އިބްރާހިމް ލަތީފް އަގްޣާނިސްތާނުގައި ކުރިއަށްދާ ހަގުރާމަ ނިމިއްޖެކަމަށް ތާލިބާނު ހަގުރާމަވެރިން އިއުލާންކޮށްފިއެވެ. ހުޅަނގުގެ މަދަދާއިއެކު އަފްޣާނިސްތާނުގައި ގާއިމުވެފައިވާ ސަރުކާރާއި ދެކޮޅަށް ހަގުރާމަކުރަމުންދިޔަ ތާލިބާނު ހަގުރާމަވެރިން މިހާރުވަނީ އެގައުމުގެ ވެރިރަށް ކާބުލްއަށް މިހާރު ވަނދެފައެވެ. އަދި އެގައުމުގެ ރައީސް އަޝްރަފް ޣަނީ މިހާރުވަނީ އެގައުމު ދޫކޮށް ވަޑައިގެންފައެވެ.
ތާލިބާނު ހަގުރާމަވެރިން މިއަދުވަނީ ރިއާސީ ގަނޑުވަރުގެ އެޖަމާއަތުގެ ބެލުމުގެ ދަށަށް ގެނެސްފައެވެ. މިކަމާއި ގުޅިގެން ހުޅަނގުގެ ޑިޕްލޮމެޓުންތައް ދަނީ އެގައުމު ދޫކޮށް ދިއުން އަވަސްކުރަމުންނެވެ. މީގެ އިތުރުން އަފްޣާނިސްތާނު ދޫކޮށް ދަތުރުކުރުމަށް ދާ މީހުންތަކުން އެގައުމުގެ ކާބުލް އެއާޕޯޓު ފުރިބާރުވެފައިވާ ކަމަށް އަލްޖަޒީރާ އިން ރިޕޯޓުކުރެއެވެ.
ފާއިތުވީ 20 ވަރަކަށް އަހަރަށް ދިގުދެމިގެން ދިޔަ ހަގުރާމައަށްފަހު ތާލިބާނުން އަނެއްކާވެސް އަފްޣާނިސްތާނުގެ ވެރިކަމަށް އައުމާއިއެކު، ފާއިތުވީ 20 އަހަރު ހިގި ހަގުރާމާގައި އެކިގޮތްގޮތުން އެމެރިކާއަށް ވާގިވެރިވި މީހުން އެގައުމު ދޫކޮށްދާން މިހާރުވަނީ ފަށާފައެވެ. އެގޮތުން 44 ހާހަށްވުރެ ގިނަ މީހުން ކާބުލްއިން ބޭރުގައިވެސް ވާނެކަމަށް އެމެރިކާގެ ކުރީގެ ސިފައިނގެ މީހެއްކަމަށްވާ މެޓް ޒެލާ ހާމަކުރެއެވެ. މެޓް ޒެލާ ހާމަކުރާ ގޮތުގައި 44 ހާހެއްހާ މީހުން ވަނީ ފާއިތުވީ 20 އަހަރު ދުވަސްތެރޭ ހިގި ހަގުރާމައިގައި އެމެރިކާއަށް އެހީތެރިވެދީފައެވެ. އެހެންކަމުން މިމީހުން އަވަހަށް އެގައުން ބޭރުކުރަންޖެހެއެވެ.
ފާއިތުވީ 10 ވަރަކަށް ދުވަސްތެރޭ ތާލިބާނު ހަގުރާމަވެރިން ވަނީ އަފްޣާނިސްތާނުގެ 34 ޕްރޮވިންސްގެ ތެރެއިން 26 ޕްރޮވިންސްގެ ވެރިރަށް އެމީހުންގެ ބާރުގެ ދަށަށް ގެނެސްފައެވެ.
އަފްޣާނިސްތާނުގައި ތާލިބާނުން ކުރަމުން އައި ވެރިކަން 2001 ވަނަ އަހަރު ނިމުމަކަށް ގެނައީ އެމެރިކާ އިސްވެއޮވެ ހުޅަނގުގެ ބާރުތަކުގެ ލަޝްކަރަކާއިއެކު އަފްޣާނިސްތާނު ހިފުމުންނެވެ.
ޚިޔާލުތައް