ޝާހީން މުހައްމަދު - ނިރު ނަވާރަވަނަ ބައި
ވަރަށް ވިއްސާރަ ދުވަހެކެވެ. ކުރީ ދުވަހުގެ އިރު އޮއްސުނީއްސުރެ ވެސް ވާރޭ މެދު ނުކެނޑެއެވެ. ވައިގެ ތެތްފިނިކަން އެހާ ބޮޑެވެ. ހެނދުނު ތެދުވިއިރު ވެސް ވާރޭ ވެހެނީއެވެ. މަގުތަކުގައިވަނީ ފެން ބޮޑުވެފައެވެ. ސައިކަލް ނުދުއްވާމީހުން ކާރެއް އަތުޖެހޭތޯ ބުރަމަސައްކަތްތަކެއް ކުރަނީއެވެ. އެހެންނަމަވެސް މި ކަހަލަ ވިއްސާރަ ދުވަހެއްގައި އަމުދުން ކާރެއް ލިބުން އޮންނަނީ ވުމަށްވުރެ ނުވުން ކައިރި ކަމަކަށެވެ.
ދެކުދިން ސްކޫލަށް ގެންދާނެ ގޮތަކާމެދު ފިކުރު ހިންގަމުން ކުދިން ތައްޔާރުކޮށްގެން ރައިހާ ހުރީ ނިކުމެ ދޮރުމަތީގައެވެ. މަގުމަތިން ދިޔަ އެތައް ކާރަކަށް ރައިހާ އަތްނެގިއެވެ. ހުހަށް ދިއަޔަސް މަޑެއް ނުކުރެއެވެ. ބައެއް ކާރުގައި މީހަކު ނެތަސް ބޯޑް ރަތް ކޮށްގެން ދެއެވެ. ހަދާނެ އެއއްވެސް ގޮތެއް ނެތެވެ. އެއްވެސް ކުއްޖަކު ސްކޫލަށް ނުގޮސް ގޭގައި މަޑު ކުރާކަށް ބޭނުމެއް ނުވެއެވެ. ދަންޏާ ދާން މިޖެހެނީ ތެމިގެންނެވެ. ތެތް ޔުނިފޯމާއެކު ކުލާހުގައި އިންނާނީ ކިހިނެތް ހެއްޔެވެ!
އާމިރު ނުކުތީ އެންމެ ބޭނުންވި ގަޑީގައެވެ. ހީވަނީ އެދެބެންނަށް ސްކޫލަށް ނުދެވި ތިބިކަން އެނގިގެން ނުކުތީ ހެންނެވެ.
ގަރާޖު ހުޅުވައިލުމަށްފަހު ކާރު ނެރެމުން ދެ ކުދިންނަށް ގޮވައިލިއެވެ. ދެކުދިން ބެލީ ރައިހާގެ މޫނަށެވެ. ހުއްދައަށް އެދިއެވެ. ހިނިތުން ވެލަމުން ރައިހާ ބޯ ޖަހައިލީމާ އެބުނީ އާއެކޭ ކަން އެކުދިންނަށް ވެސް ފަހުމުވެއްޖެއެވެ. ދުވެލާފައި ގޮސް ފަހަތުސީޓަށް އަރާ ދެކުދިން އިށީނދެއްޖެއެވެ. އާމިރު އެނބުރިލާފައި އައިނާ ގާތު އެއްޗެކޭ ބުނިތަން ރައިހާ ދުށްޓެވެ. ދެން އައިނާ އެނބުރުނީ ރައިހާއާ ދިމާއަށެވެ.
”މަންމަ އާދޭ!” އައިނާގެ އަޑުގައިވަނީ އުފާވެރިކަމެވެ. ނުގޮސް އެތެރެއަށް ވަންނާކަށް ރައިހާއަކަށް ނުކެރުނެވެ. އާމިރާ ކިތަންމެ ދުރުން އުޅެން ބޭނުންވިޔަސް ރައިހާއަށް ވަނީ މަޖުބޫރުވެފައެވެ. މަޑުމަޑުން ހިނގާލާފައި ވާރެއިން ހިޔާވަމުން ގޮސް އެރީ ކުރީ ސީޓަށެވެ. އެކަމަކު އާމިރާ ދިމާއަކަށް ބަލައެއް ނުލައެވެ.
ސްކޫލް ގޭޓަށްވުރެ ތަންކޮޅެއް ދުރުގައި ކާރު މަޑުކުރުމުން ކުދިވެރިން ނިކުމެ ދުވެލާފައި ގޮސް ސްކޫލް ދޮރާށިން ވަން މަންޒަރު ބަލަން އާމިރާއި ރައިހާ ވެސް ތިއްބެވެ. ކުދިންނަކީ މާތްﷲ އިންސާނުންނަށް ދެއްވާ ހާދަ ބޮޑު ނިޢުމަތެކެވެ. އެއްވެސް ޚިޔާލެއް ފިކުރެއް ނެތެވެ. މިފަދަ މައުސޫމު ކުދިންގެ ކޮންމެ ހަރަކާތުން ހިތަށް ލިބެނީ ކޮންފަދަ ބޮޑު ހިތްހަމަޖެހުމެއް ހެއްޔެވެ! ހިތަށް އައި ޚިޔާލަކުން ރައިހާގެ މޫނުން އުފާވެރިކަން ފެނިގެން ދިޔައެވެ.
އާމިރު ކާރު ދުއްވައިލިއެވެ. ވާރޭގެ ސަބަބުން ޚާއްސަކޮށް މަގުތަކުގައި ހެދިފައިވާ ފެންގަނޑުތަކުގެ ސަބަބުންކަމެއް ނޭނގެއެވެ. މަގުތަކުގައި ފުދޭވަރަކަށް ދުއްވާއެއްޗެހި މަދެވެ.
ރައިހާ ވާހަކަ ނުދައްކާތީ އާމިރު ވެސް އިނީ އަނގައިން ނުބުނަން ހުވާކޮށްގެން ކަންނޭނގެއެވެ. ކާރު ގޮސް ގަރާޖަށް ވެއްދިއިރު ވެސް އެކަކުވެސް ވާހަކައެއް ނުދައްކައެވެ. އޭރު ވާރޭ ވެސް ހުއްޓާލަފާނެކަމުގެ ނިޝާން ފެންނަން ފަށައިފިއެވެ.
މެންދުރުވާން އުޅެނިކޮށް ވާރޭ ހުއްޓާލައިފިއެވެ. އެހެންނަމަވެސް ދުނިޔެމަތި ފެންނަނީ ވަރަށް ބަނަ ކޮށެވެ. ކޮންމެ ގަޑިއެއްގައި ވެސް ވާރޭ ވެހިގެންފާނެއޭ ރައިހާ ހިތަށް އެރިއެވެ.
ރައިހާ އެރޭ އޮފީހަށް ދިޔައީ ކޮންމެހެން ނިންމަންޖެހޭ މަސައްކަތްތަކެއް ނިންމުމަށެވެ. ކިތަންމެ ވިއްސާރަކޮށް އޮތަސް އޮފީހަށް ދާން މަޖުބޫރުވީ ރައިހާގެ ބޮސް ގުޅާފަ ކޮންމެހެން ވެސް އެމަސައްކަތް މާދަމާގެ އޮފީސް ހުޅުވެން ވާއިރަށް ނިންމާލަ ދޭށޭ ބުނީމައެވެ. ބޮސް އެހެން ބުނި އިރު ވެސް އިރު އޮއްސިއްޖެއެވެ. އޮފީހުން ގެއަށް އައުމުގެ ކުރިން ބުނި ނަމަ ގެއަށް އައީހީ ނިންމާލާފައެވެ.
ފައިލް ތަކުގެ މަސައްކަތް ނިންމާ ހަދަން ޖެހޭ ޕްރެޒެންޓޭޝަނުގެ މަސައްކަތް ރައިހާ ފެށިއިރު ހުރީ ދިހަގަޑިބައިވާން ކައިރިވެފައެވެ. އެހެންވިޔަސް ބާރަ ޖެހިއަސް ނިންމާފަ ނޫނީ ދެވޭކަށްނެތެވެ.
ވީ އެންމެ އަވަހަކށް މަސައްކަތް ނިންމާލާފަ ގަޑި ބަލއއިލީ ގެއަށް ދާންވެގެން ލިފްޓަށް އަރާހުރެއެވެ. އޭރު ގަޑިން އެގާރަގަޑިބައިވެ ބޮޑުވެއްޖެއެވެ. ރައިހާއަށް ބިރުވެރިކަން އިޙުސާސްވެ ހިތް ނުތަނަވަސް ވެއްޖެއެވެ. މިގަޑީގައި މަގުމަތީގައި އަންހެން ކުއްޖަކު އެކަނި ހިނގާފައި ދިއުމަކީ ރައްކާތެރިކަމެއް ނޫންކަން އެނގޭތީ ހާސްވެއްޖެއެވެ. އަލުން ލިފްޓްން ނިކުމެ ހަދާނެ ގޮތަކާމެދު ވިސްނައިލިއެވެ. ބަލާ އައިސްދޭށޭ ވަކި ބުނާނީ ވެސް ކާކުކައިރީހެއްޔެވެ! ތިމާގެ ހުރި އެކަނިވެރިކަން ހިތަށް ވަނުމުން ރައިހާގެ ލޯ ތެމިގެން ދިޔައެވެ. ހެދޭނެ ދެވަނަ ގޮތެއް ނެތުމުން އާމިރަށް މެސެޖެއް ކުރަން އުޅެފައި ވެސް މެސެޖްކުރަންޏާ ވެސް ހައްތާ ލަސްވާނިއޭ ހިތަށް އަރާ ގުޅައިލިއެވެ. ދެތިން ރިންގާއެކު އާމިރު ފޯނު ނެގިއެވެ. ރައިހާކަން އެނގޭތީ އާމިރު ހުރީ ނުލާހިކު އުފާވެފައެވެ.
”ހަލޯ ރައި!”
އާމިރުގެ އަޑު އެކަނި އިވުނަސް ރައިހާއަށް ފުދެއެވެ. އާމިރުގެ އަޑުގެ ޖާދޫގައި ޖެހުން އެއީ ރައިހާއަށް ދެން ކުރެވޭނެ އެންމެ ބޮޑު މޮޔަކަމެވެ. އެހެން ހިތަށް އެރުމުން ތެޅިގެންފައި ޖަވާބު ދިނެވެ.
”އަހަރެން އޮފީހުގަ! ދެންމެ މި ނިމުނީ! އެކަނި ދާން ބިރު ގަންނާތީ……!” ރައިހާގެ ވާހަކަ އެ ހިސާބަށް ގެންދިޔާމަ ދެން ބުނާނެ އެއްޗެއް އާމިރަށް އެނގޭނެކަން ރައިހާއަށް އެނގެއެވެ.
”ދެ މިނިޓް ދީ! ގުޅީމަ ތިރިއަށް ފައިބާ! އޭގެ ކުރިން އެތެރޭގަ މަޑުކުރޭ!” އާމިރަށް ގުޅިއިރު ވެސް އާމިރު އަންނާނެ ކަން އެނގެއެވެ. އެކަމަކު އާމިރު އެއީ ރައިހާގެ ކަންކަން ބަލަހައްޓަން ރައިހާގެ ކާކުހެއްޔެވެ!
އާމިރުގެ ޚިޔާލު އައުމުން ބައެއްފަހަރު ރައިހާއަށް އުފާވެރިކަން އިޙުސާސްވެއެވެ. އާމިރުގެ ސަބަބުން ރައިހާއަށާ ކުދިންނަށް ރައްކާތެރިކަން ލިބެއެވެ. އާމިރު ކުދިންނާ ހެދި އުޅޭ ގޮތުން އެއީ ކުދިންގެ ބައްޕަ ނޫންކަމެއްވެސް އެހެން ބަޔަކަށް ނޭނގޭނއެވެ. އެހާވެސް ކުދިންނަށް ވެސް ހެވެވެ.
ހަމައެގޮތަށް އާމިރުގެ ޚިޔާލު އައުމުން ބައެއް ފަހަރު ރައިހާގެ ހިތަށް ތަދުވެއެވެ. އާމިރަށް ރައިހާ ޚާއްސައޭ ހިތަށް އެރުމުން އެ ކުރެވެނީ ކުށްހީއެކޭ ހީވީމަ އަދި މާދެރަވެއެވެ. ފިރިއެއްގެ ފަރާތުން ރައިހާ ބޭނުން ހުރިހާ ސިފައެއް އާމިރުގެ ފަރާތުން ރައިހާއަށް ފެނެއެވެ. އެހެންނަމަވެސް އާމިރު………. ޚިޔާލުގެ ދުނިޔެއިން ރައިހާ ހޭލައްވާލީ ފޯނުގެ ސްކްރީން ދިއްލުމުންނެވެ. މުށުތެރޭ އޮތް ފޯނުން އާމިރުގެ ނަމްބަރު ފެންނަން އޮތުން މޫނުމަތި އަލިވެގެން ދިޔައެވެ.
ތިރިއަށް ފޭބިއިރު އާމިރު ސައިކަލް މަތީގައި އިނީ ރައިހާގެ އިންތިޒާރުގައެވެ. އާމިރު އައީ ސައިކަލުގައިކަން އެނގުމުން ރައިހާއަށް ފަސްޖެހެވުނެވެ. އާމިރާއެކު ކީއްކުރަންހެއްޔެވެ. އަމިއްލަ ފިރިމީހާއާއެކު ނޫނީ ދުވަހަކު ވެސް ރައިހާ ސައިކަލަކަށް ނާރައެވެ.
”ކާރު ނެރުމަށްވުރެ ސައިކުގަ އައީމަ ފަސޭހަވާނެތީ!” ރައިހާގެ ހިތުގައި ހިނގާ ޝުޢޫރުތައް އާމިރަށް އެނގެނީ ކިހިނެއްހެއްޔެވެ!
އިސްޖަހާލަމުން ގޮސް ވަރަށް ނޫން ގޮތަކަށް ރައިހާ އަރާ އިށީނެވެ. ބެލީ އާމިރުގެ ގައިގާ ނުޖެހި އިނދެވޭތޯއެވެ.
”ގެއާހަމައަށް ދެވޭނެކަމެއް ވެސް ނޭނގެ! ވަރަށް ވިލާ އެބަހުރި!” ސައިކަލް ދުއްވާލަމުން އުޑުމައްޗަށް ބަލާލަމުން އާމިރު ބުންޏެވެ. ތެދެކެވެ. އުޑުމަތި ފެންނަނީ ކަޅުވިލާތަކުން ބަރާވެފައިވާ ތަނެވެ.
ދެމީހުންނަށް ވެސް ހީކުރެވުނީ ރަނގަޅަށެވެ. ގެއާހަމައަށް ނުދެވެނީސް މާކުރިން ވާރޭ ވެހިގެންފިއެވެ. ރައިހާ އެދުނީ ތެމިގެންވެސް ގެއަށް ދިއުމަށެވެ. އެކަމަކު އާމިރަކަށް ވާރެއަކާ ނުތެމެވޭނެއެވެ. އެހެންކަމުން އެންމެ ކައިރިން ހިޔާވެލާނެ ވަރުތަންކޮޅެއް ފެނުނު ފިހާރައިގެ އަސްކަނި ދޮށަށް ދެމީހުންނަށް ދުވެ ގޮސް ވަދެވުނު އިރު އާމިރު ކޮންމެވެސް ވަރަކަށް ތެމިއްޖެއެވެ. ސައިކަލް ޕާކުކޮށްލާފަ އަންނަން ހަދައިގެންނެވެ.
ފެނާއެކު ވައިރޯޅި ވެސް އައީ އިރެއްއިރަކަށްވުރެ ބާރު ވަމުންނެވެ. ރައިހާގެ މޫނާ ބޮލާ ހާމައަށް ހުރުމުން އަތްދިގު ޓޮޕެއް ލާފަ ހުއްޓަސް ރައިހާ ހީކަރުވަނީއެވެ. ހީކަރުވާކަން އާމިރަށް އަންގަން ބޭނުން ނުވިއަސް އެންމެ ފަހުން ކެތްނުކުރެވިގެން މެއަށްވުރެ ތިރީގައި ދެއަތް ހުރަސްކޮށް ބާރަށް ހިފަހައްޓައިލިއެވެ. އަދި އާމިރުގެ އެއްފަރާތަކަށް ބިއްދޮށަށް ޖެހިލާ ބޮނދައިލިއެވެ. ޚުދު އާމިރުވެސް ހުރީ ވަރަށް ބޮޑަށް ހީކަރުވާފައއެވެ.
އާމިރުގެ ފަހަތަށް ވަން ރައިގެ ހަށިގަނޑު އާމިރުގެ ގައިގާ ނުޖެހުނަސް އެ ހަށިގަނޑުން އާމިރަށް ހޫނުކަން ލިބިގެން ދިޔަހިނދު އިތުރަށް ރައިހާއާ ގާތްވެލެވުނެވެ. އެކަކު ވެސް އަނެކަކަށް ނިހާޔަތަށް ބޭނުންވިއިރު ވެސް އެވާހަކައެއް ނުދައްކައެވެ. އެކަމަކަށް މަގު ފަހިއެއް ވެސް ނުކުރެއެވެ.
ހިނދެއް ހިނދަކަށް ވިއްސާރަ ދިޔައީ ގަދަވަމުންނެވެ. ވެފައިވާ ވަރުބަލި ކަމާއެކު ހަށިގަނޑަށް މާބޮޑަށް ފިނިވަމުންދާތީ ކަންނޭނގެއެވެ. ރައިހާ ހުރީ ވަރަށް ބޮޑަށް ނިދި ވެސް އައިސްފައެވެ. އެކަމަކު ގަދަވަޔާ ފެނުގެ ތެރޭގައި ނިކުމެގެން ދާނީ ވެސް ކިހިނެތްހެއްޔެވެ!
ވިއްސާރަ ތުނިވެލި ވަގުތުކޮޅެއް ދިއުމަށްފަހު ކުއްލިއަކަށް ވަރަށް ގަދަޔަށް ވިދާލިއެވެ. ވިދުވަރުގެ އަލި ގަދަކަމުން ދެލޯ މެރިގެން ދިޔަ ރައިހާ ހުރީ ބިރުން ފިތްކަނޑައިގެން ދާވަރުވެފައެވެ. ކުރެވުނު ކަމަކީ އިތުރަށް އާމިރުގެ ގަޔާ ގާތް ވެލެވުމެވެ.
ވިދުވަރުގެ އަލި ނުކެނޑެނީސް ގުގުރައިގަތް އަޑުން ހީވީ ފުރާޅުތަކާ ގޭގޭގެ ޓިނުތައް ވެސް ބިމަށްފައިބާ ގަތްހެންނެވެ. އުޑު ބޮލަށް ވެއްޓެނީހެންނެވެ. ބިރުން ހުރި ރައިހާއަށް އާމިރުގެ ގައިގާ ބައްދައިގެން ރޮއެ ގަނެވުނެވެ. މަންމާ ބައްޕާ ގޮވަމުންނެވެ. އާމިރުވެސް ދެއަތުން ރައިހާ ވަށާލާ ގަޔާ ފިއްތައިލިއެވެ. ޙިމާޔަތާ ރައްކާތެރިކަން ދިނުމަށެވެ. ރައިހާގެ ބިރު ކަނޑުވައިލުމަށެވެ.
އެ ބާރު މިނުގެ ތިން ހަތަރު ގުގުރި ފުލުފުލުގައި ޖެހުމަށްފަހު ދުނިޔެ މަތި އަމާން ވެއްޖެއެވެ. އެ ހުރިހާ އިރެއް ވީއިރު ވެސް ރައިހާ ހުރީ އާމިރުގެ ދެއަތުގެ ތެރޭގައެވެ. ރާއިހާ ހަމައަކަށް އެޅި އަމިއްލައިން އެދެއަތުގެ ތެރެއިން ނިކުންނަން ދެން އާމިރު ރައިހާއަށް ރައްކާތެރިކަމާ އާމިރުގެ ހަށިގަނޑުގެ ހޫނުކަން ދިނެވެ.
އާމިރާ ދުރަށް ޖެހިލި ރައިހާ އިސް ޖަހާލައިގެން އިރުކޮޅަކު ހުރުމަށްފަހު އިސްއުފުލައި ބަލައިލީ އާމިރަށެވެ. އެވަގުތު އާމިރު ރައިހާއަށް ބަލަން ހުރި ލޯބިވެތި ގޮތް ދުވަހަކު ވެސް ރައިހާގެ ހިތަކުން ފިލައިގެން ނުދާނެއެވެ. އެއީ ޢިޝްޤީ ބެލުމެކެވެ. އެ ބެލުމުގައި އެތައް ހާސް ލޯބީގެ ނާނާއެއް ވިއެވެ……… އެ ބެލުމުން އާމިރު ބޭނުންވީ ރައިހާއަށް އޭނަގެ ހިތުގައި އޮތް ލޯބި އަންގައިދިނުމަށެވެ. އެ ސާދާސީދާ އަންހެންކުއްޖާއަށް މާނަކުރަން އެނގުނީ މަކަރުވެރިއެއްގެ ކެހިވެރި ލޯބި އެކަނި ހެއްޔެވެ!
”އާމިރު!”
ރައިހާ ގޮވައިލުމުން އާމިރުގެ ޖަވާބު އައީ ހަރަކާތުންނެވެ. އާމިރު ހިފައިލީ ރައިހާގެ އަތްތިލާގައެވެ. އަދި ގަޔާ ކައިރިއަށް ދަމާލުމުން ރައިހާގެ މޫނު ގޮސް ޖެހުނީ އާމިރުގެ މޭމަތީގައެވެ.
”ރައި! އަހަރެން ބޭނުން ވާހަކައެއް ބުނަން!” ރައިހާގެ މޫނުގެ ދެފަރާތުގައި ހިފަހައްޓައިގެން ހުރެ އާމިރު ވާހަކަ ދެއްކީ ރައިހާއަށް އެކަނި އިވޭ ވަރަށެވެ.
”އަހަރެން ބޭނުމީ ގެއަށް ދާން! އިތުރުކަމެއް ބޭނުމެއް ނޫން!” މިދެވެނީ މީހަކަށް ވަރަށް ބޮޑު އަނިޔާއެއްކަން އެނގޭއިރު ވެސް ރައިހާ ބޭނުންވީ ރައިހާގެ ގޮތުގައި ހުންނާށެވެ. ކޮންމެ ގޮތެއްވިޔަސް ރައިހާއަކީ އަދި މީހެއްގެ އަނތްބެކެވެ. އެކަން ރައިހާ ހަނދާން ނައްތާލައިގެން ނުވާނެއެވެ. އަދި އާމިރު ވެސް އެކަން ދަންނަން ޖެހޭނެއެވެ.
އާމިރުގެ އަތުގެ ތެރެއިން ދެމިގަނެގެން ރައިހާ ނުކުތީ ކަނި ޖަހަމުން ދިޔަ ވާރޭ ތިކިތަކުގެ ތެރެއަށެވެ.
(ނުނިމޭ)
ޚިޔާލުތައް