އިބްރާހިމް ލަތީފް ހުވަދު އަތޮޅު ދެކުނު ބުރީ ފަރެސްމާތޮޑާގައި މަސްކިރުވައި މަސްފިނިކޮށް ރައްކާކުރެވޭނެ ފެސިލިޓީއެއް ގާއިމުކުރުމަށްޓަކައި ދެކުނު އަތޮޅުތަކުގެ މަސްވެރިންނާއި ކައުންސިލްގެ އެއްބާރުލުން ހޯދުމަށް ކުރާ މަސައްކަތުގެ ތެރެއިން ފުވައްމުލަކު ސިޓީ ކައުންސިލް މެންބަރުން ފުރިހަމަ ތާއީދު އެކަމަށް ލިބިފައިވާ ކަމަށް ފަރެސްމާތޮޑާ ކައުންސިލްގެ ރައީސް އިމްތިޔާޒު ވިދާޅުވެއްޖެއެވެ.
ފުވައްމުލަކު ސިޓީ ކައުސިލް މެންބަރުންނާއި ބައްދަލުކުރެއްވުމަށްފަހު ފޭސްބުކު މެދުވެރިކޮށް އިމްތިޔާޒު ވިދާޅުވީ “ސިޓީ ކައުންސިލުގެ މެންބަރުންގެ ފުރިހަމަ ތާއީދު މިކަމުގައި ވަނީ ލިބިފައި” ވާ ކަމަށެވެ. ހުވަދު އަތޮޅަކީ ފުވައްމުލައް ސިޓީގެ އިގްތިސާދީ ތަރައްގީގެ ބައިވެރި އެއް ކަމަށާއި ފުވައްކަމަލަކަށް ވެސް ތަރައްގީ ގެނެވޭނީ ހުވަދު އަތޮޅާއި ގުޅި ލާމެހިގެން ކުރެވޭ މަސައްކަތުން ކަމަށް ފުވައްމުލައްސިޓީގެ މޭޔަރު މިބައްދަލު ވުމުގައި ވިދާޅުވިކަމަށް ވެސް އިމްތިޔާޒު ހާމަކުރެއްވިއެވެ.
ހުވަދު އަތޮޅު ދެކުނުބުރީ ފަރެސް މާތޮޑާގައި މަސް ކިރުވައި ޕްރޮސެސްކޮށް ރައްކާ ކުރެވޭނެ ފެސިލިޓި އެއް ގާއިމުކުރުމަށް ފަރެސް މަތޮޑާ ކައުންސިލުން ދަނީ ވަރަށް ވަރުގަދަ ކެންޕޭނެއް ކުރަމުންނެވެ. އެގޮތުން ދެކުނު ތިން އަތޮޅު ކައުންސިލްގެ ރުހުން ހޯދުމާއި އެސަރަހައްދުގެ މަސްވެރިންގެ ރުހުން ހޯދުމުގެ މަސައްކަތް ވެސް ދަނީ ކުރަމުންނެވެ.
ފަރެސްމާތޮޑާގައި މަސް ކިރުވައި ޕްރޮސެސްކޮށް ރައްކާ ކުރެވޭނެ ފެސިލިޓި އެއް ގާއިމުވެގެން ދިއުމަކީ ދެކުނުގެ މަސްވެރިމަށް ލިބިގެންދާނެ ބޮޑު ކުރިއެރުމެއް ކަމަށް މިކެންޕޭނުގެ ތެރެއިން ފަރެސްމަތޮޑާ ކައުންސިލްގެ ރައީސް އިމްތިޔާޒު ވިދާޅުވިއެވެ. އަދި ފަރެސްމާތޮޑާގެ މަސްވެރިން މިތިބީ މިކަން ކޮށްދޭނެ ކޮންމެ ބައެއްގެ ފަހަތުގައި ކަމަށްވެސް އިމްތިޔާޒުވަނީ ވިދާޅުވެފައެވެ.
މަސްވެރިކަން ރަގަޅު ދުވަސްވަރު ދެކުނު ތިންއަތޮޅުގެ މަސްވެރިން މަސްވެރިކަން ކުރާ ސަރަހައްދު، ފޮޓޯ: އިމްތިޔާޒު
މަސްވެރިކަން ރަގަޅު ދުވަސްވަރު ދެކުނު ތިން އަތޮޅުގެ މަސްވެރިން މަސްވެރިކަން ކުރަމުންދަނީ ހުވަދު އަތޮޅުގެ ދެކުނުން ފެށިގެން އައްޑު އަތޮޅާއި ދެމެދުން ކަމަށްވެސް އިމްތިޔާޒު ފާހަގަކުރެއްވިއެވެ. މިސަރަހައްދުން މަސްބާނައިގެން ހުވަދު އަތޮޅުގެ އުތުރު ބިތުގައި އޮންނަ ގއ. ކޫއްޑޫ އަށް މަސް ކިރަން 35 މޭލު ދުުއްވަން ޖެހޭ ކަމަށާއި މިއީ ނިސްބަތުން ދިގު ދަތުރެއްކަމަށް ވެސް ފަރެސްމާތޮޑާ ކައުންސިލް ރައީސް ވިދާޅުވިއެވެ. އެހެންކަމުން އަތޮޅަށް ވަންނައިރު ވީހާވެސް ކައިރިން މަސްްކިރޭނެ ނިޒާމެއް ގާއިމްކުރުން މުހިންމު ކަމަށްވެސް އިމްތިޔާޒު ވިދާޅުވިއެވެ.
+1
+1
ޚިޔާލުތައް