އިބްރާހިމް ލަތީފް ފާއިތުވީ ޖުލައި މަހު އެންމެ ބޮޑު ސާވިސްޗާޖެއް ދިން ކަމަށް ރިޕޯޓްކޮށްފައިވާ އިތާފުށި ފަހަތަށް ޖައްސާލުމަށް ނިމުނު އޮގަސްޓްމަހުގެ ސާވިސް ޗާޖުގެ ލިސްޓުގެ ކުރިއަށް ނޯޓިލަސް ޖެހިލައިފިއެވެ. ރާއްޖޭގެ ރިސޯޓްތަކުގައި ސާވިސް ޗާޖުދެވޭ ގޮތުގެ މައުލޫމާތު ހާމަކުރާ ހަލާ މަލްދީފް.ކޮމް އިން ހާމަކުރި ފާއިތުވީ އޮގަސްޓްމަހުގެ ސާވިސް ޗާޖަށް ބަލާއިރު ނޯޓިލަސް އިން 1،623 ޑޮލަރު ސާޗިސްޗާޖުގެ ގޮތުގައި ކޮންމެ މުވައްޒަފަކަށް ދިންއިރު ރިޒް ކާލްޓަންގެ ފަރި އައިލެންޑް އިން ދީފައިވަނީ 1،352.10 ޑޮލަރެވެ. އަދި އޭގެ ކުރީ މަހުގެ ސާވިސް ޗާޖުގެ ގޮތުގައި އެންމެ ބޮޑު އަދަދެއް ދޫކުރި އިތާފުށިން ދީފައިވަނީ 1،263.95 ޑޮލަރެވެ.
މިދިޔަ އޮގަސްޓްމަުގެ ސާވިސް ޗާޖުވަނީ އޭގެ ކުރީ މަހުގެ ސާވިސްޗާޖަށްވުރެ މައްޗަށް ޖެހިލައިފައެވެ. އެގޮތުން، މިދިޔަ ޖުލައި މަހުގެ ސާވިސްޗާޖުގެ ގޮތުގައި އިތާފުށިން ދީފައިވަނީ 1،175.83 ޑޮލަރެވެ. އަދި ރިޒު ކާލްޓަންގެ ފަރި އައިލެންޑް އިން ދީފައިވަނީ 1،140.48 ޑޮލަރެވެ. ނަމަވެސް، ފާއިތުވީ މެއީ މަހުގެ ސާވިސް ޗާޖަށް ދީފައިވާ އަދަދު މިދިޔަ އޮގަސްޓް މަހުގެ ސާވިސް ޗާޖަށްވުރެ ބޮޑެވެ. އެގޮތުން، ވެލާ އައިލެންޑް މެއީ މަހު 1،660.03 ޑޮލަރު ދީފައިވާ އިރު އިތާފުށިން 1،486.33 ޑޮލަރު އަދި ރަންދެލިއިން 1،380.31 ޑޮލަރު ދީފައިވެއެވެ. ހަލާ މަލްދީފްގެ ތަފާސް ހިސާބުތަކަށް ބަލާއިރު މިއަހަރު މިހާތަނަށް އެންމެ ބޮޑު ސާވިސްޗާޖެއް ދީފައިވަނީ މިއަހަރުގެ ޖެނުއަރީ މަހު ވެލާ އައިލެންޑް އިންނެވެ. އެއީ 4،079.10 ޑޮލަރެވެ. ޖެނުއަރީ މަހަށްފަހު އެއަދަދު ދަށަށް ގޮސްފައިވާކަން ފާހަގަކުރެވެއެވެ. އަދި އެއަށްފަހު އެއަދަދު ކުރިއަރާފައިވަނީ މިދިޔަ މަހުގައެވެ.
ސާވިސް ޗާޖުގެ ގޮތުގައި ބައެއް ރިސޯޓްތަކުން ބޮޑެތި އަދަދުންދޭއިރު އަނެއް ބައި ރިސޯޓުތަކުން ސާވިސްޗާޖުގެ ގޮތުގައި ދެމުންދަނީ ކުޑައަދަދެކެވެ. އެގޮތުން، މިދިޔަ އޮގަސްޓްމަހު ރަފްސް މެރަދޫއިން ސާވިސް ޗާޖުގެ ގޮތުގައި 200 ޑޮލަރު ދިންއިރު ދިގަލިން ދީފައިވަނީ 264 ޑޮލަރެވެ.
ރިސޯޓުތަކުގެ ސާވިސްޗާޖުގެ ޝަކުވާ ބޮޑުވެ ވަޒީފާބެހޭ ގާނޫނަށްވެސް ބަދަލުގެނެވުނެވެ. މިބަދަލާއިއެކު ސާވިސްޗާޖު މިހާރު ބަހަމުންދަނީ ރަގަޅަށްކަމަށް މީގެ ކުރިން ޓްއަރިޒަމް މިނިސްޓަރުވަނީ ބުނެފައެވެ. މިބަދަލަށްފަހު މިދިޔަ ޖުލައިމަހު ޓުއަރިޒަމް މިނިސްޓަު ޑރ. އަބްދުﷲ މައުސޫމް ވިދާޅުވެފައިވަނީ ރިސޯޓުތަކާއި އެހެން ޓޫރިސްޓު ފެސިލިޓީތަކުން ސާވިސް ޗާޖު ބަހަނީ ރަނގަޅަށް ކަމަށެވެ. މިނިސްޓަރު މައުސޫމް ވިދާޅުވީ “މިހާރު ތިބެނީ ވަރަށް އެޑިއުކޭޓެޑް ކުދިން. އެކުދިން ހިސާބު ކޮށްލާނެ އެތަނަށް ވަންނަ ވަރު. އަދި ހިސާބު ކޮށްލާފައި އެއިން ޖެހޭ އަދަދުވެސް އެނގޭނެ. އެހެންވެ ސާވިސް ޗާޖުގެ ގާނޫނަށް ގެނައި ބަދަލާއި ލޭބާ ރިލޭޝަންސް އޮތޯރިޓީން އެއާ ގުޅިގެން ހެދި ގަވާއިދުގެ އަލީގައި އަޅުގަނޑުމެން މިބަލަނީ ސާވިސް ޗާޖުގެ ކަންކަން ރަނގަޅަށް ދާ ކަމަށް”ވެ.
ޚިޔާލުތައް