އިބްރާހިމް ލަތީފް ޓެލެކޮމިއުނިކޭޝަން ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލުގެ އިތުބާރު ނެތްކަަމަށް ނިންމުމަށް އެމްޑީޕީގެ ޕާލަމެންޓަރީ ގުރޫޕުން ތްރީލައިން ވިޕެއް ނެރެފިއެވެ. އެމްޑީޕީއިން ތްރީ ލައިން ވިޕެއް ނެރެފައިވަނީ މަލީހުގެ އިތުބާރު ނެތްކަމުގެ މައްސަލަ މާދަމާއަށް އެޖެންޑާކޮށްފައި ވަނިކޮށެވެ.
މިސަރުކާރުގެ ވަޒީރުންގެ މަޖިލީހުގައި ހިމެނޭ ފުވައްމުލަަށް ނިސްބަތްވާ ހަމައެކަނި ވަޒީރު މުހައްމަދު މަލީހު ޖަމާލުގެ އިތުބާރުނެތް ކަމުގެ މައްސަލަ މަޖިލީހަށް ވައްދާފައިވަނީ އެމްޑީޕީގެ ޕާލަމެންޓަރީ ގްރޫޕުގެ ލީޑަރު އަލީ އާޒިމެވެ. އެމައްސަލަ މަޖިލީހަށް ވެއްދިކަމަށް މިމަހު 10 ވަނަ ދުވަހު އަލީ އާޒިމުވަނީ ޓްވީޓުކޮށްފައެވެ.
ރައްޔިތުންގެ މަޖިލީހުގެ ސްޕާމެޖޯރިޓީ އެމްޑީޕީއަށް އޮންނައިރު މަލީހުގެ އިތުބާރުނެތްކަމަށް ފާސްކުރަން ބޭނުންވަނީ މަޖިލީހުގެ އަޣުލަބިއްޔަތު ކަމުގައި ވާ 43 ވޯޓެވެ.
މިނިސްޓަރު މަލީހުގެ އިތުބާރު ނެތް ކަމަށް ބުނެ މަޖިލިހަށް ހުށަހެޅި ލިޔުމުގައި ވަނީ ކޮމިއުނިކޭޝަން މިނިސްޓްރީން ހަދަން ޖެހޭ އެއްވެސް ގަވައިދެއް މަލީހު މަގާމުގައި ހުންނަވާތާ ދެ އަހަރުވީ އިރު ވެސް ހަދާފައިނުވާ ކަން ސާފުކޮށް އެނގޭ ކަމަށެވެ. އަދި މިކަމުގައި ޖަވާބުދާރީވުމަކީ މުވާސަލާތީ ހިދުމަތްތައް ތަންފީޒުކޮށް ހިންގުމުގެ މަސްއޫލިއްޔަތު އެ އިރެއްގައި ހަވާލުކޮށްފައިވާ ވުޒާރާއެއްގެ ވަޒީރުގެ ޒިންމާއެއް ކަމަށް ރާއްޖޭގެ ކޮމިއުނިކޭޝަންސް އޮތޯރިޓީ އޮފް މޯލްޑިވްސްގެ ގާނޫނުގެ ދެ ވަނަ މާއްދާގެ (ނ) ގައި ކަނޑައެޅިފައިވާ ކަމަށް ވެސް އެ މައްސަލައިގައިވެއެވެ. މިކަމާއި ގުޅިގެން މަލީހު ވިދާޅުވެފައި ވަނީ، ކޭމުން ހަދަން ޖެހޭ ގަވާއިދެއް ނުހެދުމުން، އެއީ އޭނާގެ މައްސަލައެއް ކަމަށް އެމްޑީޕީއިން ފާހަގަކުރާއިރު، ކޭމްއަކީ ގާނޫނީ ވަކި ޝަހުސެއް ކަމަށެވެ. ކޭމް ހިންގަނީ ބޯޑެއް އައްޔަންކޮށް، ސީއީއޯއަކު އައްޔަންކޮށްގެން ކަން ވެސް މަލީހް ފާހަގަކުރެއްވި އެވެ.
އެމްޑީޕީގެ ޕާލަމެންޓްރީ ގްރޫޕްގެ ބައެއް ބޭފުޅުން ހިތްހަމަޖެހިވަޑައިނުގަތީ، ބަރުލަމާނީ ނިޒާމާ ގުޅޭ ގޮތުން ވީޓީވީގެ ޕްރޮގްރާމެއްގައި ދެއްކެވި ވާހަކަތަކާ ގުޅިގެން ކަމަށް މަލީހުވަނީ ކުރިން ވިދާޅުވެފައެވެ. އެއީ، ގާނޫނުއަސާސީން ވަޒީރަކަށް ވެސް ލިބިފައި އޮންނަ ހައްގެއް ކަމަށާއި ރިޔާސީ ނިޒާމުގެ ދިފާއުގައި ވާހަކަ ދެއްކެވުމަކީ އަބަދުވެސް ކުރާނެ ކަމެއް ކަމަށް މަލީހް ވިދާޅުވި އެވެ.
ޚިޔާލުތައް