މުހައްމަދު ޝިހާބް އިއްޔެ، 2 ފެބްރުއަރީ 2022 އިން ފެށިގެން ގޭގެއަށް ގޮސް ކޮވިޑް-19 ސާމްޕަލް ނެގުން ހުއްޓާލާފައިވާ ކަމަށް ފުވައްމުލަކު ހޮސްޕިޓަލުން ހާމަކޮށްފިއެވެ.
މިއީ ކޮވިޑް-19 އާއި ގުޅިގެން ރާއްޖޭގައި އަމަލުކުރަމުން ގެންދާ އުސޫލަށް 1 ފެބްރުއަރީ 2022 ގައި ގެނައި ބަދަލާއިއެކު ގެނައި ބަދަލެކެވެ. އެގޮތުން މަައިގަނޑު 3 ބަދަލެއް ހޮސްޕިޓަލުން ހާމަކޮށްފައި ވެއެވެ.
ކޮވިޑް-19 އާއި ގުޅިގެން ޑައިރެކްޓް ކޮންޓެކްޓުންނާއި، ކަރަންޓީން ރިލީޒްކުރާ މީހުންނާއި، ރެންޑަމް ސާމްޕަލިންގެ އިތުރުން އެކްޓިވް ސަވައިލެންސްއަށް ސާމަޕްލް ނެގުމަށް ހަމަޖެހިފައި ވަނީ ކުރީގެ ބާ ހޮސްޕިޓަލުން ހަވީރު 4:00 އިން 6:00 އަށެވެ.
އަލަށް އަމަލުކުރާން ފެށި އުސޫލުގައިވާ ގޮތުން ޕޮޒިޓިވްވާ މީހުން ކަރަންޓީނުން ދޫކުރާއިރު ބަލީގެ އަލާމާތެއް ނެތްނަމަ ސާމްޕަލް ނެގުމެއް ނޯވެއެވެ. ޕޮޒިޓިވްވާ މީހުން ކަރަންޓީނު ކުރަނީ 7 ދުވަހަށެވެ. އަދި 8 ވަނަ ދުވަހު ބަލީގެ އަލާމާތެއް ނެތްނަމަ ކަރަންޓީނު ނިމުނީއެވެ. ބަލީގެ އެއްވެސް އަލާމާތް ހުރެއްޖެނަމަ، ކަރަންޓީނު ނިމެނީ އެއިގެފަހުން އަލާމާތް ނުފެނި 24 ގަޑިއިރު ހަމަވުމުންނެވެ.
ކޮވިޑް-19 ޖެހިގެން ނުވަތަ ކޮންޓެކްޓަކަށް ވެގެން އައިސޮލޭޓުވެ ނުވަތަ ކަރަންޓީނުވާ މީހުންގެ ތެރެއިން ވަޒީފާއަށް ނިކުތުމަށް ނެގަޓިވް ނަތީޖާ ބޭނުންވާ މީހުން މިހާރު ޕީސީއާރުގެ ބަދަލުގައި ހަދަނީ އެންޓިޖިން ޓެސްޓެވެ. އަދި އެ ޓެސްޓް ހެދުމަށް ހޮސްޕިޓަލުގެ 7930188 ނަމްބަރަށް ގުޅައިގެން ޓެސްޓް ހެދޭނެ އިންތިޒާމު ހަމަޖެހިގެންދާނެކަމަށް ހޮސްޕިޓަލުން ހާމަކުރެއެވެ.
ޚިޔާލުތައް