މުހައްމަދު ޝިހާބް އިންޑިއާ ސަރުކާރުގެ ހިލޭ އެހީގެ ދަށުން ހާފިޒު އަހުމަދު ސްކޫލު (ހޭޒް)ގެ އިންކްލޫސިވް އެޑިއުކޭޝަން ސަޕޯޓް ޔުނިޓުގައި ސެންސަރީ ރޫމެއް ގާއިމުކޮށް މިއަދު ރަސްމީކޮށް ހުޅުވައިފިއެވެ. އެޑިއުކޭޝަން މިނިސްޓްރީއިން މިއަދުގެ ރަސްމިއްޔާތު ބާއްވާފައި ވަނީ ވާޗުއަލްކޮށެވެ.
މި ރަސްމިއްޔާތުގައި އެޑިއުކޭޝަން މިނިސްޓާ ޑރ.އާއިޝަތު އަލީ އާއި އިންޑިއާގެ ސަފީރު އާއި ރާއްޖޭގެ ފޮރިން މިނިސްޓަރުގެ އިތުރުން ފުވައްމުލަކު ދެކުނު ދާއިރާގެ މަޖުލިސް މެމްބަރު މުހައްމަދު މުމްތާޒުއާއި އެޑިއުކޭޝަން މިނިސްޓްރީގެ އިންކްލޫސިވް އެޑިއުކޭޝަން ސަޕޯޓްގައި މަސައްކަތްކުރަވާ ބޭފުޅުންނާއި ހޭޒްހެ ޕްރިންސިޕަލް މުހައްމަދު ސިރާޖު އާއި އިންކްލޫސިވް އެޑިއުކޭޝަންގެ ލީޑިންޓީޗަރ ނިޒުނާ އަދަމް އާއި އަފީފުއްދީނު ސްކޫލުން ވެސް ބައިވެރިވެފައިވެއެވެ.
މިއަދުގެ ރަސްމިއްޔާތުގެ ބައެއް ބައިވެރިން
މިއީ ފައިތުވި 2020 ވަނަ އަހަރު ކުރިޔަށް ގެންދއުމަށް ހަމަޖެހިފައިވާ ޕްރޮޖެކްޓެއް ނަމަވެސް ކޮވިޑް-19ގެ ދަތިތަކާއި ހެދި މި އަހަރަށް ލަސްވެގެން ދިޔައީ ކަމަށް މައުލޫމާތު ލިބެއެވެ. މި މަޝްރޫޢުގެ ދަށުން އިންޑިއާ ސަރުކާރުގެ ހިލޭ އެހީގައި ރާއްޖޭގެ 2 ސަރަހައްދެއްގައި އިންކްލޫސިވް އެޑިޔުކޭޝަން ސަޕޯޓް ޔުނިޓް ޤާއިމުކޮށްފައި ވެއެވެ. އުތުރުން ހދ. ކުޅުދުއްފުށި ސިޓީ އަފީފުއްދީން ސްކޫލާއި ފުވައްމުލައް ސިޓީ ހާފިޒް އަހުމަދު ސްކޫލެވެ.
އިންޑިއާގެ 1.6 މިލިޔަން ރފިޔާގެ ގްރާންޓް ސްކީމްގެ ދަށުން ގާއިމުކުރި އިންކްލޫސިވް އެޑިޔުކޭޝަން ސަޕޯޓް ޔުނިޓް ތަކަށް އެކަމަށް ޚާއްސަ ކިލާސްރޫމަކާއި ކިލާސްރޫމަށް ބޭނުންވާ އުނގެނުމުގެ އާލަތްތައް ހޯދައިދިނުމާއި އުނގަންނައިދޭ މީހުން ތަމްރީނު ކުރުން ހިމެނެއެވެ. ހޭޒްގައި ކުރިން ހުރި ކިލާސްރޫމެއް ސެންސަރީ ރޫމަކަށް ބަދަލުކޮށް އެތަނުގެ މަސައްކަތް މުޅިން ނުނިމުނު ނަމަވެސް އަފީފުއްދީން ސްކޫލުގެ އިންކްލޫސިވް އެޑިޔުކޭޝަން ސަޕޯޓް ޔުނިޓް އެއްކޮށް ނިމި ޕްރޮކެޓްގައި ކަނޑައަޅާފައިވާ މުއްދަތުގައި ތަން ހުޅުވީކަމަށް މިކަލް ނޫހަށް މައުލޫމާތު ލިބިފައި ވެއެވެ.
ހޭޒްގެސެން ޔުނިޓުގެ ސެންސަރީ ރޫމް ހުޅުވުމުގެ ރައްސަމިއްޔާތުގައި ފޮރިން މިނިސްޓަރ ޝާހިދު އާއި އިންޑިއާ ސަފީރު
ހާފިޒް އަހުމަދު ސްކޫލުގައި މީގެ ކުރިން ވަނީ އިންކްލޫސިވް އެޑިއުކޭޝަން ޔުނިޓަށް ޚާއްސަ އިމާރާތެއް ހަދާފައެވެ. ވުމާއެކު އެސްކޫލުން މިފަހަރުގެ ޕްރޮޖެޓްގެ އެހީ ބޭނުންކުރީ ޚާއްސަ އެހީއަށް ބޭނުންވާ ކުދިންނަށް ޚާއްސަ ސެންސަރީ ރޫމެއް ހެދުމަށެވެ. އެގޮތުން އެސްކޫލުގެ ސްޕެޝަލް ނީޑްސް ޑިޕާޓްމެންޓްގެ ބައެއްގެ ގޮތުގައި ވަކި ޚާއްސަ ކިލާސްކޮޓަރިއެއް ސެންސަރީ ރޫމެއްގެ ގޮތުގައި ވަނީ ތައްޔާރުކުރަން ނިންމީ ކަމަށް ވެއެވެ.
ސެންސަރީ ރޫމެއްގެ މިސާލެއް
ސެންސަރީ ރޫމަކީ ޚާއްސަ އެހީއަށް ބޭނުންވާ ދަރިވަރުންގެ ހިއްސުތަކަށް މާހައުލުގެ އެކިއެކި ކަންކަމުން ކުރާ ނޭދެވޭ އަސަރުތައް ވަކި މިންގަޑެއްގައި މެނޭޖުކުރުމަށް އެހީތެރިވުމުގެ ގޮތުން ޚާއްސަ އާލަތްތަކެއްގެ މައްޗަށް ހިމެނޭ ކިލާސްްކޮޓަރިއެކެވެ. އެކުދިންގެ ވަކި ހިއްސުތަކެއްގެ ނުފޫޒު ސިކުޑީގައި ގަދަވުމުން އެފަދަ ކިލާސްކޮޓަރީގައި ހުންނަ އެ ހިއްސަކަށް ބޮޑަށް އަސަރުކުރުވާ ބާވަތުގެ އެއްޗެއް ބޭނުންކޮށްގެން އެ ކުދިންގެ ހަރަކާތްތައް މެނޭޖުކުރުމަށް ބޭނުން ކުރެވެއެވެ.
އެކިއެކި ޒާތުގެ ޚާއްސަ އެހީއަށް ބޭނުންވާ ކުދިންނަށް އެއްކޮށް ކިޔަވައިދިނުމުގައި މިކަހަލަ ރޫމެއްގެ އެހީތެރިަކން ބޮޑުކަމަށް ތަޖުރިބާކާރުން ބުނެއެވެ.
ހޭޒްގައި ހަދާފައިވާ ސެންސަރީ ރޫމަކީ ރާއްޖޭގެ ދެކުނުގެ ސަރަހައްދުގެ ސްކޫލެއްގައި ފުރަތަމަ ފަހަރަށް ހަދާ މިފަދަ ރޫމެވެ. މިރޫމަށް ބޭނުންވާ ހުރިހާ އެއްޗެއްސެއް އަދި މުޅިން ހަމަނުވިޔަސް އެކަމަށް ބޭނުންވާ ފަންޑު ލިބިފައިވާކަމަށް މިކަލް ނޫހަށް މައުލޫމާތު ލިބިފައިވެއެވެ. ރޫމަށް ބޭނުނވާ ބައެއް ޚާއްސަ ބައިތައް ރާއްޖެއިން ލިބެން ނެތުމުން އެއްޗެހި ރާއްޖެއިން ބޭރުން ހޯދުމުގެ މަސައްކަތް ވެސް ކުރެވެމުންދާކަމަށް މައުލޫމާތު ލިބެއެވެ. މިރޫމު ހުޅުވުމާއެކު ސްޕެޝަލް ނީޑްސް ކުދިންނަށް ޚާއްސަ ތެރަޕިސްޓުންގެ ޚިދުމަތް ވިޒިޓިން ތެރަޕިސްޓުން މެދުވެރިކޮށްދ ދެމުން ގެންދާނެއެވެ. މިޚިދުމަތް ޔުނިޓްގެ ޚިދުމަތްތައް މިސަރަހައްދުގެ ހުރިހާ ރަށަކަށް ދިނުމަށް ރޭވިފައިވާކަމަށް މައުލުމާތު ލިބެއެވެ.
ހޭޒްގެ ސެން ކުދިން އުނގެނުމުގެ ހަރަކާތްކުގެ ތެރެއިން
ފުވައްމުލައް ސިޓިގައި 3 ސްކޫލެއްގައި ޚާއްސަ އެހީއަށް ބޭނުންވާ ކުދިންނަށް ކިޔަވައިދިނުމަށް މަސައްކަތް ކުރުމަސްވުރެ އެއް ސްކޫލެއްގައި އެފަދަ ކުދިންނަށް ކިޔަވައިދިނުން ކުރޔަށް ގެންދެވެނަމަ ދަރިވަރުންނަށް އެކަމުން ލިބިގެންދާފައިދާ ބޮޑުވެގެންދާނެއެވެ. ގެ ކައިރީގައި ހުންނަ، އަދި އެންމެ ފަސޭހައިން ގެންދެވޭ ސްކޫލަށް ކުދިން ފޮނުވުމުގެ ވިސްނުން ދޫކޮށްލައި ކުދިންނަށް އެންމެ ފައިދާހުރި ގޮތަކަށް ކިޔަވައި ދިނުމުގެ ކަންކަން ރޭވުން މުހިންމެވެ. ކައިރީގައި ނުވަތަ ދުރުގައި ހުއްޓަސް މިހާރު ބެލެނިވެރިން ސްކޫލަށް ދަރިވަރުން ގެންދަނީ ސައިކަލުގައި ނުވަތަ ކާރުގައެވެ. ވުމާއެކު ސްކޫލަށް ގެންގޮސް ގެނައުން އެއީ މިހާރު އެހާ އުނދަގޫކަމެއް ކަމުގައި ނުބެލެވެއެވެ.
ޚިޔާލުތައް