ޝަހީދުންގެ ދުވަސް ޤައުމީ ފެންވަރުގައި ފާހަގަކުރުން ފުވައްމުލައް ސިޓީގައި

މިއަހަރުގެ ޝަހީދުންގެ ދުވަސް ޤައުމީ ފެންވަރުގައި ފާހަގަ ކުރަމުން އަންނަނީ ފުވައްމުލައް ސިޓީގައެވެ. ދުވަހާއި ގުޅިގެން ފުވައްމުލައް ސިޓީގައި އަންނަނީ ތަފާތު ހަރަކާތްތަކެއް ހިންގަމުންނެވެ.

މި އަހަރު ޝަހީދުންގެ ދުވަސް ފާހަގަ ކުރުމަށް ބާއްވާ ޖަލްސާގައި ބައިްވެރިވެ ވަޑައިގަތުމަށް ސަރުކާރުގެ ބައެއް އިސްވެރިންނާއި ރައްޔިތުންގެ މަޖުލީހުގެ ފުވައްމުލަކު 3 މެމްބަރުން ވެސް މިއަދު ވަނީ ރަށަށް ވަޑައިގެންފައެވެ. މިދުވަހުގެ ރަސްމީ ޖަލްސާ ބޭއްވުމަށް ހަމޖެހިފައިވަނީ، މާދަމާ، 4 މާރިޗު ވާ ހުކުރު ދުވަހުގެ ރޭ 20:30 ރަސްމީ ބޯޅަދަނޑުގައެވެ.

ސަރުކާރުން މިއަހަރުގެ ޝަހީދުންގެ ދުވަސް ފާހަގަކުރުމަށް މިނިސްޓްރީ އޮފް ހޯމް އެފެއާޒް އާއި ފުވައްމުލައް ސިޓީ ގުޅިގެން ވަނީ ކުރެހުމުގެ މުބާރާތަކާއި، ސްކޫލްކުދިންގެ ސުވާލު މުބާރާތެއްގެ އިތުރުން ފުވައްމުލައް ސިޓީ ސާފުކުރުމުގެ ޕްރޮގްރާމެއް ވެސް ކުރިޔަށް ގެންގޮސްފައި ވެއެވެ.

ޝަހީދުންގެ ދުވަހަކީ އަލިރަސްގެފާނު ޝަހީދުވެ ވަޑައިގެންނެވި ދުވަސްހާއި ގުޅިގެން ސަރުކާރުން ފާހަގަ ކުރަމުން އަން ދުވަހެކެވެ. އަލިރަސްގެފާރުނ ގައުމުގެ ދިފާއުގައި ހަނގުރާމަ ކުރައްވަނިކޮށް ޝަހީދުވެ ވަޑައިގަތީ 965ހ. ވަނަ އަހަރުގެ ޝަޢުބާން މަހުގެ އެއްވަނަ ދުވަހުގައެވެ. އެއީ މީލާދީ ތާރީޚުން 19 މޭ 1558 ގައެވެ. މިދުވަހަކީ ހިޖުރީ ކަލަންޑަރަށް ބަލައިގެން ފާހަގަކުރަމުން އަންނަ ދުވަކަށްވުމުން، މިއަހަރުގެ ޝަހީދުންގެ ދުވަސް ދިމާވަނީ މާރިޗު މަހު 4 ވާ ހުކުރު ދުވަހަށެވެ.