އަންހެނުންގެ ތަރައްގީއަށް މަސައްކަތް ކުރާ ކޮމެޓީ މެމްބަރުންނަށް ދެނީ ދެ އެލަވަންސެއް

އަލަށް މަގާމާއި ހަވާލުވެފައިވާ އަންހެނުންގެ ތަރައްގީއަށް މަސައްކަތްކުރާ (އ.ތ.މ) ކޮމެޓީއަށް ދޭން ހަމަޖެހިފައި ވަނީ އެލަންވަސްތަކެއް ކަމަށް ފުވައްމުލައް ސިޓީ ކައުންސިލްގެ ޑިރެކްޓާ ޖެނެރަލް އަހުމަދު ނިޖާހު ހާމަކުރައްވައިފިއެވެ. ނިޖާހު މިކަން ހާމަކުރެއްވީ ފުވައްމުލައް ސިޓީގެ މިހާރު ޙާލަތު ބަޔާންކޮށްދިނުމަށް ސިޓީ ކައުންސިލުން ރޭ ކުރިޔަށް ގެންދިޔަ ނޫސްވެރިންގެ ބައްދަލުވުމުގައި މިކަލް ނޫހުން ކުރި ސުވާލަކަށް ޖަވާބުދެއްވުމުގެ ގޮތުންނެވެ.

ރޭގައި ބޭއްވި ނޫސްވެރިންގެ ބައްދަލުވުމުގައި ޑީޖީ ނިޖާހު މައުލޫމާތު ދެއްވަނީ

ލޯކަލް ކައުންސިލްތަކުގެ ގާނޫނަށް (ގާނޫނު ނަމްބަރު 7/2010) ގެނައި 8 ވަނަ އިސްލާހުގައި އ.ތ.މ ކޮމެޓީއަށް އުޖޫރައެއް ކަނޑައެޅުމަށް ވެއެވެ. އެގޮތުން ލޯކަލް ގަވަމެންޓް އޮތޯރިޓީ އާއި މަޝްވަރާކޮށް ފިނޭންސް މިނިސްޓްރީއިން އ.ތ.މ ކޮމެޓީގެ މެމްބަރުންނަށް އުޖޫރައެއްގެ ގޮތުގައި ކަނޑައަޅާފައި ވަނީ ކޮންމެ މަހަކު ދެ އެލަވަންސެއް ދޭގޮތަށެވެ.

ކޮމެޓީގެ ރައީސާ – ދާއިމީ އެލަވަންސް 2000ރ. ޖަލްސާ  އެލަވަންސް 250ރ ޖުމްލަ 3000 ރުފިޔާ

ކޮމެޓީގެ  ނާއިބުރައީސާ – ދާއިމީ އެލަވަންސް 1500ރ. ޖަލްސާ އެލަވަންސް 250ރ ޖުމްލަ 2500 ރުފިޔާ

ކޮމެޓީ މެމްބަރުން – ދާއިމީ އެލަވަންސް 1000ރ. ޖަލްސާ އެލަވަންސް 250ރ ޖުމްލަ 2000 ރުފިޔާ

އ.ތ.މ ކޮމެޓީގެ މެމްބަރުން އިގުރާތުގައި ސޮއިކުރުން

އ.ތ.މ ކޮމެޓީގެ ހަރަކާތްތައް ހިންގުމަށް ކޮންމެ އަހަރެއްގެ ކައުންސިލް ބަޖެޓުގެ %5 ދޭގޮތަށް ވެސް ވަނީ ނިންމާފައެވެ. އަދި ކޮމެޓީ މެމްބަރުންގެ އުޖޫރަ ހަމަޖައްސަން ޖެހެނީ ކައުންސިލްގެ ބަޖެޓުން ލިބޭ %5 ގެ ތެރެއިންނެވެ.

ފުވައްމުލައް ސިޓީ އ.ތ.މ. ކޮމެޓީގެ އިދާރީ އޮފީސް، ގުރުއާނާއި ބެހޭ މަރުކަޒު ހިންގާ އިމާރާތުގައި ގާއިމުވެފައި ވާތާ 2 އަހަރެއްހާ ދުވަސް ވެއްޖެ ކަމަށާއި އެތަނުގައި ބައްދަލުވުންތައް ވެސް ބޭއްވޭނެ ކަމަށް ނިޖާހު ހާމަކުރެއްވިއެވެ. ކޮމެޓީގެ އިދާރީ މަސައްކަތަށް ސިޓީ ކައުންސިލްގެ އިދާރީ މުވައްޒަފަން ބޭނުންކޮށްގެން ކުރެވޭނެ އިންތިޒާމު މިހާރުވެސް ހަމަޖެފައިވާ ކަމަށެވެ. އަދި މީގެއިތުރުން ދާއިމީ އިދާރީ މުވައްޒަފަކު ނަގަން ހުންނަ ބޭނުންނަމަ އެގޮތަށް އ.ތ.މ. ކޮމެޓީއިން ފާސްކޮށްގެން އެކަންވެސް ކުރެވިދާނެ ކަމަށް ވިދާޅުވިއެވެ.

އ.ތ.މ. ކޮމެޓީއަށް މިގެނެވުނު ބަދަލާއެކު އެކޮޓީއަށް އެކަށީގެންވާ ބޮޑު ބަޖެޓެއް ލިބިފައި ވާނެކަމަށާއި އަދި ގިނަގުނަ ހަރަކާތްތަކެއް ހިންގި ދާނެކަމަށް ނިޖާހު ފާހަގަކުރެއްވިއެވެ. އަދި ނިޖާހު ޔަގީން ކުރައްވަނީ މިހާރު އިންތިޚާބު ވެގެން މަގާމާއި ހަވާލުވަފައިވާ ފަރާތްތަކަށް އެކަން ކުރެއްވޭނެކަމަށެވެ. އެގޮތުން ކޮންމެ އަހަރެއްގައި ހިންގާނެ ހަރަކާތްތަކުގެ ޕްލޭނާއި، އަހަރީ ބަޖެޓެއް ހަދައި އެކަންތައްތައް ކުރިޔަށް ގެންދިއުމަށް މިއޮތީ ފުރުސަތު ހުޅުވިފައި ކަމަށް ވިދާޅުވިއެވެ.

އ.ތ.މ ކޮމެޓީގެ އެލްވަންސްތައް އަދި އަހަރީ ބަޖެޓް 2021

އަންހެނުގެ ތަރައްގީ އަށް މަސައްކަތް ކުރާ ކޮމެޓީގެ މަސްއޫލިއްޔަތުތައް (ގާނޫނު ނަމަބަރު 7/2010 ގެ 58 ވަނަ މާއްދާ)

– ސިޓީ ތަރައްގީގެ ކަންކަމުގައި ކައުންސިލުން ދެމުންގެންދާ ރަށްވެހިކަމުގެ ޚިދުމަތްތަކާއި ބެހޭގޮތުން ސިޓީ ކައުންސިލަށް ލަފާދެވިދާނެ.

– ކޮމެޓީގެ ނަމުގައި މުދާ މިލްކުކުރުމާއި ކޮމެޓީއިން އެކިނަންނަމުގައި ވިޔަވާރީގެ މުއާމަލާތުތައް ކުރެވިދާނެ.

– އާމްދަނީ ހޯދުން.

– އަންހެނުންގެ ތަރައްގީއަށް އެކިއެކި ހަރަކާތައް ހިންގުން.

– ދީނީ ކަންކަމުގައި އަންހެނުންގެ ހޭލުންތެރިކަން އިތުރުކުރުން.

– އަންހެނުންގެ ސިއްޙީ ހާލަތު ރަނގަޅު ކުރުމަށް މަސައްކަތް ކުރުން.

– ސިޔާސީ ކަންކަމުގައި އަންހެނުންގެ ބައިވެރިކުރުމަށް މަސައްކަތް ކުރުން އިތުރުކުރުން.

– މަތީތައުލީމު ހޯދުމަށް ބޭނުންވާ އަންހެނުންނަށް އެފުރުސަތު ހޯދާދިނުމާއި މަތީތައުލީމަށް ކިޔަވާ އަންހެނުންގެ އަދަދު އިތުރުކުރުމަށް މަސައްކަތް ކުރުން.

– އަންހެންނާއި ބެހޭ މުހިންމު މައުލޫތުތައް އެއްކުރުމާއި ދިރާސާކުރުން.

– ކޮމެޓީގެ ނަމުގައި ދައުވާކުރުމާއި ދައުވާ ލިބިގަތުން.

– ކޮމެޓީގެ މާލިއްޔަތުގައި ހުންނަ މުދަލާއި ފައިސާ ބެލެހެއްޓުން.