މުހައްމަދު ޝިހާބް ފުވައްމުލައް ސިޓީގައި ސްޓޭޓް އޮފް ދި އާޓް ޓިވެޓް ސެންޓަރެއް ގާއިމުކުރުމުގެ މަޝްވަރާތައް ހަޔާ އެޑިއުކޭޝަން މިނިސްޓްރީން މިއަދު ކޮށްފިއެވެ.
މިއަދު ހަޔާ އެޑިއުކޭޝަން މިނިސްޓްރީގައި އޮންލައިންކޮށް އަދި ބައެއް މެމްބަރުން ހާޒިރުވެގެން ކުރިޔަށް ގެންދިޔަ މިބައްދަލުވްމުގައި މަޝްވަރާކުރެވުނީ ފުވައްމުލައް ސިޓީގައި ގާއިމުކުރާ ޓިވެޓް ސެންޓަރު ޚާއްސަ ކުރާނެ ދާއިރާއެއް ކަނޑައެޅުމުގެ ގޮތުންނާއި އެކަމަށް ބިިމެއް ނުވަތަ ތަނެއް ހަމަޖެއްސުމުގެ ގޮތުން ކަމަށް މިކަލް ނޫހަށް މައުލޫމާތު ލިބިފައިވެއެވެ.
ސްޓޭޓް އޮފް ދި އާޓް ޓިވެޓް ސެންޓަރު ގާއިމުކުރުމަށް ސަރުކާރުން ވިސްނާފައި ވަނީ ޕަބްލިކް ޕްރައިވެޓް ޕާޓްނާޝިޕްގެ އުސޫލުން ކަމަށް ބައްދަލުވުމުގައި ބައިވެރިވި ފުވައްމުލަކު އުތުރު ދާއިރާގެ މަޖުލިސް މެމްބަރު މުހައްމަދު ރަޝީދު (ދޮންބެ) ވިދާޅުވިއެވެ. އަދި ފުވައްމުލަކުގެ ޓިވެޓް ސެންޓަރު ޚާއްސަކުރުމަށް ބިލްޑިން އެންޑް ކޮންސްޓްރަކްޝަން މަސައްކަތާއި ގުޅޭ ދާއިރާތަކުގެ ވިސްނުން ހުރިކަމަށް އެމްޕީ ރަޝީދު ހާމަކުރެއްވިއެވެ.
މި ސެންޓަރުން ކިޔެވޭގޮތަށް ހަމަޖެހިގެންދާނީ ޚާއްސަވާ ދާއިރާއިން ސެޓްފިކެޓް ލެވެލް 3 އިން ފެށިގެން ވޮކޭޝަނލް މާސްޓަރ ޑިގްރީއާއި ހަމަޔަށް ކަމަށް ވެއެވެ.
މިކަމުގެ އެއް ވިސްނުމަކީ ބޭރުގެ އެފަދަ ސެންޓަރަކާއި އެފިލިއޭޓްވެގެން އެމީހުންގެ މީހުނާއި ކޯސްތައް ގެނެސްގެން އެއްބައި ފުވައްމުލަކުގައި އަނެއްބައި ރާއްޖެއިން ބޭރުގައި ފުރިހަމަކުރާ ގޮތަށް ކުރިޔަށް ގެންދިއުން ކަމަށް އެމްޕީ ޜަޝީދު ވިދާޅުވިއެވެ. އެއިރުން ރާއްޖޭގެ ހުރިހާ ހިސާބަކުން ވެސް ކުދިން އައިސް އެތަނުން މަސައްކަތްތެރިކަން ދަސްކޮށް ފަންނުވެރި ބަޔަކަށްވެގެން ދުނިޔޭގެ އެކި ހިސާބުތަކުން ވަޒީފާތައް ހޯދުމަށް މަގު ފަހިވެގެން ދާނެކަމަށެވެ.
މިސެންޓަރުގައި ކުދިންގެ އެކޮމޮޑޭޝަނާއި އެހެނިހެން ޚިދުމަތްތައް ވެސް ގާއިމުކުރެވިގެން ދާނެކަމަށެވެ. މިހާރުގެ ޗެލެންޖަކީ އެކަށީގެންވާ ރަނގަޅު ބަޔަކު ހޯދުންކަމަށެވެ.
މި މަޝްވަރާތަކުގައި ފުވައްމުލައް ސިޓީ ކައުންސިލާއި ފުވައްމުލަކު އުތުރު އަދި ދެކުނު ދާއިރާގެ ދެ މެމްބަރުން ބައިވެރިވެ ވަޑައިގަތެވެ.
ޚިޔާލުތައް