މުހައްމަދު ޝިހާބް ކުރިޔަށް އޮތް 2021 ވަނަ އަހަރަށް ހުށައަޅައިފައިވާ ބަޖެޓުގައި ފުވައްމުލައް ސިޓީއަށް ކަނޑައަޅާފައިވާ މަޝްރޫއުތަށް ދަރަންޏަށް ފައިސާ ނަގައިގެން ވެސް ކުރަން ރައްޔިތުން ބޭނުންކަމަށް ފުވައްމުލައް ދެކުނު ދާއިރާގެ މެމްބަރު މުހައްމަދު މުމްތާޒް މަޖުލިސް ބަޖެޓް ބަހުސްގައި ވިދާޅުވެއްޖެއެވެ.
މުމްތާޒު ވިދާޅުވިގޮތުގައި ދައުލަތެއް ނުވަތަ ސަރުކާރެއްގެ ބޭނުމަކީ ރައްޔިތުން އެދޭ ކަންތައް ކޮށްދިނުން ކަމަށެވެ. އެގޮތުން އެއީ ދަރަންޏަށް ނަގައިގެން ވިއަސް އެހެން ހާލެއްގައި ވިޔަސް ރައްޔިތުން އެދޭ ކަންތައް ކޮށްދިނުމަކީ ސަރުކާރުގެ ޒިންމާއެއް ކަމަށެވެ.
“ފުވައްމުލަކު ދެކުނު ދާއިރާގެ މަދު ކަންތަކެއް މި ބަޖެޓުގައި ހިމެނެނީ، އޭގެ ތެރެއިން މިހާރު އެންމެ ބޮޑު މައްސަލައަކަށް މިއޮތީ ފުޓުބޯޅަ ދަނޑުގެ ވާހަކަ. ފުވައްމުލަކު ދެކުނު ދާއިރާގެ ފުޓުބޯޅަ ދަނޑުގެ ވާހަކައަކީ ޒުވާނުން އެތަށް ދުވަހެއްވަންދެން، ފާއިތުވި 20 އަހަރު ދުވަސް ވަންދެން އުއްމީދެއްގައި ތިބި ދަނޑެއް. އެހެން ނަމަވެސް ފާއިތުވި 20 އަހަރުގައިވެސް އެންމެ ކުޑަ މިނުން ބަޖެޓުގައި ވެސް ހިމެނިފައެއް ނެތް. އެހެން ނަމަވެސް މިއަހަރުގެ ބަޖެޓުގައި ވެސް އޮތް، ނަމަވެސް ހާލަތު ދިމާކުރި ގޮތުން ނުވެ ދިޔައީ، އަންނަ އަހަރުގެ ބަޖެޓުގައިވެސް އެބައޮތް” މުމްތާޒް ވިދާޅުވިއެވެ.
ފުވައްމުލަކު ދެކުނު ދާއިރާގެ ފުޓުބޯޅަ ދަނޑަށް މިއަހަރުގެ ބަޖެޓުގައި 2.875 މިލިޔަން ރުފިޔާ އަދި އަންނަ އަހަރަށް 1.125 މިލިޔަން ރުފިޔާ ހިމަނާފައި ވެއެވެ. ނަމަވެސް މިއަހަރު އެމަސައްކަތް ކުރެވެގޮތް ވަނީ ނުވެފައެވެ. މިއަހަރު ފުވައްމުލަކުގައި މަސއްކަތް ކުރެވުނީ ހޯދަޑު ފުޓްބޯޅަ ދަނޑުގެއެވެ.
“ފުވައްމުލަކު ސްކޫލުގެ ހޯލެއް ނެތި 20 އަހަރު ފާއިތުވެގެން ދިޔައީ، އެންމެ ކުޑަމިނުން ބަޖެޓުގައި ހިމަނައިފަވެސް ނެތް. އެ ހާސިލު ކުރަން ބޭނުންވާ މަގުސަދު، އެއްވެސް ކަމެއް ބަޖެޓުގައި ވެސް ހިމަނައިފައެއް ނެތް. 100 މިލިއަން ޑޮލަރު އެކި ދިމަދިމާލަށް ޚަރަދު ކުރަމުންދާއިރު ފުވައްމުލައް ސްކޫލުގެ ހޯލެއް ނެތި ދަރިވަރުން، ބެލެނިވެރިން އަދި މުދައްރިސުން އިންތިޒާރުކުރާތާ ފާއިތުވި 20 އަހަރު ދިޔައީ. ބަޖެޓުގައި ވެސް ނުހިމެނި. މިއަހަރު އެބައޮތް، އެހެން ނަމަވެސް މިއަހަރުވެސް ދިޔައީ. އަޅުގަނޑުގެ އުއްމީދަކީ އަންނަ އަހަރުގެ ބަޖެޓުގައި މިކަންތައް ހިމެނިފައި އެބައޮތް، މިކަންތައް ތަންފީޒުވެގެން ދިއުން” މުމްތާޒް ވިދާޅުވިއެވެ.
2020 ވަނަ އަހަރު ފުވައްމުލަކުގެ ތައުލީމީ ދާއިރާއަށް ބަޖެތްކުރެވުނު ޕްރޮޖެޓްތައް. – ކޮވިޑް-19 އާއެކު ކުރެވުނީ މަދު ކަމެއް
ފުވައްމުލަކު ސްކޫލުގެ މަލްޓިޕާޕަސް ހޯލެއް އެޅުމަށް މިއަހަރުގެ ބަޖެޓުގައި 2.1 މިލިޔަން ރުފިޔާ އަދި އަންނަ އަހަރަށް 4.82 އަދި 2022 ވަނަ އަހަރުގެ ބަޖެޓްގައި 80 ހާސް ރުފިޔާ ހިމަނާފައި ވެއެވެ. ނަމަަވެސް މިއަރު އެމަސައްކަތް ނުފެށި އޮތުމުން މިހާރު ވަނީ އަންނަ އަހަރަށް ބަޖެޓްގައި ހިމަނާފައެވެ. ނަމަވެސް މިއަހަރު ފުވައްމުލަކު އެމްޖޭއެސް މަލްޓިޕާޕަސް ހޯލުގެ މަސައްކަތް ކުރިޔަށް އެބަދެއެވެ. މި އަހަރަށް 3.22 މިލިޔަން ރުފިޔާ އަދި އަންނަ އަހަރަށް 1.37 މިލިޔަން ރުފިޔާ އެ މަޝްރޫޢަށް ހިމަނާފައި ވެއެވެ.
މީގެއިތުރުން މިއަހަރުގެ ބަޖެޓްގައި ފުވައްމުލަކުގެ ދެކުނު ދާއިރާގައި ހިމެނޭ ހާފިޒް އަހުމަދު ސްކޫލުގައި 16 ކްލާސްރޫމްގެ 3 ބުރި އިމާރާތެއް އެޅުމަށް 2.5 މިލިޔަން ރުފިޔާ އަދި ޏ.އޭއީސީގައި 12 ކްލާސްރޫމް އިމާރާތެއް އެޅުމަށް 2 މިލިޔަން ރުފިޔާ، އަދި އެމްޖޭއެސް 16 ކްލާސްރޫމާއި ކޮމްޕިއުތަރ ލެބް އިމާރާތަށް 2.5 މިލިޔަން ރުފިޔާ ހިމަނާފައި ވިޔަސް މި ތިން ޕްރޮޖެޓްގެ މަސައްކަތް ވަނީ ކުރެވޭގޮތް ނުވެފައެވެ.
2021 ވަނަ އަހަރަށް ބަޖެޓުގައި ފުވައްމުލަކު ދެކުނު ދާއިރާއަށް ހިމަނާފައިވާ މަޝްރޫއުތަކަކީ ފުވައްމުލަކުގެ ދެކުނު ދާއިރާގެ ރައްޔިތުން ގިނަ ދުވަސްތަކެއް ވަންދެން ދެކެމުން އައި ހުވަފެނެއް ކަމުގައި މުމްތާޒް ވިދާޅުވިއެވެ. ކޮވިޑް-19ގެ އިގްތިސާދީ ދަތި ހާލަތުގައި ގައުމު އޮތްއިރުވެސް އަންނަ އަހަރުގެ ބަޖެޓުން ރައްޔިތުންނަށް އުއްމީދު ގެނެސްދޭ ކަމަށް ވިދާޅުވިއެވެ.
“ފުވައްމުލަކު ގިރާ ސަރަހައްދު ހަމަ ގިރަމުން ދަނީ. އަޅުގަނޑުމެން މިދަނީ އަހަރަކަށް ފަހު އަހަރެއް، މިއަންނަ އަހަރު، މިއަންނަ އަހަރު ކިޔަމުން، ގިރާ ސަރަހައްދު ހަމަދަނީ ގިރަމުން. ގިރާ ސަރަހައްދު ހަމަ ބޮޑު ވަމުން ދަނީ. ރައްޔިތުން ބޭނުންވޭ ލޯނެއް ނަގައިގެން ނަމަވެސް، ދަރަންޏެއް ނަގައިގެން ވިއަސް ފުވައްމުލައް ހިމާޔަތްކުރަން. އަޅުގަނޑު ދަންނަވާނީ މިއީ ރައްޔިތުން ހޮވާފައި ތިބޭ ވެރިންގެ ޒިންމާއެކޭ” މަޖުލީހުގެ ބަޖެޓަށް ވާހަކަދައްކަވަމުން މުމްތާޒް ވިދާޅުވިއެވެ.
2020 ވަނަ އަހަރު ފުވައްމުލަކުގެ ތަރައްގީއަށް ބަޖެޓްކުރެވުނު ޕްރޮޖެޓްތައް. -ކޮވިޑް-19 އާއެކުވެސް ގިނަ މަސައްކަތްތަކެއް ކުރިޔަށްދަނީ
ކުރިޔަށް އޮތް އަހަރަށް ސަރުކާރުން ހުށަހަޅާފައިވަނީ ބޮޑު ތަނުން ދަރަނި، 50 އިންސައްތަ ޑެފިސިޓު ބަޖެޓެކެވެ. ނަމަވެސް އެބަޖެޓާކީ ދައުލަތަށް އާމްދަނީ ހޯދިދާނެ ކަމަށް ލަފާކުރާ ބަޖެޓެއް ކަމަށް ގަބޫލުކުރައްވާ ކަމަށް އެމްޕީ މުމްތާޒު ވިދާޅުވިއެވެ.
ކުރިޔަށް އޮތް 2021 ވަނަ އަހަރުގައި ފުވައްމުލަކުގައި ކުރިޔަށް ގެންދިއުމަށް ބަޖެޓްގައި ހިމެނިފައިވާ ޕްރޮޖެޓްތައް
ސްޓޭޓް އޮފް އާރޓް ޓިވެޓް އިންސްޓިޓިއުޝަނެއް ގާއިމުކުރުމުން
ބަނދަރު ސަރަހައްދުގައި މިސްކިތެއް އިމާރާތްކުރުން
ބަނދަރުގައި ސެންޓްރަލް ފެރީ ޓާމިނަލް އެއް ގާއިމުކުރުން
ޏ. އަތޮޅު ތައުލީމީ މަރުކަޒުގައި 12 ކްލާސްރޫމް އިމާރާތެއް އެޅުން
ފުވައްމުލައް ހޮސްޕިޓަލް އިތުރަށް ތަރައްގީކުރުން
2021 ވަނަ އަހަރުގެ ބަޖެޓުގައި ފުވައްމުލައް ސިޓީގެ ތަރައްގީގެ މަޝްރޫއުތައް ހިންގުމަށް، ޖުމްލަ 25 މަޝްރޫއަކަށް 115.878 މިލިޔަން ރުފިޔާ ހުށައަޅައިފައި ވެއެވެ. އެއގެތެރެއިން އަންނަ އަހަރު މުޅިން އަލަށް ފެއްޓުމަށް ބަޖެޓުގައި ހިމަނާފައިވަނީ 15 މަޝްރޫއެކެވެ. އެކުލަވާލައިފައިވާއިރު އަންނަ އަހަރުގެ ބަޖެޓުން އެންމެ ބޮޑު ހޭދައެއް ކުރަން ކަނޑައަޅައިފައި ވަނީ ފުވައްމުލައް ގޮނޑުދޮށް ހިމާޔަތްކުރުމުގެ މަޝްރޫއަށެވެ. އެއީ 81.883 މިލިޔަން ރުފިޔާ ގެ ލޯނާއި އެހީ އަދި ދައުލަތުގެ ބަޖެޓްުން ޚަރަދުކުރާ 60.393 މިލިޔަން ރުފިޔާ، ޖުމްލަ 142.27 މިލިޔަން ރުފިޔާ އެވެ. މިމަޝްރޫޢު ބަޖެޓްގައި ހިމަނާފައިވަނީ މިހާރު ހިނގަމުންދާ މަޝްރޫއެއްގެ ގޮތުގައެވެ.
އަދި އަންނަ އަހަރުގެ ބަޖެޓުގައި ފުވައްމުލަކުގައި ކުރިޔަށްގެންދިއުމަށް ހަމަޖެހިފައިވާ މަޝްރޫއުއަކީ މިހާރުވެސް މާބޮޑަށް ލަސްވެފައިގެން ގޮސްފައިވާ މަޝްރޫޢުތަކެއް ކަމުގައި ވެސް ފުވައްމުލަކު ދެކުނު ދާއިރާގެ މެމްބަރު މުމްތާޒް ވިދާޅުވިއެވެ.
ޚިޔާލުތައް