މުހައްމަދު ޝިހާބް ދިވެހިރާއްޖޭގެ ރައީސުލް ޖުމްހޫރިއްޔާ ކަމާއި ރައީސުލް ޖުމްހޫރިއްޔާގެ ނާއިބު ފައިސަލް ނަސީމު މިއަދު ހެނދުނު ވަގުތީ ގޮތުން ހަވާލުވެ ވަޑައިގެންފިއެވެ. މިއާއެކު ދިވެހިރާއްޖޭގެ ރައީސްކަން ކުރިމީހުންގެ ލިސްޓަށް ފައިސަލް ނަސީމުގެ ނަންވެސް އިތުރުވެގެން ދިޔައީއެވެ.
ރައީސުލްޖުމްހޫރިއްޔާގެ ޒިންމާއާއި ވާޖިބުތަކާއި ރައީސުލްޖުމްހޫރިއްޔާގެ ނާއިބު ފައިސަލް ނަސީމް ހަވާލުވެވަޑަގަތީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، އެމަނިކުފާނުގެ މަޤާމުގެ މަސްއޫލިއްޔަތުތަކާއި ވާޖިބުތައް އަދާކުރެއްވުމަށް ވަގުތީގޮތުން ޢުޛުރުވެރިވެޑައިގަންނަވާ ޙާލަތެއް މެދުވެރިވެފައިވާތީއެވެ.
ރައީސުލްޖުމްހޫރިއްޔާގެ މަސްއޫލިއްޔަތުތައް އަދާކުރެއްވުމަށް ވަގުތީގޮތުން ޢުޛުރުވެރިވެވަޑައިގަންނަވާ ފަދަ ޙާލަތެއް މެދުވެރިވެފައިވާތީ ޤާނޫނު އަސާސީގެ 123 ވަނަ މާއްދާގެ (ހ)ގައި ވާގޮތުގެ މަތިން ރައީސުލްޖުމްހޫރިއްޔާ ވަނީ ސަބަބު ބަޔާންކުރައްވައި ރައްޔިތުންގެ މަޖިލީހުގެ ރައީސަށް ލިޔުމުން އެކަން އެންގެވުމަށްފަހު ރައީސުލްޖުމްހޫރިއްޔާގެ މަސްއޫލިއްޔަތުތަކާއި ވާޖިބުތައް ރައީސުލްޖުމްހޫރިއްޔާގެ ނައިބާ ވަގުތީގޮތުން މިއަދު ހެނދުނު 6:00 އިން ފެށިގެން ޙަވާލުކުރައްވާފައެވެ.
ރައީސުލް ޖުމްހޫރިއްޔާގެ ޒިންމާއާއި ވާޖިބުތަކާއި ރައީސުލްޖުމްހޫރިއްޔާގެ ނާއިބު ފައިސަލް ނަސީމް މިއަދު ހެދުނު ހަވާލުވުމުގެ ކުރިން ވަނީ ރައީސުލް ޖުމްހޫރިއްޔާކަމުގެ ހުވާވެސް ކުރައްވާފައެވެ. ރައީސްކަމުގެ ހުވާ ނާއިބު ރައީސްކުރެއްވީ މިއަދު ހެނދުނު ރައްޔިތުންގެ މަޖުލިސްކުރާ ގޭގައި ބޭއްވި ރަސްމިއްޔާތެއްގައި، ރައްޔިތުންގެ މަޖުލީހުގެ ރައީސް މުހައްމަދު ނަޝީދުގެ ކުރިމަތީގައެވެ. ހުވާ ލާދެއްވީ އުއްތަމަ ފަނޑިޔާރު މުއުތަސިމު އަދުނާނެވެ.
ރައީސުލްޖުމްހޫރިއްޔާގެ މަސްއޫލިއްޔަތުތައް ވަގުތީގޮތުން ރައީސުލްޖުމްހޫރިއްޔާގެ ނައިބާ ޙަވާލުކުރެއްވީ ރައީސުލްޖުމްހޫރިއްޔާ، ތައިރޮއިޑް ފަރުވާއަކަށް އޮޕަރޭޝަނެއް މިއަދު ކުރައްވާތީ، އެ އޮޕަރޭޝަނަށްފަހު އަލުން އެމަނިކުފާނު ރައީސުލްޖުމްހޫރިއްޔާގެ މަޤާމުގެ މަސްއޫލިއްޔަތުތަކާއި ވާޖިބުތަކާ ޙަވާލުވެވަޑައިގަންނަވަންދެނެވެ.
ގާނޫނު އަސާސީގެ 123 ވަނަ މާއްދާގެ ހ. ގައި އޮތީ “ރައީސުލް ޖުމްހޫރިއްޔާއަށް އޭނާގެ މަގާމުގެ މަސްއޫލިއްޔަތުތަކާއި ވާޖިބުތައް އަދާކުރުމަށް ވަގުތީ ގޮތަން އުޒުރުވެރި ވެއްޖެ ކަމަށް ގަބޫލުކުރެވިއްޖެނަމަ، ސަބަބު ބަޔާންކޮށް އެކަން ރައްޔިތުންގެ މަޖުލީހުގެ ރައީސަށް ލިޔުމަކުން އެންގެވުމަށްފަހު ރައީސުލްޖުމްހޫރިއްޔާގެ މަސްއޫލިއްޔަތުތަކާއި ވަޖިބުތައް އަދާކުރުމަށް ރައީސުލް ޖުމްހޫރިއްޔާގެ ނާއިބާ ހަވާލުކުރަން ވާނެ” ކަމަށެވެ.
މިއީ ދިވެހިރާއްޖޭގެ ރައީސުލް ޖުމްހޫރިއްޔާގެ ނާއިބަކު މިގޮތަށް ގާނޫނުގައި ބަޔާންކުރާ ގޮތުގެ މަތިން ސުލްހަވެރިކަމާއެކު ރައީސްކަމާއި ހަވާލުވި ފުރަތަމަ ފަހަރެވެ.
ޚިޔާލުތައް