވާމަގާއި ދުވައްފާޑު މަގުގެ ސެޓްލްމަންޓް ޓޭންކްތަކާއި ކޭބަލް ޑަކްޓްތައް އިންސްޓޯލްކުރުން ނިމިފައިވާ ކަމަށާއި އަދި މިހާރު ކުރިއަށްދަނީ އެމަގުގެވެސް ޕޭމަންޓްގެ ޖެހުމާއި ޕޭމަންޓް ހެދުމުގެ މަސައްކަތް ކަމަށެވެ. މީގެ އިިތުރުން ލައިނޫފަރު މަގުގެ ސެޓްލްމަންޓް ޓޭންކާއި ކޭބަލް ޑަކްޓްގެ މަސައްކަތް ކުރިއަށް ދާކަމަށްވެސް ފުވައްމުލަކު ސިޓީ ކައުންސިލުން ބުނެއެވެ. ބަހާރު މަގުގެ ޣާޒީ މަގުން ފެށީގެން ނައިބުތުއްތުގެ މަގާއި ހަމައަށް ސެޓްލްމަންޓް ޓޭންކާއި ކޭބަލް ޑަކްޓްތައް އެޅުމުގެ މަސައްކަތް ނިމިފައި ކަމަށާއި އަދި ފުވައްމުލަކު ސްކޫލާއި ހިސާބުން ފެށީގެން ނައިބު ތުއްތު މަގާއި ހަމައަށް ޕޭމަންޓް ކާބު ޖެހުމާއި ޕޭމަންޓްގެ މަސައްކަތްވެސް ނިމިފައިވާ ކަަމަށް ސިޓީ ކައުންސިލުން ބުނެއެވެ.
ދުވައްފާޑޮ މަގުގެ މިހާރު ކުރިއަށްދަނީ ޕޭމަންޓް ހެދުމުގެ މަސައްކަތް، ފޮޓޯ: ސިޓީ ކައުންސިލް
މަގު ހެދުމާއި ބަނދަރު ހެދުމުގެ ރާއްޖޭގެ އެންމެ ފުންނާބު އުސް ކުންފުނި އެމްޓީސީސީ އާއި ހަވާލުކޮށްގެން ކުރިއަށް ގެންދާ މިމަޝްރޫއުގެ މަސައްކަތް އަވަސްކުރުމުގެ ގޮތުން އެމްޓީސީސީގެ އިސްވަފުދެއް ފާއިތުވީ 3 މަސްދުވަހުގެ ތެރޭގައި ދެފަހަރަށް ވަނީ ފުވައްމުލަކަށް ޒިޔާރަތްކޮށްފައެވެ. އެދަތުރުތަކުގައި އެކުންފުނިން ހާމަކޮށްފައިވަނީ މިހިގާ 2021 ވަނަ އަހަރު ނިމުމުގެ ކުރިން ފުވައްމުލަކުގެ އެތެރޭ މަގުތަކުގެ މަސައްކަތް ނިމޭނެ ކަމަށެވެ.
ލައިނޫފަރު މަގުގެ މިހާުރ ކުރިއަށްދަނީ ކޭބަލް ޑަކްޓް އެތުރުމާއި ސެޓްލްމަންޓް ޓޭންކްގެ މަސައްކަތް. ފޮޓޯ: ސިޓީ ކައުންސިލް
މިމަޝްރޫއުގައި ފުވައްމުލަކު އެތެރޭގެ 31 މަގެއް ހެދުމަށް ނިންމާފައިވާ ކަމަށް މިކަލް ނޫހަށް މައުލޫމާތު ލިބެއެވެ. މި މަސައްކަތް 730 ( ގާތްގަޑަކަށް 2 އަހަރު) ދުވަސް ތެރޭގައި ނިންމުމަށް އެމްޓީސީސީ އާއި ހަވާލުކޮށްފައި ވަނީ ޖުލައި 2019 ގައެެވެ. މިމުއްދަތު ހަމަވާނީ އަންނަ ޖުލައި މަހުގައެވެ.
ބަހާރުމަގުގެ ކޭބަލް ޑަކްޓް އެތުރުމުގެ މަސައްކަތް. ފޮޓޯ: ސިޓީ ކައުންސިލް އިދާރާ
ޚިޔާލުތައް