އިބްރާހިމް ލަތީފް މިއަހަރު ޖުލައިމަހުތެރޭ ފުވައްމުލަކުގެ އެތެރޭމަގުތަކުގެ ތާރުއެޅުމުގެ މަސައްކަތް ފެށުމަށް ވާންޖެހޭ ތައްޔާރީތައްވަމުންދާ އެމްޓީސީސީ އާއި ހަވާލާދީ ފުވައްމުލަކު ސިޓީ ކައުންސިލުން ހާމަކުރެއެވެ. ފުވައްމުލަކުގެ މަގުތައް ހެދުމުގެ މަސައްކަތް ކުރިއަށްދާގޮތާއި ގުޅޭ މައުލޫމާތު ހިއްސާކުރުމަށް އިއްޔެ ވަނީ ފުވައްމުލަކު ސިޓީ ކައުންސިލާއިއެކު އެއްކޮށް އެމަސައްކަތް ކުރިއަށްގެންދާ އެމްޓީސީސީއިން ބައްދަލުވުމެއް ބާއްވާފައެވެ. މިބައްދަލުވުމުގައި އެމްޓީސީސީއިން ކުރިއަށްގެންދާ މަގު ހެދުމުގެ މަސައްކަތުގެ އިތުރުން ދަތުރުފަތުރާއި ގުޅޭ މައުލޫމާތު ދެވުނުކަމަށްވެސް ސިޓީ ކައުންސިލުން ހާމަކުރެއެވެ.
މިއަހަރު ނިމުމުގެ ކުރިން މިނީ ބަސްތަކެއް ގެނެސް ފުވައްމުލަކުގެ ބަހުގެ ޚިދުމަށް އަލުންފެށުމަށް ރާވަމުންދާ ކަމަށްވެސް އެމްޓީސީސީ އާއި ހަވާލާދީ ފުވައްމުލަކު ސިޓީ ކައުންސިލުން ހާމަކުރެއެވެ.
ފުވައްމުލަކު އެތެރޭ މަގުތައް މިއަހަރު ނޮވެންބަރު މަހުގެ ކުރިން ނިންމާ ރައްޔިތުންނަށް ހަވާލުކުރެވޭނެ ކަމަށް އެމްޓީސީސީގެ ސީއީއޯ އާދަމް އާޒިމް ވަނީ މިދިޔަ ފެބުރުއަރީ މަހު ސޯޝަލް މީޑިއާގައި ލިއުއްވާފައެވެ. މަގުހެދުމުގެ މަސައްކަތް ލަސްވެގެންދިޔައީ އެމަސައްކަތަތަށް ބޭނުންވާ ސާމާނުތަކެއް އިމްޕޯޓް ކުރަންޖެހުމާއި ކޮވިޑާއި ގުޅިގެން ލޮޖިސްޓިކް ދަތިތައް ހުރެގެން އެސާމާނުތައް ލިބުން ލަސްވުމުން ކަމަށްވެސް އާޒިމްވަނީ މީގެކުރިން ވިދާޅުވެފައެވެ.
ފުވައްމުލައް ސިޓީގެ އެތެރޭގެ 31 މަގެއް ހެދުމުގެ މަސައްކަތް އެމްޓީސީސީއާ ހަވާލުކޮށްފައި ވަނީ 2019 ވަނަ އަހަރުގެ ޖުލައި މަހުގެ 04 ވަނަ ދުވަހެވެ. އަދި އަމަލީ މަސައްކަތް ފަށާފައިވަނީ ޖުލައި 20، 2020 ގައެވެ.
ޚިޔާލުތައް